២. ទុតិយសមុទយធម្មសុត្តំ

១២៧. ឯកំ សមយំ អាយស្មា ច សារិបុត្តោ អាយស្មា ច មហាកោដ្ឋិកោ ពារាណសិយំ វិហរន្តិ ឥសិបតនេ មិគទាយេ. អថ ខោ អាយស្មា មហាកោដ្ឋិកោ សាយន្ហសមយំ បដិសល្លានា វុដ្ឋិតោ…បេ… ឯកមន្តំ និសិន្នោ ខោ អាយស្មា មហាកោដ្ឋិកោ អាយស្មន្តំ សារិបុត្តំ ឯតទវោច – ‘‘‘អវិជ្ជា, អវិជ្ជា’តិ, អាវុសោ សារិបុត្ត, វុច្ចតិ. កតមា នុ ខោ, អាវុសោ, អវិជ្ជា, កិត្តាវតា ច អវិជ្ជាគតោ ហោតី’’តិ?

‘‘ឥធាវុសោ អស្សុតវា បុថុជ្ជនោ សមុទយធម្មំ រូបំ ‘សមុទយធម្មំ រូប’ន្តិ យថាភូតំ នប្បជានាតិ; វយធម្មំ រូបំ…បេ… ‘សមុទយវយធម្មំ រូប’ន្តិ យថាភូតំ នប្បជានាតិ. សមុទយធម្មំ វេទនំ…បេ… វយធម្មំ វេទនំ…បេ… ‘សមុទយវយធម្មា វេទនា’តិ យថាភូតំ នប្បជានាតិ. សមុទយធម្មំ សញ្ញំ…បេ… សមុទយធម្មេ សង្ខារេ…បេ… វយធម្មេ សង្ខារេ…បេ… សមុទយវយធម្មេ សង្ខារេ ‘សមុទយវយធម្មា សង្ខារា’តិ យថាភូតំ នប្បជានាតិ. សមុទយធម្មំ វិញ្ញាណំ…បេ… សមុទយវយធម្មំ វិញ្ញាណំ ‘សមុទយវយធម្មំ វិញ្ញាណ’ន្តិ យថាភូតំ នប្បជានាតិ. អយំ វុច្ចតិ, អាវុសោ, អវិជ្ជា; ឯត្តាវតា ច អវិជ្ជាគតោ ហោតី’’តិ. ទុតិយំ.