១. បឋមសមុទ្ទសុត្តំ

២២៨. ‘‘‘សមុទ្ទោ, សមុទ្ទោ’តិ, ភិក្ខវេ, អស្សុតវា បុថុជ្ជនោ ភាសតិ. នេសោ, ភិក្ខវេ, អរិយស្ស វិនយេ សមុទ្ទោ. មហា ឯសោ, ភិក្ខវេ, ឧទករាសិ មហាឧទកណ្ណវោ. ចក្ខុ, ភិក្ខវេ, បុរិសស្ស សមុទ្ទោ; តស្ស រូបមយោ វេគោ. យោ តំ រូបមយំ វេគំ សហតិ, អយំ វុច្ចតិ, ភិក្ខវេ, អតរិ ចក្ខុសមុទ្ទំ សឩមិំ សាវដ្ដំ សគាហំ សរក្ខសំ; តិណ្ណោ បារង្គតោ ថលេ តិដ្ឋតិ ព្រាហ្មណោ…បេ… ជិវ្ហា, ភិក្ខវេ, បុរិសស្ស សមុទ្ទោ; តស្ស រសមយោ វេគោ. យោ តំ រសមយំ វេគំ សហតិ, អយំ វុច្ចតិ, ភិក្ខវេ, អតរិ ជិវ្ហាសមុទ្ទំ សឩមិំ សាវដ្ដំ សគាហំ សរក្ខសំ; តិណ្ណោ បារង្គតោ ថលេ តិដ្ឋតិ ព្រាហ្មណោ…បេ… មនោ, ភិក្ខវេ, បុរិសស្ស សមុទ្ទោ; តស្ស ធម្មមយោ វេគោ. យោ តំ ធម្មមយំ វេគំ សហតិ, អយំ វុច្ចតិ, ភិក្ខវេ, អតរិ មនោសមុទ្ទំ សឩមិំ សាវដ្ដំ សគាហំ សរក្ខសំ; តិណ្ណោ បារង្គតោ ថលេ តិដ្ឋតិ ព្រាហ្មណោ’’តិ. ឥទមវោច…បេ… សត្ថា –

‘‘យោ ឥមំ សមុទ្ទំ សគាហំ សរក្ខសំ,

សឩមិំ សាវដ្ដំ សភយំ ទុត្តរំ អច្ចតរិ;

ស វេទគូ វុសិតព្រហ្មចរិយោ,

លោកន្តគូ បារគតោតិ វុច្ចតី’’តិ. បឋមំ;