៣. ភារវគ្គោ

១. ភារសុត្តំ

២២. សាវត្ថិយំ … តត្រ ខោ … ‘‘ភារញ្ច វោ, ភិក្ខវេ, ទេសេស្សាមិ ភារហារញ្ច ភារាទានញ្ច ភារនិក្ខេបនញ្ច. តំ សុណាថ. កតមោ ច, ភិក្ខវេ, ភារោ? បញ្ចុបាទានក្ខន្ធា តិស្ស វចនីយំ. កតមេ បញ្ច? រូបុបាទានក្ខន្ធោ, វេទនុបាទានក្ខន្ធោ, សញ្ញុបាទានក្ខន្ធោ, សង្ខារុបាទានក្ខន្ធោ, វិញ្ញាណុបាទានក្ខន្ធោ; អយំ វុច្ចតិ, ភិក្ខវេ, ភារោ’’.

‘‘កតមោ ច, ភិក្ខវេ, ភារហារោ? បុគ្គលោ តិស្ស វចនីយំ. យ្វាយំ អាយស្មា ឯវំនាមោ ឯវំគោត្តោ; អយំ វុច្ចតិ, ភិក្ខវេ, ភារហារោ.

‘‘កតមញ្ច, ភិក្ខវេ, ភារាទានំ? យាយំ តណ្ហា បោនោភវិកា [បោនោព្ភវិកា (ស្យា. កំ. ក.)] នន្ទីរាគសហគតា [នន្ទិរាគសហគតា (សព្ពត្ថ)] តត្រតត្រាភិនន្ទិនី, សេយ្យថិទំ – កាមតណ្ហា, ភវតណ្ហា, វិភវតណ្ហា. ឥទំ វុច្ចតិ, ភិក្ខវេ, ភារាទានំ.

‘‘កតមញ្ច, ភិក្ខវេ, ភារនិក្ខេបនំ? យោ តស្សាយេវ តណ្ហាយ អសេសវិរាគនិរោធោ ចាគោ បដិនិស្សគ្គោ មុត្តិ អនាលយោ. ឥទំ វុច្ចតិ, ភិក្ខវេ, ភារនិក្ខេបន’’ន្តិ.

ឥទមវោច ភគវា. ឥទំ វត្វាន [វត្វា (សី.) ឯវមីទិសេសុ ឋានេសុ] សុគតោ អថាបរំ ឯតទវោច សត្ថា –

‘‘ភារា ហវេ បញ្ចក្ខន្ធា, ភារហារោ ច បុគ្គលោ;

ភារាទានំ ទុខំ លោកេ, ភារនិក្ខេបនំ សុខំ.

‘‘និក្ខិបិត្វា គរុំ ភារំ, អញ្ញំ ភារំ អនាទិយ;

សមូលំ តណ្ហមព្ពុយ្ហ [តណ្ហមព្ភុយ្ហ (បី. ក.)], និច្ឆាតោ បរិនិព្ពុតោ’’តិ. បឋមំ;

២. បរិញ្ញសុត្តំ

២៣. សាវត្ថិនិទានំ. ‘‘បរិញ្ញេយ្យេ ច, ភិក្ខវេ, ធម្មេ ទេសេស្សាមិ បរិញ្ញញ្ច. តំ សុណាថ. កតមេ ច, ភិក្ខវេ, បរិញ្ញេយ្យា ធម្មា? រូបំ, ភិក្ខវេ, បរិញ្ញេយ្យោ ធម្មោ, វេទនា បរិញ្ញេយ្យោ ធម្មោ, សញ្ញា បរិញ្ញេយ្យោ ធម្មោ, សង្ខារា បរិញ្ញេយ្យោ ធម្មោ, វិញ្ញាណំ បរិញ្ញេយ្យោ ធម្មោ. ឥមេ វុច្ចន្តិ, ភិក្ខវេ, បរិញ្ញេយ្យា ធម្មា. កតមា ច, ភិក្ខវេ, បរិញ្ញា? យោ, ភិក្ខវេ, រាគក្ខយោ ទោសក្ខយោ មោហក្ខយោ. អយំ វុច្ចតិ, ភិក្ខវេ, បរិញ្ញា’’តិ. ទុតិយំ.

