៧. អរហន្តវគ្គោ

១. ឧបាទិយមានសុត្តំ

៦៣. ឯវំ មេ សុតំ – ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. អថ ខោ អញ្ញតរោ ភិក្ខុ យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ. ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘សាធុ មេ, ភន្តេ, ភគវា សំខិត្តេន ធម្មំ ទេសេតុ យមហំ ភគវតោ ធម្មំ សុត្វា ឯកោ វូបកដ្ឋោ អប្បមត្តោ អាតាបី បហិតត្តោ វិហរេយ្យ’’ន្តិ. ‘‘ឧបាទិយមានោ ខោ, ភិក្ខុ, ពទ្ធោ មារស្ស; អនុបាទិយមានោ មុត្តោ បាបិមតោ’’តិ. ‘‘អញ្ញាតំ ភគវា, អញ្ញាតំ សុគតា’’តិ.

‘‘យថា កថំ បន ត្វំ, ភិក្ខុ, មយា សំខិត្តេន ភាសិតស្ស វិត្ថារេន អត្ថំ អាជានាសី’’តិ? ‘‘រូបំ ខោ, ភន្តេ, ឧបាទិយមានោ ពទ្ធោ មារស្ស; អនុបាទិយមានោ មុត្តោ បាបិមតោ. វេទនំ ឧបាទិយមានោ ពទ្ធោ មារស្ស; អនុបាទិយមានោ មុត្តោ បាបិមតោ. សញ្ញំ… សង្ខារេ … វិញ្ញាណំ ឧបាទិយមានោ ពទ្ធោ មារស្ស; អនុបាទិយមានោ មុត្តោ បាបិមតោ. ឥមស្ស ខ្វាហំ, ភន្តេ, ភគវតា សំខិត្តេន ភាសិតស្ស ឯវំ វិត្ថារេន អត្ថំ អាជានាមី’’តិ.

‘‘សាធុ សាធុ, ភិក្ខុ! សាធុ ខោ ត្វំ, ភិក្ខុ, មយា សំខិត្តេន ភាសិតស្ស វិត្ថារេន អត្ថំ អាជានាសិ. រូបំ ខោ, ភិក្ខុ, ឧបាទិយមានោ ពទ្ធោ មារស្ស; អនុបាទិយមានោ មុត្តោ បាបិមតោ. វេទនំ… សញ្ញំ… សង្ខារេ… វិញ្ញាណំ ឧបាទិយមានោ ពទ្ធោ មារស្ស; អនុបាទិយមានោ មុត្តោ បាបិមតោ. ឥមស្ស ខោ, ភិក្ខុ, មយា សំខិត្តេន ភាសិតស្ស ឯវំ វិត្ថារេន អត្ថោ ទដ្ឋព្ពោ’’តិ.

អថ ខោ សោ ភិក្ខុ ភគវតោ ភាសិតំ អភិនន្ទិត្វា អនុមោទិត្វា ឧដ្ឋាយាសនា ភគវន្តំ អភិវាទេត្វា បទក្ខិណំ កត្វា បក្កាមិ. អថ ខោ សោ ភិក្ខុ ឯកោ វូបកដ្ឋោ អប្បមត្តោ អាតាបី បហិតត្តោ វិហរន្តោ នចិរស្សេវ – យស្សត្ថាយ កុលបុត្តា សម្មទេវ អគារស្មា អនគារិយំ បព្ពជន្តិ តទនុត្តរំ – ព្រហ្មចរិយបរិយោសានំ ទិដ្ឋេវ ធម្មេ សយំ អភិញ្ញា សច្ឆិកត្វា ឧបសម្បជ្ជ វិហរតិ. ‘‘ខីណា ជាតិ, វុសិតំ ព្រហ្មចរិយំ, កតំ ករណីយំ, នាបរំ ឥត្ថត្តាយា’’តិ អព្ភញ្ញាសិ. អញ្ញតរោ ច បន សោ ភិក្ខុ អរហតំ អហោសីតិ. បឋមំ.

