៣. ទុក្ខនិព្ពានសប្បាយសុត្តំ

១៤៨. ‘‘និព្ពានសប្បាយំ វោ, ភិក្ខវេ, បដិបទំ ទេសេស្សាមិ. តំ សុណាថ…បេ… កតមា ច សា, ភិក្ខវេ, និព្ពានសប្បាយា បដិបទា? ឥធ, ភិក្ខវេ, ចក្ខុំ ទុក្ខន្តិ បស្សតិ, រូបា ទុក្ខាតិ បស្សតិ, ចក្ខុវិញ្ញាណំ ទុក្ខន្តិ បស្សតិ, ចក្ខុសម្ផស្សោ ទុក្ខោតិ បស្សតិ, យម្បិទំ ចក្ខុសម្ផស្សបច្ចយា ឧប្បជ្ជតិ វេទយិតំ សុខំ វា ទុក្ខំ វា អទុក្ខមសុខំ វា តម្បិ ទុក្ខន្តិ បស្សតិ…បេ… ជិវ្ហា ទុក្ខាតិ បស្សតិ…បេ… មនោ ទុក្ខោតិ បស្សតិ, ធម្មា ទុក្ខាតិ បស្សតិ, មនោវិញ្ញាណំ ទុក្ខន្តិ បស្សតិ, មនោសម្ផស្សោ ទុក្ខោតិ បស្សតិ, យម្បិទំ មនោសម្ផស្សបច្ចយា ឧប្បជ្ជតិ វេទយិតំ សុខំ វា ទុក្ខំ វា អទុក្ខមសុខំ វា តម្បិ ទុក្ខន្តិ បស្សតិ. អយំ ខោ សា, ភិក្ខវេ, និព្ពានសប្បាយា បដិបទា’’តិ. តតិយំ.