៤. អលោមវិមានវត្ថុ

៧១១. ‘‘អភិក្កន្តេន វណ្ណេន, យា ត្វំ តិដ្ឋសិ ទេវតេ;

ឱភាសេន្តី ទិសា សព្ពា, ឱសធី វិយ តារកា.

៧១២. ‘‘កេន តេតាទិសោ វណ្ណោ…បេ…

វណ្ណោ ច តេ សព្ពទិសា បភាសតី’’តិ.

៧១៤. សា ទេវតា អត្តមនា…បេ… យស្ស កម្មស្សិទំ ផលំ.

៧១៥. ‘‘អហញ្ច ពារាណសិយំ, ពុទ្ធស្សាទិច្ចពន្ធុនោ;

អទាសិំ សុក្ខកុម្មាសំ, បសន្នា សេហិ បាណិភិ.

៧១៦. ‘‘សុក្ខាយ អលោណិកាយ ច, បស្ស ផលំ កុម្មាសបិណ្ឌិយា;

អលោមំ សុខិតំ ទិស្វា, កោ បុញ្ញំ ន ករិស្សតិ.

៧១៧. ‘‘តេន មេតាទិសោ វណ្ណោ…បេ… វណ្ណោ ច មេ សព្ពទិសា បភាសតី’’តិ.

អលោមវិមានំ ចតុត្ថំ.