២. មញ្ញមានសុត្តំ

៦៤. សាវត្ថិនិទានំ. អថ ខោ អញ្ញតរោ ភិក្ខុ…បេ… ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘សាធុ មេ, ភន្តេ, ភគវា សំខិត្តេន ធម្មំ ទេសេតុ…បេ… អាតាបី បហិតត្តោ វិហរេយ្យ’’ន្តិ. ‘‘មញ្ញមានោ ខោ, ភិក្ខុ, ពទ្ធោ មារស្ស; អមញ្ញមានោ មុត្តោ បាបិមតោ’’តិ. ‘‘អញ្ញាតំ ភគវា, អញ្ញាតំ សុគតា’’តិ.

‘‘យថា កថំ បន ត្វំ, ភិក្ខុ, មយា សំខិត្តេន ភាសិតស្ស វិត្ថារេន អត្ថំ អាជានាសី’’តិ? ‘‘រូបំ ខោ, ភន្តេ, មញ្ញមានោ ពទ្ធោ មារស្ស; អមញ្ញមានោ មុត្តោ បាបិមតោ. វេទនំ… សញ្ញំ… សង្ខារេ… វិញ្ញាណំ មញ្ញមានោ ពទ្ធោ មារស្ស; អមញ្ញមានោ មុត្តោ បាបិមតោ. ឥមស្ស ខ្វាហំ, ភន្តេ, ភគវតា សំខិត្តេន ភាសិតស្ស ឯវំ វិត្ថារេន អត្ថំ អាជានាមី’’តិ.

‘‘សាធុ សាធុ, ភិក្ខុ! សាធុ ខោ ត្វំ, ភិក្ខុ, មយា សំខិត្តេន ភាសិតស្ស វិត្ថារេន អត្ថំ អាជានាសិ. រូបំ ខោ, ភិក្ខុ, មញ្ញមានោ ពទ្ធោ មារស្ស; អមញ្ញមានោ មុត្តោ បាបិមតោ. វេទនំ… សញ្ញំ… សង្ខារេ… វិញ្ញាណំ មញ្ញមានោ ពទ្ធោ មារស្ស; អមញ្ញមានោ មុត្តោ បាបិមតោ. ឥមស្ស ខោ, ភិក្ខុ, មយា សំខិត្តេន ភាសិតស្ស ឯវំ វិត្ថារេន អត្ថោ ទដ្ឋព្ពោ’’តិ…បេ… អញ្ញតរោ ច បន សោ ភិក្ខុ អរហតំ អហោសីតិ. ទុតិយំ.

៣. អភិនន្ទមានសុត្តំ

៦៥. សាវត្ថិនិទានំ. អថ ខោ អញ្ញតរោ ភិក្ខុ…បេ… ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘សាធុ មេ, ភន្តេ, ភគវា សំខិត្តេន…បេ… បហិតត្តោ វិហរេយ្យ’’ន្តិ. ‘‘អភិនន្ទមានោ ខោ, ភិក្ខុ, ពទ្ធោ មារស្ស; អនភិនន្ទមានោ មុត្តោ បាបិមតោ’’តិ. ‘‘អញ្ញាតំ ភគវា, អញ្ញាតំ សុគតា’’តិ.

‘‘យថា កថំ បន ត្វំ, ភិក្ខុ, មយា សំខិត្តេន ភាសិតស្ស វិត្ថារេន អត្ថំ អាជានាសី’’តិ? ‘‘រូបំ ខោ, ភន្តេ, អភិនន្ទមានោ ពទ្ធោ មារស្ស; អនភិនន្ទមានោ មុត្តោ បាបិមតោ. វេទនំ… សញ្ញំ… សង្ខារេ… វិញ្ញាណំ អភិនន្ទមានោ ពទ្ធោ មារស្ស; អនភិនន្ទមានោ មុត្តោ បាបិមតោ. ឥមស្ស ខ្វាហំ, ភន្តេ, ភគវតា សំខិត្តេន ភាសិតស្ស ឯវំ វិត្ថារេន អត្ថំ អាជានាមី’’តិ.

‘‘សាធុ សាធុ, ភិក្ខុ! សាធុ ខោ ត្វំ, ភិក្ខុ, មយា សំខិត្តេន ភាសិតស្ស វិត្ថារេន អត្ថំ អាជានាសិ. រូបំ ខោ, ភិក្ខុ, អភិនន្ទមានោ ពទ្ធោ មារស្ស; អនភិនន្ទមានោ មុត្តោ បាបិមតោ. វេទនំ… សញ្ញំ… សង្ខារេ … វិញ្ញាណំ អភិនន្ទមានោ ពទ្ធោ មារស្ស; អនភិនន្ទមានោ មុត្តោ បាបិមតោ. ឥមស្ស ខោ, ភិក្ខុ, មយា សំខិត្តេន ភាសិតស្ស ឯវំ វិត្ថារេន អត្ថោ ទដ្ឋព្ពោ’’តិ…បេ… អញ្ញតរោ ច បន សោ ភិក្ខុ អរហតំ អហោសីតិ. តតិយំ.

