១២. រជ្ជុមាលាវិមានវត្ថុ

៨២៦. ‘‘អភិក្កន្តេន វណ្ណេន, យា ត្វំ តិដ្ឋសិ ទេវតេ;

ហត្ថបាទេ ច វិគ្គយ្ហ, នច្ចសិ សុប្បវាទិតេ.

៨២៧. ‘‘តស្សា តេ នច្ចមានាយ, អង្គមង្គេហិ សព្ពសោ;

ទិព្ពា សទ្ទា និច្ឆរន្តិ, សវនីយា មនោរមា.

៨២៨. ‘‘តស្សា តេ នច្ចមានាយ, អង្គមង្គេហិ សព្ពសោ;

ទិព្ពា គន្ធា បវាយន្តិ, សុចិគន្ធា មនោរមា.

៨២៩. ‘‘វិវត្តមានា កាយេន, យា វេណីសុ បិឡន្ធនា;

តេសំ សុយ្យតិ និគ្ឃោសោ, តុរិយេ បញ្ចង្គិកេ យថា.

៨៣០. ‘‘វដំសកា វាតធុតា, វាតេន សម្បកម្បិតា;

តេសំ សុយ្យតិ និគ្ឃោសោ, តុរិយេ បញ្ចង្គិកេ យថា.

៨៣១. ‘‘យាបិ តេ សិរស្មិំ មាលា, សុចិគន្ធា មនោរមា;

វាតិ គន្ធោ ទិសា សព្ពា, រុក្ខោ មញ្ជូសកោ យថា.

៨៣២. ‘‘ឃាយសេ តំ សុចិគន្ធំ, រូបំ បស្សសិ អមានុសំ;

ទេវតេ បុច្ឆិតាចិក្ខ, កិស្ស កម្មស្សិទំ ផល’’ន្តិ.

៨៣៣. ‘‘ទាសី អហំ បុរេ អាសិំ, គយាយំ ព្រាហ្មណស្សហំ;

អប្បបុញ្ញា អលក្ខិកា, រជ្ជុមាលាតិ មំ វិទុំ [វិទូ (ស្យា. បី. ក.)].

៨៣៤. ‘‘អក្កោសានំ វធានញ្ច, តជ្ជនាយ ច ឧគ្គតា [ឧក្កតា (សី. ស្យា.)];

កុដំ គហេត្វា និក្ខម្ម, អគញ្ឆិំ [អាគច្ឆិំ (ស្យា. ក.), អគច្ឆិំ (បី.), គច្ឆិំ (សី.)] ឧទហារិយា [ឧទកហារិយា (សី.)].

៨៣៥. ‘‘វិបថេ កុដំ និក្ខិបិត្វា, វនសណ្ឌំ ឧបាគមិំ;

ឥធេវាហំ មរិស្សាមិ, កោ អត្ថោ [ក្វត្ថោសិ (ក.), កីវត្ថោបិ (ស្យា.)] ជីវិតេន មេ.

៨៣៦. ‘‘ទឡ្ហំ បាសំ ករិត្វាន, អាសុម្ភិត្វាន បាទបេ;

តតោ ទិសា វិលោកេសិំ,កោ នុ ខោ វនមស្សិតោ.

៨៣៧. ‘‘តត្ថទ្ទសាសិំ សម្ពុទ្ធំ, សព្ពលោកហិតំ មុនិំ;

និសិន្នំ រុក្ខមូលស្មិំ, ឈាយន្តំ អកុតោភយំ.

៨៣៨. ‘‘តស្សា មេ អហុ សំវេគោ, អព្ភុតោ លោមហំសនោ;

កោ នុ ខោ វនមស្សិតោ, មនុស្សោ ឧទាហុ ទេវតា.

៨៣៩. ‘‘បាសាទិកំ បសាទនីយំ, វនា និព្ពនមាគតំ;

ទិស្វា មនោ មេ បសីទិ, នាយំ យាទិសកីទិសោ.

៨៤០. ‘‘គុត្តិន្ទ្រិយោ ឈានរតោ, អពហិគ្គតមានសោ;

ហិតោ សព្ពស្ស លោកស្ស, ពុទ្ធោ អយំ [សោយំ (សី.)] ភវិស្សតិ.

៨៤១. ‘‘ភយភេរវោ ទុរាសទោ, សីហោវ គុហមស្សិតោ;

ទុល្លភាយំ ទស្សនាយ, បុប្ផំ ឱទុម្ពរំ យថា.

៨៤២. ‘‘សោ មំ មុទូហិ វាចាហិ, អាលបិត្វា តថាគតោ;

រជ្ជុមាលេតិ មំវោច, សរណំ គច្ឆ តថាគតំ.