៣. អភិជានសុត្តំ

២៤. សាវត្ថិនិទានំ. ‘‘រូបំ, ភិក្ខវេ, អនភិជានំ អបរិជានំ អវិរាជយំ អប្បជហំ អភព្ពោ ទុក្ខក្ខយាយ; វេទនំ អនភិជានំ អបរិជានំ អវិរាជយំ អប្បជហំ អភព្ពោ ទុក្ខក្ខយាយ; សញ្ញំ អនភិជានំ… សង្ខារេ អនភិជានំ អបរិជានំ អវិរាជយំ អប្បជហំ អភព្ពោ ទុក្ខក្ខយាយ; វិញ្ញាណំ អនភិជានំ អបរិជានំ អវិរាជយំ អប្បជហំ អភព្ពោ ទុក្ខក្ខយាយ. រូបញ្ច ខោ, ភិក្ខវេ, អភិជានំ បរិជានំ វិរាជយំ បជហំ ភព្ពោ ទុក្ខក្ខយាយ; វេទនំ អភិជានំ… សញ្ញំ… សង្ខារេ… វិញ្ញាណំ អភិជានំ បរិជានំ វិរាជយំ បជហំ ភព្ពោ ទុក្ខក្ខយាយា’’តិ. តតិយំ.

៤. ឆន្ទរាគសុត្តំ

២៥. សាវត្ថិនិទានំ. ‘‘យោ, ភិក្ខវេ, រូបស្មិំ ឆន្ទរាគោ តំ បជហថ. ឯវំ តំ រូបំ បហីនំ ភវិស្សតិ ឧច្ឆិន្នមូលំ តាលាវត្ថុកតំ អនភាវំកតំ អាយតិំ អនុប្បាទធម្មំ. យោ វេទនាយ ឆន្ទរាគោ តំ បជហថ. ឯវំ សា វេទនា បហីនា ភវិស្សតិ ឧច្ឆិន្នមូលា តាលាវត្ថុកតា អនភាវំកតា អាយតិំ អនុប្បាទធម្មា. យោ សញ្ញាយ ឆន្ទរាគោ តំ បជហថ. ឯវំ សា សញ្ញា បហីនា ភវិស្សតិ ឧច្ឆិន្នមូលា តាលាវត្ថុកតា អនភាវំកតា អាយតិំ អនុប្បាទធម្មា. យោ សង្ខារេសុ ឆន្ទរាគោ តំ បជហថ. ឯវំ តេ សង្ខារា បហីនា ភវិស្សន្តិ ឧច្ឆិន្នមូលា តាលាវត្ថុកតា អនភាវំកតា អាយតិំ អនុប្បាទធម្មា. យោ វិញ្ញាណស្មិំ ឆន្ទរាគោ តំ បជហថ. ឯវំ តំ វិញ្ញាណំ បហីនំ ភវិស្សតិ ឧច្ឆិន្នមូលំ តាលាវត្ថុកតំ អនភាវំកតំ អាយតិំ អនុប្បាទធម្ម’’ន្តិ. ចតុត្ថំ.

