៥. ភទ្ទិត្ថិវិមានវត្ថុ

២០៦. ‘‘នីលា បីតា ច កាឡា ច, មញ្ជិដ្ឋា [មញ្ជេដ្ឋា (សី.), មញ្ជដ្ឋា (បី.)] អថ លោហិតា;

ឧច្ចាវចានំ វណ្ណានំ, កិញ្ជក្ខបរិវារិតា.

២០៧. ‘‘មន្ទារវានំ បុប្ផានំ, មាលំ ធារេសិ មុទ្ធនិ;

នយិមេ អញ្ញេសុ កាយេសុ, រុក្ខា សន្តិ សុមេធសេ.

២០៨. ‘‘កេន កាយំ ឧបបន្នា, តាវតិំសំ យសស្សិនី;

ទេវតេ បុច្ឆិតាចិក្ខ, កិស្ស កម្មស្សិទំ ផល’’ន្តិ.

២០៩. ‘‘ភទ្ទិត្ថិកាតិ [ភទ្ទិត្ថីតិ (សី.)] មំ អញ្ញំសុ, កិមិលាយំ ឧបាសិកា;

សទ្ធា សីលេន សម្បន្នា, សំវិភាគរតា សទា.

២១០. ‘‘អច្ឆាទនញ្ច ភត្តញ្ច, សេនាសនំ បទីបិយំ;

អទាសិំ ឧជុភូតេសុ, វិប្បសន្នេន ចេតសា.

២១១. ‘‘ចាតុទ្ទសិំ បញ្ចទសិំ, យា ច បក្ខស្ស អដ្ឋមី;

បាដិហារិយបក្ខញ្ច, អដ្ឋង្គសុសមាគតំ.

២១២. ‘‘ឧបោសថំ ឧបវសិស្សំ, សទា សីលេសុ សំវុតា;

សញ្ញមា សំវិភាគា ច, វិមានំ អាវសាមហំ.

២១៣. ‘‘បាណាតិបាតា វិរតា, មុសាវាទា ច សញ្ញតា;

ថេយ្យា ច អតិចារា ច, មជ្ជបានា ច អារកា.

២១៤. ‘‘បញ្ចសិក្ខាបទេ រតា, អរិយសច្ចាន កោវិទា;

ឧបាសិកា ចក្ខុមតោ, អប្បមាទវិហារិនី.

កតាវាសា កតកុសលា តតោ ចុតា [កតាវកាសា កតកុសលា (ក.)],

សយំ បភា អនុវិចរាមិ នន្ទនំ.

២១៥. ‘‘ភិក្ខូ ចាហំ បរមហិតានុកម្បកេ, អភោជយិំ តបស្សិយុគំ មហាមុនិំ;

កតាវាសា កតកុសលា តតោ ចុតា [កតាវកាសា កតកុសលា (ក.)], សយំ បភា អនុវិចរាមិ នន្ទនំ.

២១៦. ‘‘អដ្ឋង្គិកំ អបរិមិតំ សុខាវហំ, ឧបោសថំ សតតមុបាវសិំ អហំ;

កតាវាសា កតកុសលា តតោ ចុតា [កតាវកាសា កតកុសលា (ក.)], សយំ បភា អនុវិចរាមិ នន្ទន’’ន្តិ.

ភទ្ទិត្ថិវិមានំ [ភទ្ទិត្ថិកាវិមានំ (ស្យា.)] បញ្ចមំ.