៧. បឋមអាមកធញ្ញបេយ្យាលវគ្គោ

១. អញ្ញត្រសុត្តំ

១១៣១. អថ ខោ ភគវា បរិត្តំ នខសិខាយំ បំសុំ អារោបេត្វា ភិក្ខូ អាមន្តេសិ – ‘‘តំ កិំ មញ្ញថ, ភិក្ខវេ, កតមំ នុ ខោ ពហុតរំ – យោ វាយំ មយា បរិត្តោ នខសិខាយំ បំសុ អារោបិតោ, អយំ វា មហាបថវី’’តិ? ‘‘ឯតទេវ, ភន្តេ, ពហុតរំ, យទិទំ – មហាបថវី; អប្បមត្តកាយំ ភគវតា បរិត្តោ នខសិខាយំ បំសុ អារោបិតោ. សង្ខម្បិ ន ឧបេតិ, ឧបនិធម្បិ ន ឧបេតិ, កលភាគម្បិ ន ឧបេតិ មហាបថវិំ ឧបនិធាយ ភគវតា បរិត្តោ នខសិខាយំ បំសុ អារោបិតោ’’តិ.

‘‘ឯវមេវ ខោ, ភិក្ខវេ, អប្បមត្តកា តេ សត្តា យេ មនុស្សេសុ បច្ចាជាយន្តិ; អថ ខោ ឯតេវ ពហុតរា សត្តា យេ អញ្ញត្រ មនុស្សេហិ [មនុស្សេសុ (បី. ក.)] បច្ចាជាយន្តិ. តំ កិស្ស ហេតុ? អទិដ្ឋត្តា, ភិក្ខវេ, ចតុន្នំ អរិយសច្ចានំ. កតមេសំ ចតុន្នំ? ទុក្ខស្ស អរិយសច្ចស្ស…បេ… ទុក្ខនិរោធគាមិនិយា បដិបទាយ អរិយសច្ចស្ស’’.

‘‘តស្មាតិហ, ភិក្ខវេ, ‘ឥទំ ទុក្ខ’ន្តិ យោគោ ករណីយោ…បេ… ‘អយំ ទុក្ខនិរោធគាមិនី បដិបទា’តិ យោគោ ករណីយោ’’តិ. បឋមំ.

២. បច្ចន្តសុត្តំ

១១៣២. អថ ខោ ភគវា បរិត្តំ នខសិខាយំ បំសុំ អារោបេត្វា ភិក្ខូ អាមន្តេសិ – ‘‘តំ កិំ មញ្ញថ, ភិក្ខវេ, កតមំ នុ ខោ ពហុតរំ – យោ វាយំ មយា បរិត្តោ នខសិខាយំ បំសុ អារោបិតោ, អយំ វា មហាបថវី’’តិ? ‘‘ឯតទេវ, ភន្តេ, ពហុតរំ, យទិទំ – មហាបថវី; អប្បមត្តកាយំ ភគវតា បរិត្តោ នខសិខាយំ បំសុ អារោបិតោ. សង្ខម្បិ ន ឧបេតិ, ឧបនិធម្បិ ន ឧបេតិ, កលភាគម្បិ ន ឧបេតិ មហាបថវិំ ឧបនិធាយ ភគវតា បរិត្តោ នខសិខាយំ បំសុ អារោបិតោ’’តិ.

‘‘ឯវមេវ ខោ, ភិក្ខវេ, អប្បមត្តកា តេ សត្តា យេ មជ្ឈិមេសុ ជនបទេសុ បច្ចាជាយន្តិ; អថ ខោ ឯតេវ ពហុតរា សត្តា យេ បច្ចន្តិមេសុ ជនបទេសុ បច្ចាជាយន្តិ អវិញ្ញាតារេសុ មិលក្ខេសុ [មិលក្ខូសុ (ស្យា. កំ. ក.)] …បេ…. ទុតិយំ.

៣. បញ្ញាសុត្តំ

១១៣៣. … ‘‘ឯវមេវ ខោ, ភិក្ខវេ, អប្បកា តេ សត្តា យេ បន អរិយេន បញ្ញាចក្ខុនា សមន្នាគតា; អថ ខោ ឯតេវ ពហុតរា សត្តា យេ អវិជ្ជាគតា សម្មុឡ្ហា…បេ…. តតិយំ.

៤. សុរាមេរយសុត្តំ

១១៣៤. … ‘‘ឯវមេវ ខោ, ភិក្ខវេ, អប្បកា តេ សត្តា យេ សុរាមេរយមជ្ជប្បមាទដ្ឋានា បដិវិរតា; អថ ខោ ឯតេវ ពហុតរា សត្តា យេ សុរាមេរយមជ្ជប្បមាទដ្ឋានា អបដិវិរតា…បេ…. ចតុត្ថំ.

៥. ឱទកសុត្តំ

១១៣៥. … ‘‘ឯវមេវ ខោ, ភិក្ខវេ, អប្បកា តេ សត្តា យេ ថលជា; អថ ខោ ឯតេវ ពហុតរា សត្តា យេ ឧទកជា. តំ កិស្ស ហេតុ…បេ…. បញ្ចមំ.

៦. មត្តេយ្យសុត្តំ

១១៣៦. … ‘‘ឯវមេវ ខោ, ភិក្ខវេ, អប្បកា តេ សត្តា យេ មត្តេយ្យា; អថ ខោ ឯតេវ ពហុតរា សត្តា យេ អមត្តេយ្យា…បេ…. ឆដ្ឋំ.

៧. បេត្តេយ្យសុត្តំ

១១៣៧. … ‘‘ឯវមេវ ខោ, ភិក្ខវេ, អប្បកា តេ សត្តា យេ បេត្តេយ្យា; អថ ខោ ឯតេវ ពហុតរា សត្តា យេ អបេត្តេយ្យា…បេ…. សត្តមំ.

៨. សាមញ្ញសុត្តំ

១១៣៨. … ‘‘ឯវមេវ ខោ, ភិក្ខវេ, អប្បកា តេ សត្តា យេ សាមញ្ញា; អថ ខោ ឯតេវ ពហុតរា សត្តា យេ អសាមញ្ញា…បេ…. អដ្ឋមំ.

៩. ព្រហ្មញ្ញសុត្តំ

១១៣៩. … ‘‘ឯវមេវ ខោ, ភិក្ខវេ, អប្បកា តេ សត្តា យេ ព្រហ្មញ្ញា; អថ ខោ ឯតេវ ពហុតរា សត្តា យេ អព្រហ្មញ្ញា…បេ…. នវមំ.

១០. បចាយិកសុត្តំ

១១៤០. … ‘‘ឯវមេវ ខោ, ភិក្ខវេ, អប្បកា តេ សត្តា យេ កុលេ ជេដ្ឋាបចាយិនោ; អថ ខោ ឯតេវ ពហុតរា សត្តា យេ កុលេ អជេដ្ឋាបចាយិនោតិ [អកុលេ ជេដ្ឋាបចាយិនោតិ (ស្យា. កំ.)] …បេ…. ទសមំ.

បឋមអាមកធញ្ញបេយ្យាលវគ្គោ សត្តមោ.

តស្សុទ្ទានំ –

អញ្ញត្រ បច្ចន្តំ បញ្ញា, សុរាមេរយឱទកា;

មត្តេយ្យ បេត្តេយ្យា ចាបិ, សាមញ្ញំ ព្រហ្មបចាយិកន្តិ.