៦. ទុតិយបុព្ពារាមសុត្តំ

៥១៦. តំយេវ និទានំ. ‘‘កតិនំ នុ ខោ, ភិក្ខវេ, ឥន្ទ្រិយានំ ភាវិតត្តា ពហុលីកតត្តា ខីណាសវោ ភិក្ខុ អញ្ញំ ព្យាករោតិ – ‘ខីណា ជាតិ, វុសិតំ ព្រហ្មចរិយំ, កតំ ករណីយំ, នាបរំ ឥត្ថត្តាយា’តិ បជានាមី’’តិ? ភគវំមូលកា នោ, ភន្តេ, ធម្មា…បេ… ‘‘ទ្វិន្នំ ខោ, ភិក្ខវេ, ឥន្ទ្រិយានំ ភាវិតត្តា ពហុលីកតត្តា ខីណាសវោ ភិក្ខុ អញ្ញំ ព្យាករោតិ – ‘ខីណា ជាតិ, វុសិតំ ព្រហ្មចរិយំ, កតំ ករណីយំ, នាបរំ ឥត្ថត្តាយា’តិ បជានាមីតិ. កតមេសំ ទ្វិន្នំ? អរិយាយ ច បញ្ញាយ, អរិយាយ ច វិមុត្តិយា. យា ហិស្ស, ភិក្ខវេ, អរិយា បញ្ញា តទស្ស បញ្ញិន្ទ្រិយំ. យា ហិស្ស, ភិក្ខវេ, អរិយា វិមុត្តិ តទស្ស សមាធិន្ទ្រិយំ. ឥមេសំ ខោ, ភិក្ខវេ, ទ្វិន្នំ ឥន្ទ្រិយានំ ភាវិតត្តា ពហុលីកតត្តា ខីណាសវោ ភិក្ខុ អញ្ញំ ព្យាករោតិ – ‘ខីណា ជាតិ, វុសិតំ ព្រហ្មចរិយំ, កតំ ករណីយំ, នាបរំ ឥត្ថត្តាយា’តិ បជានាមី’’តិ. ឆដ្ឋំ.