១១. សុនិក្ខិត្តវិមានវត្ថុ

១២៨២. ‘‘ឧច្ចមិទំ មណិថូណំ វិមានំ, សមន្តតោ ទ្វាទស យោជនានិ;

កូដាគារា សត្តសតា ឧឡារា, វេឡុរិយថម្ភា រុចកត្ថតា សុភា.

១២៨៣. ‘‘តត្ថច្ឆសិ បិវសិ ខាទសិ ច, ទិព្ពា ច វីណា បវទន្តិ វគ្គុំ;

ទិព្ពា រសា កាមគុណេត្ថ បញ្ច, នារិយោ ច នច្ចន្តិ សុវណ្ណឆន្នា.

១២៨៤. ‘‘កេន តេតាទិសោ វណ្ណោ, កេន តេ ឥធ មិជ្ឈតិ;

ឧប្បជ្ជន្តិ ច តេ ភោគា, យេ កេចិ មនសោ បិយា.

១២៨៥. ‘‘បុច្ឆាមិ ‘តំ ទេវ មហានុភាវ, មនុស្សភូតោ កិមកាសិ បុញ្ញំ;

កេនាសិ ឯវំ ជលិតានុភាវោ, វណ្ណោ ច តេ សព្ពទិសា បភាសតី’’តិ.

១២៨៦. សោ ទេវបុត្តោ អត្តមនោ, មោគ្គល្លានេន បុច្ឆិតោ;

បញ្ហំ បុដ្ឋោ វិយាកាសិ, យស្ស កម្មស្សិទំ ផលំ.

១២៨៧. ‘‘ទុន្និក្ខិត្តំ មាលំ សុនិក្ខិបិត្វា, បតិដ្ឋបេត្វា សុគតស្ស ថូបេ;

មហិទ្ធិកោ ចម្ហិ មហានុភាវោ, ទិព្ពេហិ កាមេហិ សមង្គិភូតោ.

១២៨៨. ‘‘តេន មេតាទិសោ វណ្ណោ,

តេន មេ ឥធ មិជ្ឈតិ;

ឧប្បជ្ជន្តិ ច មេ ភោគា,

យេ កេចិ មនសោ បិយា.

១២៨៩. ‘‘អក្ខាមិ តេ ភិក្ខុ មហានុភាវ,

មនុស្សភូតោ យមហំ អកាសិំ;

តេនម្ហិ ឯវំ ជលិតានុភាវោ,

វណ្ណោ ច មេ សព្ពទិសា បភាសតី’’តិ.

សុនិក្ខិត្តវិមានំ ឯកាទសមំ.

សុនិក្ខិត្តវគ្គោ សត្តមោ និដ្ឋិតោ.

តស្សុទ្ទានំ –

ទ្វេ ទលិទ្ទា វនវិហារា, ភតកោ គោបាលកណ្ឌកា;

អនេកវណ្ណមដ្ឋកុណ្ឌលី, សេរីសកោ សុនិក្ខិត្តំ;

បុរិសានំ តតិយោ វគ្គោ បវុច្ចតីតិ.

ភាណវារំ ចតុត្ថំ និដ្ឋិតំ.