៤. ចណ្ឌាលិវិមានវត្ថុ

១៩៥. ‘‘ចណ្ឌាលិ វន្ទ បាទានិ, គោតមស្ស យសស្សិនោ;

តមេវ [តវេវ (សី.)] អនុកម្បាយ, អដ្ឋាសិ ឥសិសត្តមោ [ឥសិសុត្តមោ (សី.)].

១៩៦. ‘‘អភិប្បសាទេហិ មនំ, អរហន្តម្ហិ តាទិនិ [តាទិនេ (ស្យា. ក.)];

ខិប្បំ បញ្ជលិកា វន្ទ, បរិត្តំ តវ ជីវិត’’ន្តិ.

១៩៧. ចោទិតា ភាវិតត្តេន, សរីរន្តិមធារិនា;

ចណ្ឌាលី វន្ទិ បាទានិ, គោតមស្ស យសស្សិនោ.

១៩៨. តមេនំ អវធី គាវី, ចណ្ឌាលិំ បញ្ជលិំ ឋិតំ;

នមស្សមានំ សម្ពុទ្ធំ, អន្ធការេ បភង្ករន្តិ.

១៩៩. ‘‘ខីណាសវំ វិគតរជំ អនេជំ, ឯកំ អរញ្ញម្ហិ រហោ និសិន្នំ;

ទេវិទ្ធិបត្តា ឧបសង្កមិត្វា, វន្ទាមិ តំ វីរ មហានុភាវ’’ន្តិ.

២០០. ‘‘សុវណ្ណវណ្ណា ជលិតា មហាយសា, វិមានមោរុយ្ហ អនេកចិត្តា;

បរិវារិតា អច្ឆរាសង្គណេន [អច្ឆរានំ គណេន (សី.)], កា ត្វំ សុភេ ទេវតេ វន្ទសេ មម’’ន្តិ.

២០១. ‘‘អហំ ភទ្ទន្តេ ចណ្ឌាលី, តយា វីរេន [ថេរេន (ក.)] បេសិតា;

វន្ទិំ អរហតោ បាទេ, គោតមស្ស យសស្សិនោ.

២០២. ‘‘សាហំ វន្ទិត្វា [វន្ទិត្វ (សី.)] បាទានិ, ចុតា ចណ្ឌាលយោនិយា;

វិមានំ សព្ពតោ ភទ្ទំ, ឧបបន្នម្ហិ នន្ទនេ.

២០៣. ‘‘អច្ឆរានំ សតសហស្សំ, បុរក្ខត្វាន [បុរក្ខិត្វា មំ (ស្យា. ក.)] តិដ្ឋតិ;

តាសាហំ បវរា សេដ្ឋា, វណ្ណេន យសសាយុនា.

២០៤. ‘‘បហូតកតកល្យាណា, សម្បជានា បដិស្សតា [បតិស្សតា (សី. ស្យា.)];

មុនិំ ការុណិកំ លោកេ, តំ ភន្តេ វន្ទិតុមាគតា’’តិ.

២០៥. ឥទំ វត្វាន ចណ្ឌាលី, កតញ្ញូ កតវេទិនី;

វន្ទិត្វា អរហតោ បាទេ, តត្ថេវន្តរធាយថាតិ [តត្ថេវន្តរធាយតីតិ (ស្យា. ក.)].

ចណ្ឌាលិវិមានំ ចតុត្ថំ.