១៧. កេសការីវិមានវត្ថុ

១៥០. ‘‘ឥទំ វិមានំ រុចិរំ បភស្សរំ, វេឡុរិយថម្ភំ សតតំ សុនិម្មិតំ;

សុវណ្ណរុក្ខេហិ សមន្តមោត្ថតំ, ឋានំ មមំ កម្មវិបាកសម្ភវំ.

១៥១. ‘‘តត្រូបបន្នា បុរិមច្ឆរា ឥមា, សតំ សហស្សានិ សកេន កម្មុនា;

តុវំសិ អជ្ឈុបគតា យសស្សិនី, ឱភាសយំ តិដ្ឋសិ បុព្ពទេវតា.

១៥២. ‘‘សសី អធិគ្គយ្ហ យថា វិរោចតិ, នក្ខត្តរាជារិវ តារកាគណំ;

តថេវ ត្វំ អច្ឆរាសង្គណំ [អច្ឆរាសង្គមំ (សី.)] ឥមំ, ទទ្ទល្លមានា យសសា វិរោចសិ.

១៥៣. ‘‘កុតោ នុ អាគម្ម អនោមទស្សនេ, ឧបបន្នា ត្វំ ភវនំ មមំ ឥទំ;

ព្រហ្មំវ ទេវា តិទសា សហិន្ទកា, សព្ពេ ន តប្បាមសេ ទស្សនេន ត’’ន្តិ.

១៥៤. ‘‘យមេតំ សក្ក អនុបុច្ឆសេ មមំ, ‘កុតោ ចុតា ត្វំ ឥធ អាគតា’តិ [កុតោ ចុតា ឥធ អាគតា តុវំ (ស្យា.), កុតោ ចុតាយ អាគតិ តវ (បី.)];

ពារាណសី នាម បុរត្ថិ កាសិនំ, តត្ថ អហោសិំ បុរេ កេសការិកា.

១៥៥. ‘‘ពុទ្ធេ ច ធម្មេ ច បសន្នមានសា, សង្ឃេ ច ឯកន្តគតា អសំសយា;

អខណ្ឌសិក្ខាបទា អាគតប្ផលា, សម្ពោធិធម្មេ និយតា អនាមយា’’តិ.

១៥៦. ‘‘តន្ត្យាភិនន្ទាមសេ ស្វាគតញ្ច [សាគតញ្ច (សី.)] តេ, ធម្មេន ច ត្វំ យសសា វិរោចសិ;

ពុទ្ធេ ច ធម្មេ ច បសន្នមានសេ, សង្ឃេ ច ឯកន្តគតេ អសំសយេ;

អខណ្ឌសិក្ខាបទេ អាគតប្ផលេ, សម្ពោធិធម្មេ និយតេ អនាមយេ’’តិ.

កេសការីវិមានំ សត្តរសមំ.

បីឋវគ្គោ បឋមោ និដ្ឋិតោ.

តស្សុទ្ទានំ –

បញ្ច បីឋា តយោ នាវា, ទីបតិលទក្ខិណា ទ្វេ;

បតិ ទ្វេ សុណិសា ឧត្តរា, សិរិមា កេសការិកា;

វគ្គោ តេន បវុច្ចតីតិ.