៨៤៣. ‘‘តាហំ គិរំ សុណិត្វាន, នេលំ អត្ថវតិំ សុចិំ;

សណ្ហំ មុទុញ្ច វគ្គុញ្ច, សព្ពសោកាបនូទនំ.

៨៤៤. ‘‘កល្លចិត្តញ្ច មំ ញត្វា, បសន្នំ សុទ្ធមានសំ;

ហិតោ សព្ពស្ស លោកស្ស, អនុសាសិ តថាគតោ.

៨៤៥. ‘‘ឥទំ ទុក្ខន្តិ មំវោច, អយំ ទុក្ខស្ស សម្ភវោ;

ទុក្ខ [អយំ (សី. ស្យា. បី.)] និរោធោ មគ្គោ ច [ទុក្ខនិរោធោ ច (ស្យា.)], អញ្ជសោ អមតោគធោ.

៨៤៦. ‘‘អនុកម្បកស្ស កុសលស្ស, ឱវាទម្ហិ អហំ ឋិតា;

អជ្ឈគា អមតំ សន្តិំ, និព្ពានំ បទមច្ចុតំ.

៨៤៧. ‘‘សាហំ អវដ្ឋិតាបេមា, ទស្សនេ អវិកម្បិនី;

មូលជាតាយ សទ្ធាយ, ធីតា ពុទ្ធស្ស ឱរសា.

៨៤៨. ‘‘សាហំ រមាមិ កីឡាមិ, មោទាមិ អកុតោភយា;

ទិព្ពមាលំ ធារយាមិ, បិវាមិ មធុមទ្ទវំ.

៨៤៩. ‘‘សដ្ឋិតុរិយសហស្សានិ, បដិពោធំ ករោន្តិ មេ;

អាឡម្ពោ គគ្គរោ ភីមោ, សាធុវាទី ច សំសយោ.

៨៥០. ‘‘បោក្ខរោ ច សុផស្សោ ច, វីណាមោក្ខា ច នារិយោ;

នន្ទា ចេវ សុនន្ទា ច, សោណទិន្នា សុចិម្ហិតា.

៨៥១. ‘‘អលម្ពុសា មិស្សកេសី ច, បុណ្ឌរីកាតិទារុណី [… តិចារុណី (សី.)];

ឯណីផស្សា សុផស្សា [សុបស្សា (ស្យា. បី. ក.)] ច, សុភទ្ទា [សំភទ្ទា (ក.)] មុទុវាទិនី.

៨៥២. ‘‘ឯតា ចញ្ញា ច សេយ្យាសេ, អច្ឆរានំ បពោធិកា;

តា មំ កាលេនុបាគន្ត្វា, អភិភាសន្តិ ទេវតា.

៨៥៣. ‘‘ហន្ទ នច្ចាម គាយាម, ហន្ទ តំ រមយាមសេ;

នយិទំ អកតបុញ្ញានំ, កតបុញ្ញានមេវិទំ.

៨៥៤. ‘‘អសោកំ នន្ទនំ រម្មំ, តិទសានំ មហាវនំ;

សុខំ អកតបុញ្ញានំ, ឥធ នត្ថិ បរត្ថ ច.

៨៥៥. ‘‘សុខញ្ច កតបុញ្ញានំ, ឥធ ចេវ បរត្ថ ច;

តេសំ សហព្យកាមានំ, កត្តព្ពំ កុសលំ ពហុំ;

កតបុញ្ញា ហិ មោទន្តិ, សគ្គេ ភោគសមង្គិនោ.

៨៥៦. ‘‘ពហូនំ វត អត្ថាយ, ឧប្បជ្ជន្តិ តថាគតា;

ទក្ខិណេយ្យា មនុស្សានំ, បុញ្ញខេត្តានមាករា;

យត្ថ ការំ ករិត្វាន, សគ្គេ មោទន្តិ ទាយកា’’តិ.

រជ្ជុមាលាវិមានំ ទ្វាទសមំ.

មញ្ជិដ្ឋកវគ្គោ ចតុត្ថោ និដ្ឋិតោ.

តស្សុទ្ទានំ –

មញ្ជិដ្ឋា បភស្សរា នាគា, អលោមាកញ្ជិកទាយិកា;

វិហារចតុរិត្ថម្ពា, បីតា ឧច្ឆុវន្ទនរជ្ជុមាលា ច;

វគ្គោ តេន បវុច្ចតីតិ.

ឥត្ថិវិមានំ សមត្តំ.