១១. គគ្គរាសុត្តំ

២១៩. ឯកំ សមយំ ភគវា ចម្បាយំ វិហរតិ គគ្គរាយ បោក្ខរណិយា តីរេ មហតា ភិក្ខុសង្ឃេន សទ្ធិំ បញ្ចមត្តេហិ ភិក្ខុសតេហិ សត្តហិ ច ឧបាសកសតេហិ សត្តហិ ច ឧបាសិកាសតេហិ អនេកេហិ ច ទេវតាសហស្សេហិ. ត្យាស្សុទំ ភគវា អតិរោចតិ [អតិវិរោចតិ (ក.)] វណ្ណេន ចេវ យសសា ច. អថ ខោ អាយស្មតោ វង្គីសស្ស ឯតទហោសិ – ‘‘អយំ ខោ ភគវា ចម្បាយំ វិហរតិ គគ្គរាយ បោក្ខរណិយា តីរេ មហតា ភិក្ខុសង្ឃេន សទ្ធិំ បញ្ចមត្តេហិ ភិក្ខុសតេហិ សត្តហិ ច ឧបាសកសតេហិ សត្តហិ ច ឧបាសិកាសតេហិ អនេកេហិ ច ទេវតាសហស្សេហិ. ត្យាស្សុទំ ភគវា អតិរោចតិ វណ្ណេន ចេវ យសសា ច. យំនូនាហំ ភគវន្តំ សម្មុខា សារុប្បាយ គាថាយ អភិត្ថវេយ្យ’’ន្តិ.

អថ ខោ អាយស្មា វង្គីសោ ឧដ្ឋាយាសនា ឯកំសំ ឧត្តរាសង្គំ ករិត្វា យេន ភគវា តេនញ្ជលិំ បណាមេត្វា ភគវន្តំ ឯតទវោច – ‘‘បដិភាតិ មំ, ភគវា, បដិភាតិ មំ, សុគតា’’តិ. ‘‘បដិភាតុ តំ, វង្គីសា’’តិ ភគវា អវោច. អថ ខោ អាយស្មា វង្គីសោ ភគវន្តំ សម្មុខា សារុប្បាយ គាថាយ អភិត្ថវិ –

‘‘ចន្ទោ យថា វិគតវលាហកេ នភេ,

វិរោចតិ វិគតមលោវ ភាណុមា;

ឯវម្បិ អង្គីរស ត្វំ មហាមុនិ,

អតិរោចសិ យសសា សព្ពលោក’’ន្តិ.