៥. ឧប្បលវណ្ណាសុត្តំ

១៦៦. សាវត្ថិនិទានំ. អថ ខោ ឧប្បលវណ្ណា ភិក្ខុនី បុព្ពណ្ហសមយំ និវាសេត្វា…បេ… អញ្ញតរស្មិំ សុបុប្ផិតសាលរុក្ខមូលេ អដ្ឋាសិ. អថ ខោ មារោ បាបិមា ឧប្បលវណ្ណាយ ភិក្ខុនិយា ភយំ ឆម្ភិតត្តំ លោមហំសំ ឧប្បាទេតុកាមោ សមាធិម្ហា ចាវេតុកាមោ យេន ឧប្បលវណ្ណា ភិក្ខុនី តេនុបសង្កមិ; ឧបសង្កមិត្វា ឧប្បលវណ្ណំ ភិក្ខុនិំ គាថាយ អជ្ឈភាសិ –

‘‘សុបុប្ផិតគ្គំ ឧបគម្ម ភិក្ខុនិ,

ឯកា តុវំ តិដ្ឋសិ សាលមូលេ;

ន ចត្ថិ តេ ទុតិយា វណ្ណធាតុ,

ពាលេ ន ត្វំ ភាយសិ ធុត្តកាន’’ន្តិ.

អថ ខោ ឧប្បលវណ្ណាយ ភិក្ខុនិយា ឯតទហោសិ – ‘‘កោ នុ ខ្វាយំ មនុស្សោ វា អមនុស្សោ វា គាថំ ភាសតី’’តិ? អថ ខោ ឧប្បលវណ្ណាយ ភិក្ខុនិយា ឯតទហោសិ – ‘‘មារោ ខោ អយំ បាបិមា មម ភយំ ឆម្ភិតត្តំ លោមហំសំ ឧប្បាទេតុកាមោ សមាធិម្ហា ចាវេតុកាមោ គាថំ ភាសតី’’តិ. អថ ខោ ឧប្បលវណ្ណា ភិក្ខុនី ‘‘មារោ អយំ បាបិមា’’ ឥតិ វិទិត្វា មារំ បាបិមន្តំ គាថាហិ បច្ចភាសិ –

‘‘សតំ សហស្សានិបិ ធុត្តកានំ,

ឥធាគតា តាទិសកា ភវេយ្យុំ;

លោមំ ន ឥញ្ជាមិ ន សន្តសាមិ,

ន មារ ភាយាមិ តមេកិកាបិ.

‘‘ឯសា អន្តរធាយាមិ, កុច្ឆិំ វា បវិសាមិ តេ;

បខុមន្តរិកាយម្បិ, តិដ្ឋន្តិំ មំ ន ទក្ខសិ.

‘‘ចិត្តស្មិំ វសីភូតាម្ហិ, ឥទ្ធិបាទា សុភាវិតា;

សព្ពពន្ធនមុត្តាម្ហិ, ន តំ ភាយាមិ អាវុសោ’’តិ.

អថ ខោ មារោ បាបិមា ‘‘ជានាតិ មំ ឧប្បលវណ្ណា ភិក្ខុនី’’តិ ទុក្ខី ទុម្មនោ តត្ថេវន្តរធាយីតិ.