៤. អនិច្ចសុត្តំ

៦៦. សាវត្ថិនិទានំ. អថ ខោ អញ្ញតរោ ភិក្ខុ…បេ… ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘សាធុ មេ, ភន្តេ, ភគវា សំខិត្តេន ធម្មំ ទេសេតុ…បេ… អាតាបី បហិតត្តោ វិហរេយ្យ’’ន្តិ. ‘‘យំ ខោ, ភិក្ខុ, អនិច្ចំ; តត្រ តេ ឆន្ទោ បហាតព្ពោ’’តិ. ‘‘អញ្ញាតំ ភគវា; អញ្ញាតំ សុគតា’’តិ.

‘‘យថា កថំ បន ត្វំ, ភិក្ខុ, មយា សំខិត្តេន ភាសិតស្ស វិត្ថារេន អត្ថំ អាជានាសី’’តិ? ‘‘រូបំ ខោ, ភន្តេ, អនិច្ចំ; តត្រ មេ ឆន្ទោ បហាតព្ពោ. វេទនា… សញ្ញា… សង្ខារា… វិញ្ញាណំ អនិច្ចំ; តត្រ មេ ឆន្ទោ បហាតព្ពោ. ឥមស្ស ខ្វាហំ, ភន្តេ, ភគវតា សំខិត្តេន ភាសិតស្ស ឯវំ វិត្ថារេន អត្ថំ អាជានាមី’’តិ.

‘‘សាធុ សាធុ, ភិក្ខុ! សាធុ ខោ ត្វំ, ភិក្ខុ, មយា សំខិត្តេន ភាសិតស្ស វិត្ថារេន អត្ថំ អាជានាសិ. រូបំ ខោ, ភិក្ខុ, អនិច្ចំ; តត្រ តេ ឆន្ទោ បហាតព្ពោ. វេទនា អនិច្ចា… សញ្ញា… សង្ខារា… វិញ្ញាណំ អនិច្ចំ; តត្រ ខោ តេ ឆន្ទោ បហាតព្ពោ. ឥមស្ស ខោ, ភិក្ខុ, មយា សំខិត្តេន ភាសិតស្ស ឯវំ វិត្ថារេន អត្ថោ ទដ្ឋព្ពោ’’តិ…បេ… អញ្ញតរោ ច បន សោ ភិក្ខុ អរហតំ អហោសីតិ. ចតុត្ថំ.

៥. ទុក្ខសុត្តំ

៦៧. សាវត្ថិនិទានំ. អថ ខោ អញ្ញតរោ ភិក្ខុ…បេ… ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘សាធុ មេ, ភន្តេ, ភគវា សំខិត្តេន ធម្មំ ទេសេតុ…បេ… អាតាបី បហិតត្តោ វិហរេយ្យ’’ន្តិ. ‘‘យំ ខោ, ភិក្ខុ, ទុក្ខំ; តត្រ តេ ឆន្ទោ បហាតព្ពោ’’តិ. ‘‘អញ្ញាតំ ភគវា; អញ្ញាតំ សុគតា’’តិ.

‘‘យថា កថំ បន ត្វំ, ភិក្ខុ, មយា សំខិត្តេន ភាសិតស្ស វិត្ថារេន អត្ថំ អាជានាសី’’តិ? ‘‘រូបំ ខោ, ភន្តេ, ទុក្ខំ; តត្រ មេ ឆន្ទោ បហាតព្ពោ. វេទនា… សញ្ញា… សង្ខារា… វិញ្ញាណំ ទុក្ខំ; តត្រ មេ ឆន្ទោ បហាតព្ពោ. ឥមស្ស ខ្វាហំ, ភន្តេ, ភគវតា សំខិត្តេន ភាសិតស្ស ឯវំ វិត្ថារេន អត្ថំ អាជានាមី’’តិ.

