១៥. ឧត្តរាវិមានវត្ថុ

១២៤. ‘‘អភិក្កន្តេន វណ្ណេន, យា ត្វំ តិដ្ឋសិ ទេវតេ;

ឱភាសេន្តី ទិសា សព្ពា, ឱសធី វិយ តារកា.

១២៥. ‘‘កេន តេតាទិសោ វណ្ណោ, កេន តេ ឥធ មិជ្ឈតិ;

ឧប្បជ្ជន្តិ ច តេ ភោគា, យេ កេចិ មនសោ បិយា.

១២៦. ‘‘បុច្ឆាមិ តំ ទេវិ មហានុភាវេ, មនុស្សភូតា កិមកាសិ បុញ្ញំ;

កេនាសិ ឯវំ ជលិតានុភាវា, វណ្ណោ ច តេ សព្ពទិសា បភាសតី’’តិ.

១២៧. សា ទេវតា អត្តមនា, មោគ្គល្លានេន បុច្ឆិតា;

បញ្ហំ បុដ្ឋា វិយាកាសិ, យស្ស កម្មស្សិទំ ផលំ.

១២៨. ‘‘ឥស្សា ច មច្ឆេរមថោ [មច្ឆរិយមថោ ច (ក.)] បឡាសោ, នាហោសិ មយ្ហំ ឃរមាវសន្តិយា;

អក្កោធនា ភត្តុវសានុវត្តិនី, ឧបោសថេ និច្ចហមប្បមត្តា.

១២៩. ‘‘ចាតុទ្ទសិំ បញ្ចទសិំ, យា ច [យាវ (សី. អដ្ឋ., ក. អដ្ឋ.) ថេរីគាថាអដ្ឋកថា បស្សិតព្ពា] បក្ខស្ស អដ្ឋមី;

បាដិហារិយបក្ខញ្ច, អដ្ឋង្គសុសមាគតំ.

១៣០. ‘‘ឧបោសថំ ឧបវសិស្សំ, សទា សីលេសុ សំវុតា;

សញ្ញមា សំវិភាគា ច, វិមានំ អាវសាមហំ [អាវសាមិមំ (សី. អដ្ឋ., ក.) បរតោ បន សព្ពត្ថបិ ‘‘អាវសាមហំ’’ ឥច្ចេវ ទិស្សតិ].

១៣១. ‘‘បាណាតិបាតា វិរតា, មុសាវាទា ច សញ្ញតា;

ថេយ្យា ច អតិចារា ច, មជ្ជបានា ច អារកា [អារតា (?)].

១៣២. ‘‘បញ្ចសិក្ខាបទេ រតា, អរិយសច្ចាន កោវិទា;

ឧបាសិកា ចក្ខុមតោ, គោតមស្ស យសស្សិនោ.

១៣៣. ‘‘សាហំ សកេន សីលេន, យសសា ច យសស្សិនី;

អនុភោមិ សកំ បុញ្ញំ, សុខិតា ចម្ហិនាមយា.

១៣៤. ‘‘តេន មេតាទិសោ វណ្ណោ, តេន មេ ឥធ មិជ្ឈតិ;

ឧប្បជ្ជន្តិ ច មេ ភោគា, យេ កេចិ មនសោ បិយា.

១៣៥. ‘‘អក្ខាមិ តេ ភិក្ខុ មហានុភាវ, មនុស្សភូតា យមហំ អកាសិំ;

តេនម្ហិ ឯវំ ជលិតានុភាវា, វណ្ណោ ច មេ សព្ពទិសា បភាសតីតិ.

១៣៦. ‘‘មម ច, ភន្តេ, វចនេន ភគវតោ បាទេ សិរសា វន្ទេយ្យាសិ – ‘ឧត្តរា នាម, ភន្តេ, ឧបាសិកា ភគវតោ បាទេ សិរសា វន្ទតី’តិ. អនច្ឆរិយំ ខោ បនេតំ, ភន្តេ, យំ មំ ភគវា អញ្ញតរស្មិំ សាមញ្ញផលេ ព្យាករេយ្យ [ព្យាករេយ្យាតិ (?)], តំ ភគវា សកទាគាមិផលេ ព្យាកាសី’’តិ.

ឧត្តរាវិមានំ បន្នរសមំ.