១. បលោកធម្មសុត្តំ

៨៤. សាវត្ថិនិទានំ. អថ ខោ អាយស្មា អានន្ទោ យេន ភគវា តេនុបសង្កមិ…បេ… ឯកមន្តំ និសិន្នោ ខោ អាយស្មា អានន្ទោ ភគវន្តំ ឯតទវោច –

‘‘‘លោកោ, លោកោ’តិ, ភន្តេ, វុច្ចតិ. កិត្តាវតា នុ ខោ, ភន្តេ, លោកោតិ វុច្ចតី’’តិ? ‘‘យំ ខោ, អានន្ទ, បលោកធម្មំ, អយំ វុច្ចតិ អរិយស្ស វិនយេ លោកោ. កិញ្ច, អានន្ទ, បលោកធម្មំ? ចក្ខុ ខោ, អានន្ទ, បលោកធម្មំ, រូបា បលោកធម្មា, ចក្ខុវិញ្ញាណំ បលោកធម្មំ, ចក្ខុសម្ផស្សោ បលោកធម្មោ, យម្បិទំ ចក្ខុសម្ផស្សបច្ចយា…បេ… តម្បិ បលោកធម្មំ…បេ… ជិវ្ហា បលោកធម្មា, រសា បលោកធម្មា, ជិវ្ហាវិញ្ញាណំ បលោកធម្មំ, ជិវ្ហាសម្ផស្សោ បលោកធម្មោ, យម្បិទំ ជិវ្ហាសម្ផស្សបច្ចយា…បេ… តម្បិ បលោកធម្មំ…បេ… មនោ បលោកធម្មោ, ធម្មា បលោកធម្មា, មនោវិញ្ញាណំ បលោកធម្មំ, មនោសម្ផស្សោ បលោកធម្មោ, យម្បិទំ មនោសម្ផស្សបច្ចយា ឧប្បជ្ជតិ វេទយិតំ សុខំ វា ទុក្ខំ វា អទុក្ខមសុខំ វា តម្បិ បលោកធម្មំ. យំ ខោ, អានន្ទ, បលោកធម្មំ, អយំ វុច្ចតិ អរិយស្ស វិនយេ លោកោ’’តិ. បឋមំ.