១. សីសូបចាលាថេរីគាថា

១៩៦. ‘‘ភិក្ខុនី សីលសម្បន្នា, ឥន្ទ្រិយេសុ សុសំវុតា;

អធិគច្ឆេ បទំ សន្តំ, អសេចនកមោជវំ’’.

១៩៧. ‘‘តាវតិំសា ច យាមា ច, តុសិតា ចាបិ ទេវតា;

និម្មានរតិនោ ទេវា, យេ ទេវា វសវត្តិនោ;

តត្ថ ចិត្តំ បណីធេហិ, យត្ថ តេ វុសិតំ បុរេ’’.

១៩៨. ‘‘តាវតិំសា ច យាមា ច, តុសិតា ចាបិ ទេវតា;

និម្មានរតិនោ ទេវា, យេ ទេវា វសវត្តិនោ.

១៩៩. ‘‘កាលំ កាលំ ភវាភវំ, សក្កាយស្មិំ បុរក្ខតា;

អវីតិវត្តា សក្កាយំ, ជាតិមរណសារិនោ.

២០០. ‘‘សព្ពោ អាទីបិតោ លោកោ, សព្ពោ លោកោ បទីបិតោ;

សព្ពោ បជ្ជលិតោ លោកោ, សព្ពោ លោកោ បកម្បិតោ.

២០១. ‘‘អកម្បិយំ អតុលិយំ, អបុថុជ្ជនសេវិតំ;

ពុទ្ធោ ធម្មមទេសេសិ, តត្ថ មេ និរតោ មនោ.

២០២. ‘‘តស្សាហំ វចនំ សុត្វា, វិហរិំ សាសនេ រតា;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

២០៣. ‘‘សព្ពត្ថ វិហតា នន្ទី, តមោខន្ធោ បទាលិតោ;

ឯវំ ជានាហិ បាបិម, និហតោ ត្វមសិ អន្តក’’.

… សីសូបចាលា ថេរី….

អដ្ឋកនិបាតោ និដ្ឋិតោ.