៥. អស្សាទសុត្តំ

២៦. សាវត្ថិនិទានំ. ‘‘បុព្ពេវ [បុព្ពេ (បី. ក.)] មេ, ភិក្ខវេ, សម្ពោធា អនភិសម្ពុទ្ធស្ស ពោធិសត្តស្សេវ [ពោធិសត្តស្ស (បី. ក.)] សតោ ឯតទហោសិ – ‘កោ នុ ខោ រូបស្ស អស្សាទោ, កោ អាទីនវោ, កិំ និស្សរណំ? កោ វេទនាយ អស្សាទោ, កោ អាទីនវោ, កិំ និស្សរណំ? កោ សញ្ញាយ អស្សាទោ, កោ អាទីនវោ, កិំ និស្សរណំ? កោ សង្ខារានំ អស្សាទោ, កោ អាទីនវោ, កិំ និស្សរណំ? កោ វិញ្ញាណស្ស អស្សាទោ, កោ អាទីនវោ, កិំ និស្សរណ’ន្តិ? តស្ស មយ្ហំ, ភិក្ខវេ, ឯតទហោសិ – ‘យំ ខោ រូបំ បដិច្ច ឧប្បជ្ជតិ សុខំ សោមនស្សំ, អយំ រូបស្ស អស្សាទោ. យំ រូបំ អនិច្ចំ ទុក្ខំ វិបរិណាមធម្មំ, អយំ រូបស្ស អាទីនវោ. យោ រូបស្មិំ ឆន្ទរាគវិនយោ ឆន្ទរាគប្បហានំ, ឥទំ រូបស្ស និស្សរណំ. យំ វេទនំ បដិច្ច ឧប្បជ្ជតិ សុខំ សោមនស្សំ, អយំ វេទនាយ អស្សាទោ [យា (ក.)]. យំ វេទនា អនិច្ចា ទុក្ខា វិបរិណាមធម្មា, អយំ វេទនាយ អាទីនវោ. យោ វេទនាយ ឆន្ទរាគវិនយោ ឆន្ទរាគប្បហានំ, ឥទំ វេទនាយ និស្សរណំ. យំ សញ្ញំ បដិច្ច ឧប្បជ្ជតិ…បេ… យំ សង្ខារេ បដិច្ច ឧប្បជ្ជតិ សុខំ សោមនស្សំ, អយំ សង្ខារានំ អស្សាទោ. យំ [យេ (សី. ក.)] សង្ខារា អនិច្ចា ទុក្ខា វិបរិណាមធម្មា, អយំ សង្ខារានំ អាទីនវោ. យោ សង្ខារេសុ ឆន្ទរាគវិនយោ ឆន្ទរាគប្បហានំ, ឥទំ សង្ខារានំ និស្សរណំ. យំ វិញ្ញាណំ បដិច្ច ឧប្បជ្ជតិ សុខំ សោមនស្សំ, អយំ វិញ្ញាណស្ស អស្សាទោ. យំ វិញ្ញាណំ អនិច្ចំ ទុក្ខំ វិបរិណាមធម្មំ, អយំ វិញ្ញាណស្ស អាទីនវោ. យោ វិញ្ញាណស្មិំ ឆន្ទរាគវិនយោ ឆន្ទរាគប្បហានំ, ឥទំ វិញ្ញាណស្ស និស្សរណំ’’’.

‘‘យាវកីវញ្ចាហំ, ភិក្ខវេ, ឥមេសំ បញ្ចន្នំ ឧបាទានក្ខន្ធានំ ឯវំ អស្សាទញ្ច អស្សាទតោ អាទីនវញ្ច អាទីនវតោ និស្សរណញ្ច និស្សរណតោ យថាភូតំ នាព្ភញ្ញាសិំ, នេវ តាវាហំ, ភិក្ខវេ, សទេវកេ លោកេ សមារកេ សព្រហ្មកេ សស្សមណព្រាហ្មណិយា បជាយ សទេវមនុស្សាយ អនុត្តរំ សម្មាសម្ពោធិំ អភិសម្ពុទ្ធោតិ បច្ចញ្ញាសិំ [អភិសម្ពុទ្ធោ (សី.)]. យតោ ច ខ្វាហំ, ភិក្ខវេ, ឥមេសំ បញ្ចន្នំ ឧបាទានក្ខន្ធានំ ឯវំ អស្សាទញ្ច អស្សាទតោ អាទីនវញ្ច អាទីនវតោ និស្សរណញ្ច និស្សរណតោ យថាភូតំ អព្ភញ្ញាសិំ; អថាហំ, ភិក្ខវេ, សទេវកេ លោកេ សមារកេ សព្រហ្មកេ សស្សមណព្រាហ្មណិយា បជាយ សទេវមនុស្សាយ អនុត្តរំ សម្មាសម្ពោធិំ អភិសម្ពុទ្ធោតិ បច្ចញ្ញាសិំ. ញាណញ្ច បន មេ ទស្សនំ ឧទបាទិ – ‘អកុប្បា មេ វិមុត្តិ [ចេតោវិមុត្តិ (សី. បី. ក.)]; អយមន្តិមា ជាតិ; នត្ថិ ទានិ បុនព្ភវោ’’’តិ. បញ្ចមំ.

