៨. វិរទ្ធសុត្តំ

១៩៩. ‘‘យេសំ កេសញ្ចិ, ភិក្ខវេ, សត្ត ពោជ្ឈង្គា វិរទ្ធា, វិរទ្ធោ តេសំ អរិយោ មគ្គោ សម្មា ទុក្ខក្ខយគាមី. យេសំ កេសញ្ចិ, ភិក្ខវេ, សត្ត ពោជ្ឈង្គា អារទ្ធា, អារទ្ធោ តេសំ អរិយោ មគ្គោ សម្មា ទុក្ខក្ខយគាមី. កតមេ សត្ត? សតិសម្ពោជ្ឈង្គោ…បេ… ឧបេក្ខាសម្ពោជ្ឈង្គោ – យេសំ កេសញ្ចិ, ភិក្ខវេ, ឥមេ សត្ត ពោជ្ឈង្គា វិរទ្ធា, វិរទ្ធោ តេសំ អរិយោ មគ្គោ សម្មា ទុក្ខក្ខយគាមី. យេសំ កេសញ្ចិ, ភិក្ខវេ, ឥមេ សត្ត ពោជ្ឈង្គា អារទ្ធា, អារទ្ធោ តេសំ អរិយោ មគ្គោ សម្មា ទុក្ខក្ខយគាមី’’តិ. អដ្ឋមំ.