៧. សុព្រហ្មសុត្តំ

៩៨. ឯកមន្តំ ឋិតោ ខោ សុព្រហ្មា ទេវបុត្តោ ភគវន្តំ គាថាយ អជ្ឈភាសិ –

‘‘និច្ចំ ឧត្រស្តមិទំ ចិត្តំ, និច្ចំ ឧព្ពិគ្គមិទំ [ឧព្ពិគ្គិទំ (មហាសតិបដ្ឋានសុត្តវណ្ណនាយំ)] មនោ;

អនុប្បន្នេសុ កិច្ឆេសុ [កិច្ចេសុ (ពហូសុ)], អថោ ឧប្បតិតេសុ ច;

សចេ អត្ថិ អនុត្រស្តំ, តំ មេ អក្ខាហិ បុច្ឆិតោ’’តិ.

‘‘នាញ្ញត្រ ពោជ្ឈា តបសា [ពោជ្ឈង្គតបសា (សី. ស្យា. កំ. បី.)], នាញ្ញត្រិន្ទ្រិយសំវរា;

នាញ្ញត្រ សព្ពនិស្សគ្គា, សោត្ថិំ បស្សាមិ បាណិន’’ន្តិ.

‘‘ឥទមវោច…បេ… តត្ថេវន្តរធាយី’’តិ.