៦. ទុតិយអស្សាទសុត្តំ

២៧. សាវត្ថិនិទានំ. ‘‘រូបស្សាហំ, ភិក្ខវេ, អស្សាទបរិយេសនំ អចរិំ. យោ រូបស្ស អស្សាទោ តទជ្ឈគមំ. យាវតា រូបស្ស អស្សាទោ បញ្ញាយ មេ សោ សុទិដ្ឋោ. រូបស្សាហំ, ភិក្ខវេ, អាទីនវបរិយេសនំ អចរិំ. យោ រូបស្ស អាទីនវោ តទជ្ឈគមំ. យាវតា រូបស្ស អាទីនវោ បញ្ញាយ មេ សោ សុទិដ្ឋោ. រូបស្សាហំ, ភិក្ខវេ, និស្សរណបរិយេសនំ អចរិំ. យំ រូបស្ស និស្សរណំ តទជ្ឈគមំ. យាវតា រូបស្ស និស្សរណំ បញ្ញាយ មេ តំ សុទិដ្ឋំ. វេទនាយាហំ, ភិក្ខវេ… សញ្ញាយាហំ, ភិក្ខវេ… សង្ខារានាហំ, ភិក្ខវេ… វិញ្ញាណស្សាហំ, ភិក្ខវេ, អស្សាទបរិយេសនំ អចរិំ. យោ វិញ្ញាណស្ស អស្សាទោ តទជ្ឈគមំ. យាវតា វិញ្ញាណស្ស អស្សាទោ បញ្ញាយ មេ សោ សុទិដ្ឋោ. វិញ្ញាណស្សាហំ, ភិក្ខវេ, អាទីនវបរិយេសនំ អចរិំ. យោ វិញ្ញាណស្ស អាទីនវោ តទជ្ឈគមំ. យាវតា វិញ្ញាណស្ស អាទីនវោ បញ្ញាយ មេ សោ សុទិដ្ឋោ. វិញ្ញាណស្សាហំ, ភិក្ខវេ, និស្សរណបរិយេសនំ អចរិំ. យំ វិញ្ញាណស្ស និស្សរណំ តទជ្ឈគមំ. យាវតា វិញ្ញាណស្ស និស្សរណំ បញ្ញាយ មេ តំ សុទិដ្ឋំ. យាវកីវញ្ចាហំ, ភិក្ខវេ, ឥមេសំ បញ្ចន្នំ ឧបាទានក្ខន្ធានំ អស្សាទញ្ច អស្សាទតោ អាទីនវញ្ច អាទីនវតោ និស្សរណញ្ច និស្សរណតោ យថាភូតំ នាព្ភញ្ញាសិំ…បេ… អព្ភញ្ញាសិំ. ញាណញ្ច បន មេ ទស្សនំ ឧទបាទិ – ‘អកុប្បា មេ វិមុត្តិ [ចេតោវិមុត្តិ (សី. បី. ក.)]; អយមន្តិមា ជាតិ; នត្ថិ ទានិ បុនព្ភវោ’’’តិ. ឆដ្ឋំ.

៧. តតិយអស្សាទសុត្តំ

២៨. សាវត្ថិនិទានំ. ‘‘នោ ចេទំ, ភិក្ខវេ, រូបស្ស អស្សាទោ អភវិស្ស នយិទំ សត្តា រូបស្មិំ សារជ្ជេយ្យុំ. យស្មា ច ខោ, ភិក្ខវេ, អត្ថិ រូបស្ស អស្សាទោ, តស្មា សត្តា រូបស្មិំ សារជ្ជន្តិ. នោ ចេទំ, ភិក្ខវេ, រូបស្ស អាទីនវោ អភវិស្ស នយិទំ សត្តា រូបស្មិំ និព្ពិន្ទេយ្យុំ. យស្មា ច ខោ, ភិក្ខវេ, អត្ថិ រូបស្ស អាទីនវោ, តស្មា សត្តា រូបស្មិំ និព្ពិន្ទន្តិ. នោ ចេទំ, ភិក្ខវេ, រូបស្ស និស្សរណំ អភវិស្ស នយិទំ សត្តា រូបស្មា និស្សរេយ្យុំ. យស្មា ច ខោ, ភិក្ខវេ, អត្ថិ រូបស្ស និស្សរណំ, តស្មា សត្តា រូបស្មា និស្សរន្តិ. នោ ចេទំ, ភិក្ខវេ, វេទនាយ…បេ… នោ ចេទំ, ភិក្ខវេ, សញ្ញាយ… នោ ចេទំ, ភិក្ខវេ, សង្ខារានំ និស្សរណំ អភវិស្ស, នយិទំ សត្តា សង្ខារេហិ និស្សរេយ្យុំ. យស្មា ច ខោ, ភិក្ខវេ, អត្ថិ សង្ខារានំ និស្សរណំ, តស្មា សត្តា សង្ខារេហិ និស្សរន្តិ. នោ ចេទំ, ភិក្ខវេ, វិញ្ញាណស្ស អស្សាទោ អភវិស្ស, នយិទំ សត្តា វិញ្ញាណស្មិំ សារជ្ជេយ្យុំ. យស្មា ច ខោ, ភិក្ខវេ, អត្ថិ វិញ្ញាណស្ស អស្សាទោ, តស្មា សត្តា វិញ្ញាណស្មិំ សារជ្ជន្តិ. នោ ចេទំ, ភិក្ខវេ, វិញ្ញាណស្ស អាទីនវោ អភវិស្ស, នយិទំ សត្តា វិញ្ញាណស្មិំ និព្ពិន្ទេយ្យុំ. យស្មា ច ខោ, ភិក្ខវេ, អត្ថិ វិញ្ញាណស្ស អាទីនវោ, តស្មា សត្តា វិញ្ញាណស្មិំ និព្ពិន្ទន្តិ. នោ ចេទំ, ភិក្ខវេ, វិញ្ញាណស្ស និស្សរណំ អភវិស្ស, នយិទំ សត្តា វិញ្ញាណស្មា និស្សរេយ្យុំ. យស្មា ច ខោ, ភិក្ខវេ, អត្ថិ វិញ្ញាណស្ស និស្សរណំ, តស្មា សត្តា វិញ្ញាណស្មា និស្សរន្តិ.

