៣. ទីឃលដ្ឋិសុត្តំ

៩៤. ឯវំ មេ សុតំ – ឯកំ សមយំ ភគវា រាជគហេ វិហរតិ វេឡុវនេ កលន្ទកនិវាបេ. អថ ខោ ទីឃលដ្ឋិ ទេវបុត្តោ អភិក្កន្តាយ រត្តិយា អភិក្កន្តវណ្ណោ កេវលកប្បំ វេឡុវនំ ឱភាសេត្វា យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ អដ្ឋាសិ. ឯកមន្តំ ឋិតោ ខោ ទីឃលដ្ឋិ ទេវបុត្តោ ភគវតោ សន្តិកេ ឥមំ គាថំ អភាសិ –

‘‘ភិក្ខុ សិយា ឈាយី វិមុត្តចិត្តោ,

អាកង្ខេ ចេ ហទយស្សានុបត្តិំ;

លោកស្ស ញត្វា ឧទយព្ពយញ្ច,

សុចេតសោ អនិស្សិតោ តទានិសំសោ’’តិ.