៩. នន្ទិក្ខយសុត្តំ

៥១. សាវត្ថិនិទានំ. ‘‘អនិច្ចញ្ញេវ, ភិក្ខវេ, ភិក្ខុ រូបំ អនិច្ចន្តិ បស្សតិ. សាស្ស ហោតិ សម្មាទិដ្ឋិ. សម្មា បស្សំ និព្ពិន្ទតិ. នន្ទិក្ខយា រាគក្ខយោ, រាគក្ខយា នន្ទិក្ខយោ. នន្ទិរាគក្ខយា ចិត្តំ វិមុត្តំ សុវិមុត្តន្តិ វុច្ចតិ. អនិច្ចញ្ញេវ, ភិក្ខវេ, ភិក្ខុ វេទនំ អនិច្ចន្តិ បស្សតិ. សាស្ស ហោតិ សម្មាទិដ្ឋិ. សម្មា បស្សំ និព្ពិន្ទតិ. នន្ទិក្ខយា រាគក្ខយោ, រាគក្ខយា នន្ទិក្ខយោ. នន្ទិរាគក្ខយា ចិត្តំ វិមុត្តំ សុវិមុត្តន្តិ វុច្ចតិ. អនិច្ចេយេវ, ភិក្ខវេ, ភិក្ខុ សញ្ញំ អនិច្ចន្តិ បស្សតិ…បេ… អនិច្ចេយេវ ភិក្ខវេ, ភិក្ខុ សង្ខារេ អនិច្ចាតិ បស្សតិ. សាស្ស ហោតិ សម្មាទិដ្ឋិ. សម្មា បស្សំ និព្ពិន្ទតិ. នន្ទិក្ខយា រាគក្ខយោ, រាគក្ខយា នន្ទិក្ខយោ. នន្ទិរាគក្ខយា ចិត្តំ វិមុត្តំ សុវិមុត្តន្តិ វុច្ចតិ. អនិច្ចញ្ញេវ, ភិក្ខវេ, ភិក្ខុ វិញ្ញាណំ អនិច្ចន្តិ បស្សតិ. សាស្ស ហោតិ សម្មាទិដ្ឋិ. សម្មា បស្សំ និព្ពិន្ទតិ. នន្ទិក្ខយា រាគក្ខយោ, រាគក្ខយា នន្ទិក្ខយោ. នន្ទិរាគក្ខយា ចិត្តំ វិមុត្តំ សុវិមុត្តន្តិ វុច្ចតី’’តិ. នវមំ.