១០. (ឧត្តរ) បាយាសិវិមានវត្ថុ

១១០៨. ‘‘យា ទេវរាជស្ស សភា សុធម្មា, យត្ថច្ឆតិ ទេវសង្ឃោ សមគ្គោ;

តថូបមំ តុយ្ហមិទំ វិមានំ, ឱភាសយំ តិដ្ឋតិ អន្តលិក្ខេ.

១១០៩. ‘‘ទេវិទ្ធិបត្តោសិ មហានុភាវោ, មនុស្សភូតោ កិមកាសិ បុញ្ញំ;

កេនាសិ ឯវំ ជលិតានុភាវោ, វណ្ណោ ច តេ សព្ពទិសា បភាសតី’’តិ.

១១១០. សោ ទេវបុត្តោ អត្តមនោ…បេ… យស្ស កម្មស្សិទំ ផលំ.

១១១១. ‘‘អហំ មនុស្សេសុ មនុស្សភូតោ, រញ្ញោ បាយាសិស្ស អហោសិំ មាណវោ;

លទ្ធា ធនំ សំវិភាគំ អកាសិំ, បិយា ច មេ សីលវន្តោ អហេសុំ;

អន្នញ្ច បានញ្ច បសន្នចិត្តោ, សក្កច្ច ទានំ វិបុលំ អទាសិំ.

១១១២. ‘‘តេន មេតាទិសោ វណ្ណោ…បេ. …វណ្ណោ ច មេ សព្ពទិសា បភាសតី’’តិ.

(ឧត្តរ) បាយាសិវិមានំ [ឧត្តរវិមានំ (សី. ស្យា. អដ្ឋ.)] ទសមំ.

បាយាសិវគ្គោ ឆដ្ឋោ និដ្ឋិតោ.

តស្សុទ្ទានំ –

ទ្វេ អគារិនោ ផលទាយី, ទ្វេ ឧបស្សយទាយី ភិក្ខាយ ទាយី;

យវបាលកោ ចេវ ទ្វេ, កុណ្ឌលិនោ បាយាសីតិ [បាឋភេទោ នត្ថិ];

បុរិសានំ ទុតិយោ វគ្គោ បវុច្ចតីតិ.