១. មញ្ជិដ្ឋកវិមានវត្ថុ

៦៨៩. ‘‘មញ្ជិដ្ឋកេ [មញ្ជេដ្ឋកេ (សី.)] វិមានស្មិំ, សោណ្ណវាលុកសន្ថតេ [សោវណ្ណវាលុកសន្ថតេ (ស្យា. បី.), សោវណ្ណវាលិកសន្ថតេ (ក.)];

បញ្ចង្គិកេ តុរិយេន [តុរិយេន (សី. ស្យា. បី.)], រមសិ សុប្បវាទិតេ.

៦៩០. ‘‘តម្ហា វិមានា ឱរុយ្ហ, និម្មិតា រតនាមយា;

ឱគាហសិ សាលវនំ, បុប្ផិតំ សព្ពកាលិកំ.

៦៩១. ‘‘យស្ស យស្សេវ សាលស្ស, មូលេ តិដ្ឋសិ ទេវតេ;

សោ សោ មុញ្ចតិ បុប្ផានិ, ឱនមិត្វា ទុមុត្តមោ.

៦៩២. ‘‘វាតេរិតំ សាលវនំ, អាធុតំ [អាធូតំ (សី.)] ទិជសេវិតំ;

វាតិ គន្ធោ ទិសា សព្ពា, រុក្ខោ មញ្ជូសកោ យថា.

៦៩៣. ‘‘ឃាយសេ តំ សុចិគន្ធំ, រូបំ បស្សសិ អមានុសំ;

ទេវតេ បុច្ឆិតាចិក្ខ, កិស្ស កម្មស្សិទំ ផល’’ន្តិ.

៦៩៤. ‘‘អហំ មនុស្សេសុ មនុស្សភូតា, ទាសី អយិរកុលេ [អយ្យិរកុលេ (ស្យា. ក.)] អហុំ;

ពុទ្ធំ និសិន្នំ ទិស្វាន, សាលបុប្ផេហិ ឱកិរិំ.

៦៩៥. ‘‘វដំសកញ្ច សុកតំ, សាលបុប្ផមយំ អហំ;

ពុទ្ធស្ស ឧបនាមេសិំ, បសន្នា សេហិ បាណិភិ.

៦៩៦. ‘‘តាហំ កម្មំ ករិត្វាន, កុសលំ ពុទ្ធវណ្ណិតំ;

អបេតសោកា សុខិតា, សម្បមោទាមនាមយា’’តិ.

មញ្ជិដ្ឋកវិមានំ បឋមំ.