៤. បទសុត្តំ

៥២៤. ‘‘សេយ្យថាបិ, ភិក្ខវេ, យានិ កានិចិ ជង្គលានំ [ជង្គមានំ (សី. បី.)] បាណានំ បទជាតានិ សព្ពានិ តានិ ហត្ថិបទេ សមោធានំ គច្ឆន្តិ, ហត្ថិបទំ តេសំ អគ្គមក្ខាយតិ, យទិទំ – មហន្តត្តេន; ឯវមេវ ខោ, ភិក្ខវេ, យានិ កានិចិ បទានិ ពោធាយ សំវត្តន្តិ, បញ្ញិន្ទ្រិយំ បទំ តេសំ អគ្គមក្ខាយតិ, យទិទំ – ពោធាយ. កតមានិ ច, ភិក្ខវេ, បទានិ ពោធាយ សំវត្តន្តិ? សទ្ធិន្ទ្រិយំ, ភិក្ខវេ, បទំ, តំ ពោធាយ សំវត្តតិ; វីរិយិន្ទ្រិយំ បទំ, តំ ពោធាយ សំវត្តតិ; សតិន្ទ្រិយំ បទំ, តំ ពោធាយ សំវត្តតិ; សមាធិន្ទ្រិយំ បទំ, តំ ពោធាយ សំវត្តតិ; បញ្ញិន្ទ្រិយំ បទំ, តំ ពោធាយ សំវត្តតិ. សេយ្យថាបិ, ភិក្ខវេ, យានិ កានិចិ ជង្គលានំ បាណានំ បទជាតានិ សព្ពានិ តានិ ហត្ថិបទេ សមោធានំ គច្ឆន្តិ, ហត្ថិបទំ តេសំ អគ្គមក្ខាយតិ, យទិទំ – មហន្តត្តេន; ឯវមេវ ខោ, ភិក្ខវេ, យានិ កានិចិ បទានិ ពោធាយ សំវត្តន្តិ, បញ្ញិន្ទ្រិយំ បទំ តេសំ អគ្គមក្ខាយតិ, យទិទំ – ពោធាយា’’តិ. ចតុត្ថំ.