៥. តតិយសារិបុត្តកោដ្ឋិកសុត្តំ

៤១៤. ឯកំ សមយំ អាយស្មា ច សារិបុត្តោ, អាយស្មា ច មហាកោដ្ឋិកោ ពារាណសិយំ វិហរន្តិ ឥសិបតនេ មិគទាយេ…បេ… (សាយេវ បុច្ឆា) ‘‘កោ នុ ខោ, អាវុសោ, ហេតុ កោ បច្ចយោ, យេនេតំ អព្យាកតំ ភគវតា’’តិ? ‘‘រូបេ ខោ, អាវុសោ, អវិគតរាគស្ស អវិគតច្ឆន្ទស្ស អវិគតបេមស្ស អវិគតបិបាសស្ស អវិគតបរិឡាហស្ស អវិគតតណ្ហស្ស ‘ហោតិ តថាគតោ បរំ មរណា’តិបិស្ស ហោតិ…បេ… ‘នេវ ហោតិ ន ន ហោតិ តថាគតោ បរំ មរណា’តិបិស្ស ហោតិ. វេទនាយ…បេ… សញ្ញាយ…បេ… សង្ខារេសុ…បេ… វិញ្ញាណេ អវិគតរាគស្ស អវិគតច្ឆន្ទស្ស អវិគតបេមស្ស អវិគតបិបាសស្ស អវិគតបរិឡាហស្ស អវិគតតណ្ហស្ស ‘ហោតិ តថាគតោ បរំ មរណា’តិបិស្ស ហោតិ…បេ… ‘នេវ ហោតិ ន ន ហោតិ តថាគតោ បរំ មរណា’តិបិស្ស ហោតិ. រូបេ ច ខោ, អាវុសោ, វិគតរាគស្ស…បេ… វេទនាយ…បេ… សញ្ញាយ…បេ… សង្ខារេសុ…បេ… វិញ្ញាណេ វិគតរាគស្ស វិគតច្ឆន្ទស្ស វិគតបេមស្ស វិគតបិបាសស្ស វិគតបរិឡាហស្ស វិគតតណ្ហស្ស ‘ហោតិ តថាគតោ បរំ មរណា’តិបិស្ស ន ហោតិ…បេ… ‘នេវ ហោតិ ន ន ហោតិ តថាគតោ បរំ មរណា’តិបិស្ស ន ហោតិ. អយំ ខោ, អាវុសោ, ហេតុ, អយំ បច្ចយោ, យេនេតំ អព្យាកតំ ភគវតា’’តិ. បញ្ចមំ.