៨. សមាធិសុត្តំ

២៨. សាវត្ថិនិទានំ. ‘‘អរិយំ វោ, ភិក្ខវេ, សម្មាសមាធិំ ទេសេស្សាមិ សឧបនិសំ សបរិក្ខារំ. តំ សុណាថ. កតមោ ច, ភិក្ខវេ, អរិយោ សម្មាសមាធិ សឧបនិសោ សបរិក្ខារោ? សេយ្យថិទំ – សម្មាទិដ្ឋិ…បេ… សម្មាសតិ [សម្មាសមាធិ (សី. ស្យា. កំ. ក.)]. យា ខោ, ភិក្ខវេ, ឥមេហិ សត្តហង្គេហិ ចិត្តស្ស ឯកគ្គតា សបរិក្ខារតា [សបរិក្ខតា (សី. បី.)] – អយំ វុច្ចតិ, ភិក្ខវេ, អរិយោ សម្មាសមាធិ សឧបនិសោ ឥតិបិ សបរិក្ខារោ ឥតិបី’’តិ. អដ្ឋមំ.