‘‘យាវកីវញ្ច, ភិក្ខវេ, សត្តា ឥមេសំ បញ្ចន្នំ ឧបាទានក្ខន្ធានំ អស្សាទញ្ច អស្សាទតោ អាទីនវញ្ច អាទីនវតោ និស្សរណញ្ច និស្សរណតោ យថាភូតំ នាព្ភញ្ញំសុ [នាព្ភញ្ញិំសុ (សី.)]; នេវ តាវ, ភិក្ខវេ, សត្តា សទេវកា លោកា សមារកា សព្រហ្មកា សស្សមណព្រាហ្មណិយា បជាយ សទេវមនុស្សាយ និស្សដា វិសំយុត្តា វិប្បមុត្តា វិមរិយាទីកតេន ចេតសា វិហរិំសុ. យតោ ច ខោ, ភិក្ខវេ, សត្តា ឥមេសំ បញ្ចន្នំ ឧបាទានក្ខន្ធានំ អស្សាទញ្ច អស្សាទតោ អាទីនវញ្ច អាទីនវតោ និស្សរណញ្ច និស្សរណតោ យថាភូតំ អព្ភញ្ញំសុ; អថ, ភិក្ខវេ, សត្តា សទេវកា លោកា សមារកា សព្រហ្មកា សស្សមណព្រាហ្មណិយា បជាយ សទេវមនុស្សាយ និស្សដា វិសំយុត្តា វិប្បមុត្តា វិមរិយាទីកតេន ចេតសា វិហរន្តិ’’. សត្តមំ.

៨. អភិនន្ទនសុត្តំ

២៩. សាវត្ថិនិទានំ. ‘‘យោ, ភិក្ខវេ, រូបំ អភិនន្ទតិ, ទុក្ខំ សោ អភិនន្ទតិ. យោ ទុក្ខំ អភិនន្ទតិ, អបរិមុត្តោ សោ ទុក្ខស្មាតិ វទាមិ. យោ វេទនំ អភិនន្ទតិ… យោ សញ្ញំ អភិនន្ទតិ… យោ សង្ខារេ អភិនន្ទតិ… យោ វិញ្ញាណំ អភិនន្ទតិ, ទុក្ខំ សោ អភិនន្ទតិ. យោ ទុក្ខំ អភិនន្ទតិ, អបរិមុត្តោ សោ ទុក្ខស្មាតិ វទាមិ. យោ ច ខោ, ភិក្ខវេ, រូបំ នាភិនន្ទតិ, ទុក្ខំ សោ នាភិនន្ទតិ. យោ ទុក្ខំ នាភិនន្ទតិ, បរិមុត្តោ សោ ទុក្ខស្មាតិ វទាមិ. យោ វេទនំ នាភិនន្ទតិ… យោ សញ្ញំ នាភិនន្ទតិ… យោ សង្ខារេ នាភិនន្ទតិ… យោ វិញ្ញាណំ នាភិនន្ទតិ, ទុក្ខំ សោ នាភិនន្ទតិ. យោ ទុក្ខំ នាភិនន្ទតិ, បរិមុត្តោ សោ ទុក្ខស្មាតិ វទាមី’’តិ. អដ្ឋមំ.