‘‘សាធុ សាធុ, ភិក្ខុ! សាធុ ខោ ត្វំ, ភិក្ខុ, មយា សំខិត្តេន ភាសិតស្ស វិត្ថារេន អត្ថំ អាជានាសិ. រូបំ ខោ ភិក្ខុ, ទុក្ខំ; តត្រ តេ ឆន្ទោ បហាតព្ពោ. វេទនា… សញ្ញា… សង្ខារា… វិញ្ញាណំ ទុក្ខំ; តត្រ តេ ឆន្ទោ បហាតព្ពោ. ឥមស្ស ខោ, ភិក្ខុ, មយា សំខិត្តេន ភាសិតស្ស ឯវំ វិត្ថារេន អត្ថោ ទដ្ឋព្ពោ’’តិ…បេ… អញ្ញតរោ ច បន សោ ភិក្ខុ អរហតំ អហោសីតិ. បញ្ចមំ.

៦. អនត្តសុត្តំ

៦៨. សាវត្ថិនិទានំ. អថ ខោ អញ្ញតរោ ភិក្ខុ…បេ… ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘សាធុ មេ, ភន្តេ, ភគវា សំខិត្តេន ធម្មំ ទេសេតុ…បេ… អាតាបី បហិតត្តោ វិហរេយ្យ’’ន្តិ. ‘‘យោ ខោ, ភិក្ខុ, អនត្តា; តត្រ តេ ឆន្ទោ បហាតព្ពោ’’តិ. ‘‘អញ្ញាតំ, ភគវា; អញ្ញាតំ, សុគតា’’តិ.

‘‘យថា កថំ បន ត្វំ, ភិក្ខុ, មយា សំខិត្តេន ភាសិតស្ស វិត្ថារេន អត្ថំ អាជានាសី’’តិ? ‘‘រូបំ ខោ, ភន្តេ, អនត្តា; តត្រ មេ ឆន្ទោ បហាតព្ពោ. វេទនា… សញ្ញា… សង្ខារា… វិញ្ញាណំ អនត្តា; តត្រ មេ ឆន្ទោ បហាតព្ពោ. ឥមស្ស ខ្វាហំ, ភន្តេ, ភគវតា សំខិត្តេន ភាសិតស្ស ឯវំ វិត្ថារេន អត្ថំ អាជានាមី’’តិ.

‘‘សាធុ សាធុ, ភិក្ខុ! សាធុ ខោ ត្វំ, ភិក្ខុ, មយា សំខិត្តេន ភាសិតស្ស វិត្ថារេន អត្ថំ អាជានាសិ. រូបំ ខោ, ភិក្ខុ, អនត្តា; តត្រ តេ ឆន្ទោ បហាតព្ពោ. វេទនា… សញ្ញា… សង្ខារា… វិញ្ញាណំ អនត្តា; តត្រ តេ ឆន្ទោ បហាតព្ពោ. ឥមស្ស ខោ, ភិក្ខុ, មយា សំខិត្តេន ភាសិតស្ស ឯវំ វិត្ថារេន អត្ថោ ទដ្ឋព្ពោ’’តិ…បេ… អញ្ញតរោ ច បន សោ ភិក្ខុ អរហតំ អហោសីតិ. ឆដ្ឋំ.

៧. អនត្តនិយសុត្តំ

៦៩. សាវត្ថិនិទានំ. អថ ខោ អញ្ញតរោ ភិក្ខុ…បេ… ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘សាធុ មេ, ភន្តេ, ភគវា សំខិត្តេន ធម្មំ ទេសេតុ…បេ… វិហរេយ្យ’’ន្តិ. ‘‘យំ ខោ, ភិក្ខុ, អនត្តនិយំ; តត្រ តេ ឆន្ទោ បហាតព្ពោ’’តិ. ‘‘អញ្ញាតំ, ភគវា; អញ្ញាតំ, សុគតា’’តិ.

‘‘យថា កថំ បន ត្វំ, ភិក្ខុ, មយា សំខិត្តេន ភាសិតស្ស វិត្ថារេន អត្ថំ អាជានាសី’’តិ? ‘‘រូបំ ខោ, ភន្តេ, អនត្តនិយំ; តត្រ មេ ឆន្ទោ បហាតព្ពោ. វេទនា… សញ្ញា… សង្ខារា… វិញ្ញាណំ អនត្តនិយំ; តត្រ មេ ឆន្ទោ បហាតព្ពោ. ឥមស្ស ខ្វាហំ, ភន្តេ, ភគវតា សំខិត្តេន ភាសិតស្ស ឯវំ វិត្ថារេន អត្ថំ អាជានាមី’’តិ.

