១៦. សិរិមាវិមានវត្ថុ

១៣៧. ‘‘យុត្តា ច តេ បរមអលង្កតា ហយា, អធោមុខា អឃសិគមា ពលី ជវា;

អភិនិម្មិតា បញ្ចរថាសតា ច តេ, អន្វេន្តិ តំ សារថិចោទិតា ហយា.

១៣៨. ‘‘សា តិដ្ឋសិ រថវរេ អលង្កតា, ឱភាសយំ ជលមិវ ជោតិ បាវកោ;

បុច្ឆាមិ តំ វរតនុ [វរចារុ (កត្ថចិ)] អនោមទស្សនេ, កស្មា នុ កាយា អនធិវរំ ឧបាគមិ.

១៣៩. ‘‘កាមគ្គបត្តានំ យមាហុនុត្តរំ [… នុត្តរា (ក.), អនុត្តរា (ស្យា.)], និម្មាយ និម្មាយ រមន្តិ ទេវតា;

តស្មា កាយា អច្ឆរា កាមវណ្ណិនី, ឥធាគតា អនធិវរំ នមស្សិតុំ.

១៤០. ‘‘កិំ ត្វំ បុរេ សុចរិតមាចរីធ [សុចរិតំ អចារិធ (បី.)],

កេនច្ឆសិ ត្វំ អមិតយសា សុខេធិតា;

ឥទ្ធី ច តេ អនធិវរា វិហង្គមា,

វណ្ណោ ច តេ ទស ទិសា វិរោចតិ.

១៤១. ‘‘ទេវេហិ ត្វំ បរិវុតា សក្កតា ចសិ,

កុតោ ចុតា សុគតិគតាសិ ទេវតេ;

កស្ស វា ត្វំ វចនករានុសាសនិំ,

អាចិក្ខ មេ ត្វំ យទិ ពុទ្ធសាវិកា’’តិ.

១៤២. ‘‘នគន្តរេ នគរវរេ សុមាបិតេ, បរិចារិកា រាជវរស្ស សិរិមតោ;

នច្ចេ គីតេ បរមសុសិក្ខិតា អហុំ, សិរិមាតិ មំ រាជគហេ អវេទិំសុ [អវេទិសុំ (?)].

១៤៣. ‘‘ពុទ្ធោ ច មេ ឥសិនិសភោ វិនាយកោ, អទេសយី សមុទយទុក្ខនិច្ចតំ;

អសង្ខតំ ទុក្ខនិរោធសស្សតំ, មគ្គញ្ចិមំ អកុដិលមញ្ជសំ សិវំ.

១៤៤. ‘‘សុត្វានហំ អមតបទំ អសង្ខតំ, តថាគតស្សនធិវរស្ស សាសនំ;

សីលេស្វហំ បរមសុសំវុតា អហុំ, ធម្មេ ឋិតា នរវរពុទ្ធទេសិតេ [ភាសិតេ (សី.)].

១៤៥. ‘‘ញត្វានហំ វិរជបទំ អសង្ខតំ, តថាគតេននធិវរេន ទេសិតំ;

តត្ថេវហំ សមថសមាធិមាផុសិំ, សាយេវ មេ បរមនិយាមតា អហុ.

១៤៦. ‘‘លទ្ធានហំ អមតវរំ វិសេសនំ, ឯកំសិកា អភិសមយេ វិសេសិយ;

អសំសយា ពហុជនបូជិតា អហំ, ខិឌ្ឌារតិំ [ខិឌ្ឌំ រតិំ (ស្យា. បី.)] បច្ចនុភោមនប្បកំ.

១៤៧. ‘‘ឯវំ អហំ អមតទសម្ហិ [អមតរសម្ហិ (ក.)] ទេវតា, តថាគតស្សនធិវរស្ស សាវិកា;

ធម្មទ្ទសា បឋមផលេ បតិដ្ឋិតា, សោតាបន្នា ន ច បន មត្ថិ ទុគ្គតិ.

១៤៨. ‘‘សា វន្ទិតុំ អនធិវរំ ឧបាគមិំ, បាសាទិកេ កុសលរតេ ច ភិក្ខវោ;

នមស្សិតុំ សមណសមាគមំ សិវំ, សគារវា សិរិមតោ ធម្មរាជិនោ.

១៤៩. ‘‘ទិស្វា មុនិំ មុទិតមនម្ហិ បីណិតា, តថាគតំ នរវរទម្មសារថិំ;

តណ្ហច្ឆិទំ កុសលរតំ វិនាយកំ, វន្ទាមហំ បរមហិតានុកម្បក’’ន្តិ.

សិរិមាវិមានំ សោឡសមំ.