៦. អញ្ញតរព្រាហ្មណសុត្តំ

៤៦. សាវត្ថិយំ វិហរតិ. អថ ខោ អញ្ញតរោ ព្រាហ្មណោ យេន ភគវា តេនុបសង្កមិ; ឧបសង្កមិត្វា ភគវតា សទ្ធិំ សម្មោទិ. សម្មោទនីយំ កថំ សារណីយំ វីតិសារេត្វា ឯកមន្តំ និសីទិ. ឯកមន្តំ និសិន្នោ ខោ សោ ព្រាហ្មណោ ភគវន្តំ ឯតទវោច –

‘‘កិំ នុ ខោ, ភោ គោតម, សោ ករោតិ សោ បដិសំវេទយតី’’តិ? ‘‘‘សោ ករោតិ សោ បដិសំវេទយតី’តិ ខោ, ព្រាហ្មណ, អយមេកោ អន្តោ’’.

‘‘កិំ បន, ភោ គោតម, អញ្ញោ ករោតិ, អញ្ញោ បដិសំវេទយតី’’តិ? ‘‘‘អញ្ញោ ករោតិ, អញ្ញោ បដិសំវេទយតី’តិ ខោ, ព្រាហ្មណ, អយំ ទុតិយោ អន្តោ. ឯតេ តេ, ព្រាហ្មណ, ឧភោ អន្តេ អនុបគម្ម មជ្ឈេន តថាគតោ ធម្មំ ទេសេតិ – ‘អវិជ្ជាបច្ចយា សង្ខារា; សង្ខារបច្ចយា វិញ្ញាណំ…បេ… ឯវមេតស្ស កេវលស្ស ទុក្ខក្ខន្ធស្ស សមុទយោ ហោតិ. អវិជ្ជាយ ត្វេវ អសេសវិរាគនិរោធា សង្ខារនិរោធោ; សង្ខារនិរោធា វិញ្ញាណនិរោធោ …បេ… ឯវមេតស្ស កេវលស្ស ទុក្ខក្ខន្ធស្ស និរោធោ ហោតី’’’តិ.

ឯវំ វុត្តេ, សោ ព្រាហ្មណោ ភគវន្តំ ឯតទវោច – ‘‘អភិក្កន្តំ, ភោ គោតម, អភិក្កន្តំ, ភោ គោតម,…បេ… ឧបាសកំ មំ ភវំ គោតមោ ធារេតុ អជ្ជតគ្គេ បាណុបេតំ សរណំ គត’’ន្តិ. ឆដ្ឋំ.