‘‘សាធុ សាធុ, ភិក្ខុ! សាធុ ខោ ត្វំ, ភិក្ខុ, មយា សំខិត្តេន ភាសិតស្ស វិត្ថារេន អត្ថំ អាជានាសិ. រូបំ ខោ, ភិក្ខុ, អនត្តនិយំ; តត្រ តេ ឆន្ទោ បហាតព្ពោ. វេទនា … សញ្ញា… សង្ខារា… វិញ្ញាណំ អនត្តនិយំ; តត្រ តេ ឆន្ទោ បហាតព្ពោ. ឥមស្ស ខោ, ភិក្ខុ, មយា សំខិត្តេន ភាសិតស្ស ឯវំ វិត្ថារេន អត្ថោ ទដ្ឋព្ពោ’’តិ…បេ… អញ្ញតរោ ច បន សោ ភិក្ខុ អរហតំ អហោសីតិ. សត្តមំ.

៨. រជនីយសណ្ឋិតសុត្តំ

៧០. សាវត្ថិនិទានំ. អថ ខោ អញ្ញតរោ ភិក្ខុ…បេ… ឯកមន្តំ និសិន្នោ ខោ សោ ភិក្ខុ ភគវន្តំ ឯតទវោច – ‘‘សាធុ មេ, ភន្តេ, ភគវា សំខិត្តេន ធម្មំ ទេសេតុ, យមហំ ភគវតោ ធម្មំ សុត្វា…បេ… វិហរេយ្យ’’ន្តិ. ‘‘យំ ខោ, ភិក្ខុ, រជនីយសណ្ឋិតំ; តត្រ តេ ឆន្ទោ បហាតព្ពោ’’តិ. ‘‘អញ្ញាតំ, ភគវា; អញ្ញាតំ, សុគតា’’តិ.

‘‘យថា កថំ បន ត្វំ, ភិក្ខុ, មយា សំខិត្តេន ភាសិតស្ស វិត្ថារេន អត្ថំ អាជានាសី’’តិ? ‘‘រូបំ ខោ, ភន្តេ, រជនីយសណ្ឋិតំ; តត្រ មេ ឆន្ទោ បហាតព្ពោ. វេទនា… សញ្ញា… សង្ខារា… វិញ្ញាណំ រជនីយសណ្ឋិតំ; តត្រ មេ ឆន្ទោ បហាតព្ពោ. ឥមស្ស ខ្វាហំ, ភន្តេ, ភគវតា សំខិត្តេន ភាសិតស្ស ឯវំ វិត្ថារេន អត្ថំ អាជានាមី’’តិ.

‘‘សាធុ សាធុ ភិក្ខុ! សាធុ ខោ ត្វំ, ភិក្ខុ, មយា សំខិត្តេន ភាសិតស្ស វិត្ថារេន អត្ថំ អាជានាសិ. រូបំ ខោ, ភិក្ខុ, រជនីយសណ្ឋិតំ; តត្រ តេ ឆន្ទោ បហាតព្ពោ. វេទនា… សញ្ញា… សង្ខារា… វិញ្ញាណំ រជនីយសណ្ឋិតំ; តត្រ តេ ឆន្ទោ បហាតព្ពោ. ឥមស្ស ខោ, ភិក្ខុ, មយា សំខិត្តេន ភាសិតស្ស ឯវំ វិត្ថារេន អត្ថោ ទដ្ឋព្ពោ’’តិ…បេ… អញ្ញតរោ ច បន សោ ភិក្ខុ អរហតំ អហោសីតិ. អដ្ឋមំ.