៩. ឧប្បាទសុត្តំ

៣០. សាវត្ថិនិទានំ. ‘‘យោ, ភិក្ខវេ, រូបស្ស ឧប្បាទោ ឋិតិ អភិនិព្ពត្តិ បាតុភាវោ, ទុក្ខស្សេសោ ឧប្បាទោ រោគានំ ឋិតិ ជរាមរណស្ស បាតុភាវោ. យោ វេទនាយ…បេ… យោ សញ្ញាយ…បេ… យោ សង្ខារានំ…បេ… យោ វិញ្ញាណស្ស ឧប្បាទោ ឋិតិ អភិនិព្ពត្តិ បាតុភាវោ, ទុក្ខស្សេសោ ឧប្បាទោ រោគានំ ឋិតិ ជរាមរណស្ស បាតុភាវោ. យោ ច ខោ, ភិក្ខវេ, រូបស្ស និរោធោ វូបសមោ អត្ថង្គមោ, ទុក្ខស្សេសោ និរោធោ រោគានំ វូបសមោ ជរាមរណស្ស អត្ថង្គមោ. យោ វេទនាយ …បេ… យោ សញ្ញាយ… យោ សង្ខារានំ… យោ វិញ្ញាណស្ស និរោធោ វូបសមោ អត្ថង្គមោ, ទុក្ខស្សេសោ និរោធោ រោគានំ វូបសមោ ជរាមរណស្ស អត្ថង្គមោ’’តិ. នវមំ.

១០. អឃមូលសុត្តំ

៣១. សាវត្ថិនិទានំ. ‘‘អឃញ្ច, ភិក្ខវេ, ទេសេស្សាមិ អឃមូលញ្ច. តំ សុណាថ. កតមញ្ច ភិក្ខវេ អឃំ? រូបំ, ភិក្ខវេ, អឃំ, វេទនា អឃំ, សញ្ញា អឃំ, សង្ខារា អឃំ, វិញ្ញាណំ អឃំ. ឥទំ វុច្ចតិ, ភិក្ខវេ, អឃំ. កតមញ្ច, ភិក្ខវេ, អឃមូលំ? យាយំ តណ្ហា បោនោភវិកា នន្ទីរាគសហគតា [នន្ទិរាគសហគតា (សព្ពត្ថ)] តត្រតត្រាភិនន្ទិនី; សេយ្យថិទំ – កាមតណ្ហា, ភវតណ្ហា, វិភវតណ្ហា. ឥទំ វុច្ចតិ, ភិក្ខវេ, អឃមូល’’ន្តិ. ទសមំ.

១១. បភង្គុសុត្តំ

៣២. សាវត្ថិនិទានំ. ‘‘បភង្គុញ្ច, ភិក្ខវេ, ទេសេស្សាមិ អប្បភង្គុញ្ច. តំ សុណាថ. កិញ្ច, ភិក្ខវេ, បភង្គុ, កិំ អប្បភង្គុ? រូបំ, ភិក្ខវេ, បភង្គុ. យោ តស្ស និរោធោ វូបសមោ អត្ថង្គមោ, ឥទំ អប្បភង្គុ. វេទនា បភង្គុ. យោ តស្សា និរោធោ វូបសមោ អត្ថង្គមោ, ឥទំ អប្បភង្គុ. សញ្ញា បភង្គុ… សង្ខារា បភង្គុ. យោ តេសំ និរោធោ វូបសមោ អត្ថង្គមោ, ឥទំ អប្បភង្គុ. វិញ្ញាណំ បភង្គុ. យោ តស្ស និរោធោ វូបសមោ អត្ថង្គមោ, ឥទំ អប្បភង្គូ’’តិ. ឯកាទសមំ.

ភារវគ្គោ តតិយោ.

តស្សុទ្ទានំ –

ភារំ បរិញ្ញំ អភិជានំ, ឆន្ទរាគំ ចតុត្ថកំ;

អស្សាទា ច តយោ វុត្តា, អភិនន្ទនមដ្ឋមំ;

ឧប្បាទំ អឃមូលញ្ច, ឯកាទសមោ បភង្គូតិ.