៩. ជដិលសុត្តំ

៩. ឯវំ មេ សុតំ – ឯកំ សមយំ ភគវា គយាយំ វិហរតិ គយាសីសេ. តេន ខោ បន សមយេន សម្ពហុលា ជដិលា សីតាសុ ហេមន្តិកាសុ រត្តីសុ អន្តរដ្ឋកេ ហិមបាតសមយេ គយាយំ ឧម្មុជ្ជន្តិបិ និមុជ្ជន្តិបិ, ឧម្មុជ្ជនិមុជ្ជម្បិ ករោន្តិ ឱសិញ្ចន្តិបិ, អគ្គិម្បិ ជុហន្តិ – ‘‘ឥមិនា សុទ្ធី’’តិ.

អទ្ទសា ខោ ភគវា តេ សម្ពហុលេ ជដិលេ សីតាសុ ហេមន្តិកាសុ រត្តីសុ អន្តរដ្ឋកេ ហិមបាតសមយេ គយាយំ ឧម្មុជ្ជន្តេបិ និមុជ្ជន្តេបិ ឧម្មុជ្ជនិមុជ្ជម្បិ ករោន្តេ [ឧម្មុជ្ជនិមុជ្ជំ ករោន្តេបិ (សី. បី. ក.)] ឱសិញ្ចន្តេបិ អគ្គិម្បិ ជុហន្តេ – ‘‘ឥមិនា សុទ្ធី’’តិ.

អថ ខោ ភគវា ឯតមត្ថំ វិទិត្វា តាយំ វេលាយំ ឥមំ ឧទានំ ឧទានេសិ –

‘‘ន ឧទកេន សុចី ហោតី, ពហ្វេត្ថ ន្ហាយតី [នហាយតី (សី.)] ជនោ;

យម្ហិ សច្ចញ្ច ធម្មោ ច, សោ សុចី សោ ច ព្រាហ្មណោ’’តិ. នវមំ;