៩. រាធសុត្តំ

៧១. សាវត្ថិនិទានំ. អថ ខោ អាយស្មា រាធោ យេន ភគវា តេនុបសង្កមិ; ឧបសង្កមិត្វា ភគវន្តំ ឯតទវោច – ‘‘កថំ នុ ខោ, ភន្តេ, ជានតោ, កថំ បស្សតោ ឥមស្មិញ្ច សវិញ្ញាណកេ កាយេ ពហិទ្ធា ច សព្ពនិមិត្តេសុ អហង្ការមមង្ការមានានុសយា ន ហោន្តី’’តិ? ‘‘យំ កិញ្ចិ, រាធ, រូបំ អតីតានាគតបច្ចុប្បន្នំ អជ្ឈត្តំ វា ពហិទ្ធា វា ឱឡារិកំ វា សុខុមំ វា ហីនំ វា បណីតំ វា យំ ទូរេ សន្តិកេ វា, សព្ពំ រូបំ – ‘នេតំ មម, នេសោហមស្មិ, ន មេសោ អត្តា’តិ ឯវមេតំ យថាភូតំ សម្មប្បញ្ញាយ បស្សតិ. យា កាចិ វេទនា… យា កាចិ សញ្ញា… យេ កេចិ សង្ខារា… យំ កិញ្ចិ វិញ្ញាណំ អតីតានាគតបច្ចុប្បន្នំ…បេ… យំ ទូរេ សន្តិកេ វា, សព្ពំ វិញ្ញាណំ – ‘នេតំ មម, នេសោហមស្មិ, ន មេសោ អត្តា’តិ ឯវមេតំ យថាភូតំ សម្មប្បញ្ញាយ បស្សតិ. ឯវំ ខោ, រាធ, ជានតោ ឯវំ បស្សតោ ឥមស្មិញ្ច សវិញ្ញាណកេ កាយេ ពហិទ្ធា ច សព្ពនិមិត្តេសុ អហង្ការមមង្ការមានានុសយា ន ហោន្តី’’តិ…បេ… អញ្ញតរោ ច បនាយស្មា រាធោ អរហតំ អហោសីតិ. នវមំ.

១០. សុរាធសុត្តំ

៧២. សាវត្ថិនិទានំ. អថ ខោ អាយស្មា សុរាធោ ភគវន្តំ ឯតទវោច – ‘‘កថំ នុ ខោ, ភន្តេ, ជានតោ កថំ បស្សតោ ឥមស្មិញ្ច សវិញ្ញាណកេ កាយេ ពហិទ្ធា ច សព្ពនិមិត្តេសុ អហង្ការមមង្ការមានាបគតំ មានសំ ហោតិ, វិធា សមតិក្កន្តំ សន្តំ សុវិមុត្ត’’ន្តិ? ‘‘យំ កិញ្ចិ, សុរាធ, រូបំ អតីតានាគតបច្ចុប្បន្នំ…បេ… យំ ទូរេ សន្តិកេ វា, សព្ពំ រូបំ – ‘នេតំ មម, នេសោហមស្មិ, ន មេសោ អត្តា’តិ ឯវមេតំ យថាភូតំ សម្មប្បញ្ញាយ ទិស្វា អនុបាទាវិមុត្តោ ហោតិ. យា កាចិ វេទនា… យា កាចិ សញ្ញា… យេ កេចិ សង្ខារា… យំ កិញ្ចិ វិញ្ញាណំ អតីតានាគតបច្ចុប្បន្នំ អជ្ឈត្តំ វា ពហិទ្ធា វា ឱឡារិកំ វា សុខុមំ វា ហីនំ វា បណីតំ វា យំ ទូរេ សន្តិកេ វា, សព្ពំ វិញ្ញាណំ – ‘នេតំ មម, នេសោហមស្មិ, ន មេសោ អត្តា’តិ ឯវមេតំ យថាភូតំ សម្មប្បញ្ញាយ ទិស្វា អនុបាទាវិមុត្តោ ហោតិ. ឯវំ ខោ, សុរាធ, ជានតោ ឯវំ បស្សតោ ឥមស្មិញ្ច សវិញ្ញាណកេ កាយេ, ពហិទ្ធា ច សព្ពនិមិត្តេសុ អហង្ការមមង្ការមានាបគតំ មានសំ ហោតិ វិធា សមតិក្កន្តំ សន្តំ សុវិមុត្ត’’ន្តិ…បេ… អញ្ញតរោ ច បនាយស្មា សុរាធោ អរហតំ អហោសីតិ. ទសមំ.

អរហន្តវគ្គោ សត្តមោ.

តស្សុទ្ទានំ –

ឧបាទិយមញ្ញមានា, អថាភិនន្ទមានោ ច;

អនិច្ចំ ទុក្ខំ អនត្តា ច, អនត្តនីយំ រជនីយសណ្ឋិតំ;

រាធសុរាធេន តេ ទសាតិ.