៦. បតិដ្ឋិតសុត្តំ

៥២៦. ‘‘ឯកធម្មេ បតិដ្ឋិតស្ស, ភិក្ខវេ, ភិក្ខុនោ បញ្ចិន្ទ្រិយានិ ភាវិតានិ ហោន្តិ សុភាវិតានិ. កតមស្មិំ ឯកធម្មេ? អប្បមាទេ. កតមោ ច ភិក្ខវេ, អប្បមាទោ? ឥធ, ភិក្ខវេ, ភិក្ខុ ចិត្តំ រក្ខតិ អាសវេសុ ច សាសវេសុ ច ធម្មេសុ. តស្ស ចិត្តំ រក្ខតោ អាសវេសុ ច សាសវេសុ ច ធម្មេសុ សទ្ធិន្ទ្រិយម្បិ ភាវនាបារិបូរិំ គច្ឆតិ. វីរិយិន្ទ្រិយម្បិ ភាវនាបារិបូរិំ គច្ឆតិ. សតិន្ទ្រិយម្បិ ភាវនាបារិបូរិំ គច្ឆតិ. សមាធិន្ទ្រិយម្បិ ភាវនាបារិបូរិំ គច្ឆតិ. បញ្ញិន្ទ្រិយម្បិ ភាវនាបារិបូរិំ គច្ឆតិ. ឯវម្បិ ខោ, ភិក្ខវេ, ឯកធម្មេ បតិដ្ឋិតស្ស ភិក្ខុនោ បញ្ចិន្ទ្រិយានិ ភាវិតានិ ហោន្តិ សុភាវិតានី’’តិ. ឆដ្ឋំ.