៧. ទុតិយអញ្ញតរភិក្ខុសុត្តំ

៧. សាវត្ថិនិទានំ. អថ ខោ អញ្ញតរោ ភិក្ខុ យេន ភគវា តេនុបសង្កមិ…បេ… ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច –

‘‘‘រាគវិនយោ ទោសវិនយោ មោហវិនយោ’តិ, ភន្តេ, វុច្ចតិ. កិស្ស នុ ខោ ឯតំ, ភន្តេ, អធិវចនំ – ‘រាគវិនយោ ទោសវិនយោ មោហវិនយោ’’’តិ? ‘‘និព្ពានធាតុយា ខោ ឯតំ, ភិក្ខុ, អធិវចនំ – ‘រាគវិនយោ ទោសវិនយោ មោហវិនយោ’តិ. អាសវានំ ខយោ តេន វុច្ចតី’’តិ.

ឯវំ វុត្តេ សោ ភិក្ខុ ភគវន្តំ ឯតទវោច – ‘‘‘អមតំ, អមត’ន្តិ, ភន្តេ, វុច្ចតិ. កតមំ នុ ខោ, ភន្តេ, អមតំ, កតមោ អមតគាមិមគ្គោ’’តិ? ‘‘យោ ខោ, ភិក្ខុ, រាគក្ខយោ ទោសក្ខយោ មោហក្ខយោ – ឥទំ វុច្ចតិ អមតំ. អយមេវ អរិយោ អដ្ឋង្គិកោ មគ្គោ អមតគាមិមគ្គោ, សេយ្យថិទំ – សម្មាទិដ្ឋិ…បេ… សម្មាសមាធី’’តិ. សត្តមំ.