៤. ពាហិរអនិច្ចនន្ទិក្ខយសុត្តំ

១៥៩. ‘‘រូបេ, ភិក្ខវេ, យោនិសោ មនសិ ករោថ; រូបានិច្ចតញ្ច យថាភូតំ សមនុបស្សថ. រូបេ, ភិក្ខវេ, ភិក្ខុ យោនិសោ មនសិករោន្តោ, រូបានិច្ចតញ្ច យថាភូតំ សមនុបស្សន្តោ រូបេសុបិ និព្ពិន្ទតិ. នន្ទិក្ខយា រាគក្ខយោ; រាគក្ខយា នន្ទិក្ខយោ. នន្ទិរាគក្ខយា ចិត្តំ សុវិមុត្តន្តិ វុច្ចតិ. សទ្ទេ… គន្ធេ… រសេ… ផោដ្ឋព្ពេ… ធម្មេ, ភិក្ខវេ, យោនិសោ មនសិ ករោថ; ធម្មានិច្ចតញ្ច យថាភូតំ សមនុបស្សថ. ធម្មេ, ភិក្ខវេ, ភិក្ខុ យោនិសោ មនសិករោន្តោ, ធម្មានិច្ចតញ្ច យថាភូតំ សមនុបស្សន្តោ ធម្មេសុបិ និព្ពិន្ទតិ. នន្ទិក្ខយា រាគក្ខយោ; រាគក្ខយា នន្ទិក្ខយោ. នន្ទិរាគក្ខយា ចិត្តំ សុវិមុត្តន្តិ វុច្ចតី’’តិ. ចតុត្ថំ.