៧. ឧប្បាទសុត្តំ

១២០. សាវត្ថិយំ វិហរតិ…បេ… ‘‘យោ, ភិក្ខវេ, បថវីធាតុយា ឧប្បាទោ ឋិតិ អភិនិព្ពត្តិ បាតុភាវោ, ទុក្ខស្សេសោ ឧប្បាទោ រោគានំ ឋិតិ ជរាមរណស្ស បាតុភាវោ. យោ អាបោធាតុយា…បេ… យោ តេជោធាតុយា… យោ វាយោធាតុយា ឧប្បាទោ ឋិតិ អភិនិព្ពត្តិ បាតុភាវោ, ទុក្ខស្សេសោ ឧប្បាទោ រោគានំ ឋិតិ ជរាមរណស្ស បាតុភាវោ’’.

‘‘យោ ច ខោ, ភិក្ខវេ, បថវីធាតុយា និរោធោ វូបសមោ អត្ថង្គមោ, ទុក្ខស្សេសោ និរោធោ រោគានំ វូបសមោ ជរាមរណស្ស អត្ថង្គមោ. យោ អាបោធាតុយា…បេ… យោ តេជោធាតុយា… យោ វាយោធាតុយា និរោធោ វូបសមោ អត្ថង្គមោ, ទុក្ខស្សេសោ និរោធោ រោគានំ វូបសមោ ជរាមរណស្ស អត្ថង្គមោ’’តិ. សត្តមំ.