៣. អាចាមទាយិកាវិមានវត្ថុ

១៨៥. ‘‘បិណ្ឌាយ តេ ចរន្តស្ស, តុណ្ហីភូតស្ស តិដ្ឋតោ;

ទលិទ្ទា កបណា នារី, បរាគារំ អបស្សិតា [អវស្សិតា (សី.)].

១៨៦. ‘‘យា តេ អទាសិ អាចាមំ, បសន្នា សេហិ បាណិភិ;

សា ហិត្វា មានុសំ ទេហំ, កំ នុ សា ទិសតំ គតា’’តិ.

១៨៧. ‘‘បិណ្ឌាយ មេ ចរន្តស្ស, តុណ្ហីភូតស្ស តិដ្ឋតោ;

ទលិទ្ទា កបណា នារី, បរាគារំ អបស្សិតា.

១៨៨. ‘‘យា មេ អទាសិ អាចាមំ, បសន្នា សេហិ បាណិភិ;

សា ហិត្វា មានុសំ ទេហំ, វិប្បមុត្តា ឥតោ ចុតា.

១៨៩. ‘‘និម្មានរតិនោ នាម, សន្តិ ទេវា មហិទ្ធិកា;

តត្ថ សា សុខិតា នារី, មោទតាចាមទាយិកា’’តិ.

១៩០. ‘‘អហោ ទានំ វរាកិយា, កស្សបេ សុប្បតិដ្ឋិតំ;

បរាភតេន ទានេន, ឥជ្ឈិត្ថ វត ទក្ខិណា.

១៩១. ‘‘យា មហេសិត្តំ ការេយ្យ, ចក្កវត្តិស្ស រាជិនោ;

នារី សព្ពង្គកល្យាណី, ភត្តុ ចានោមទស្សិកា;

ឯតស្សាចាមទានស្ស, កលំ នាគ្ឃតិ សោឡសិំ.

១៩២. ‘‘សតំ និក្ខា សតំ អស្សា, សតំ អស្សតរីរថា;

សតំ កញ្ញាសហស្សានិ, អាមុត្តមណិកុណ្ឌលា;

ឯតស្សាចាមទានស្ស, កលំ នាគ្ឃន្តិ សោឡសិំ.

១៩៣. ‘‘សតំ ហេមវតា នាគា, ឦសាទន្តា ឧរូឡ្ហវា;

សុវណ្ណកច្ឆា មាតង្គា, ហេមកប្បនវាសសា [ហេមកប្បនិវាសសា (ស្យា. ក.)];

ឯតស្សាចាមទានស្ស, កលំ នាគ្ឃតិ សោឡសិំ.

១៩៤. ‘‘ចតុន្នមបិ ទីបានំ, ឥស្សរំ យោធ ការយេ;

ឯតស្សាចាមទានស្ស, កលំ នាគ្ឃតិ សោឡសិ’’ន្តិ.

អាចាមទាយិកាវិមានំ តតិយំ.