១២. វង្គីសសុត្តំ

២២០. ឯកំ សមយំ អាយស្មា វង្គីសោ សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តេន ខោ បន សមយេន អាយស្មា វង្គីសោ អចិរអរហត្តប្បត្តោ ហុត្វា [ហោតិ (សី. ស្យា. កំ.)] វិមុត្តិសុខំ បដិសំវេទី [វិមុត្តិសុខបដិសំវេទី (សី. បី.)] តាយំ វេលាយំ ឥមា គាថាយោ អភាសិ –

‘‘កាវេយ្យមត្តា វិចរិម្ហ បុព្ពេ, គាមា គាមំ បុរា បុរំ;

អថទ្ទសាម សម្ពុទ្ធំ, សទ្ធា នោ ឧបបជ្ជថ.

‘‘សោ មេ ធម្មមទេសេសិ, ខន្ធាយតនធាតុយោ [ខន្ធេ អាយតនានិ ធាតុយោ (ស្យា. កំ. បី. ក.)];

តស្សាហំ ធម្មំ សុត្វាន, បព្ពជិំ អនគារិយំ.

‘‘ពហុន្នំ វត អត្ថាយ, ពោធិំ អជ្ឈគមា មុនិ;

ភិក្ខូនំ ភិក្ខុនីនញ្ច, យេ និយាមគតទ្ទសា.

‘‘ស្វាគតំ វត មេ អាសិ, មម ពុទ្ធស្ស សន្តិកេ;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

‘‘បុព្ពេនិវាសំ ជានាមិ, ទិព្ពចក្ខុំ វិសោធិតំ;

តេវិជ្ជោ ឥទ្ធិបត្តោម្ហិ, ចេតោបរិយាយកោវិទោ’’តិ.

វង្គីសសំយុត្តំ សមត្តំ.