៩. នវកនិបាតោ

១. វឌ្ឍមាតុថេរីគាថា

២០៤. ‘‘មា សុ តេ វឌ្ឍ លោកម្ហិ, វនថោ អាហុ កុទាចនំ;

មា បុត្តក បុនប្បុនំ, អហុ ទុក្ខស្ស ភាគិមា.

២០៥. ‘‘សុខញ្ហិ វឌ្ឍ មុនយោ, អនេជា ឆិន្នសំសយា;

សីតិភូតា ទមប្បត្តា, វិហរន្តិ អនាសវា.

២០៦. ‘‘តេហានុចិណ្ណំ ឥសីភិ, មគ្គំ ទស្សនបត្តិយា;

ទុក្ខស្សន្តកិរិយាយ, ត្វំ វឌ្ឍ អនុព្រូហយ’’.

២០៧. ‘‘វិសារទាវ ភណសិ, ឯតមត្ថំ ជនេត្តិ មេ;

មញ្ញាមិ នូន មាមិកេ, វនថោ តេ ន វិជ្ជតិ’’.

២០៨. ‘‘យេ កេចិ វឌ្ឍ សង្ខារា, ហីនា ឧក្កដ្ឋមជ្ឈិមា;

អណូបិ អណុមត្តោបិ, វនថោ មេ ន វិជ្ជតិ.

២០៩. ‘‘សព្ពេ មេ អាសវា ខីណា, អប្បមត្តស្ស ឈាយតោ;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ’’.

២១០. ‘‘ឧឡារំ វត មេ មាតា, បតោទំ សមវស្សរិ;

បរមត្ថសញ្ហិតា គាថា, យថាបិ អនុកម្បិកា.

២១១. ‘‘តស្សាហំ វចនំ សុត្វា, អនុសិដ្ឋិំ ជនេត្តិយា;

ធម្មសំវេគមាបាទិំ, យោគក្ខេមស្ស បត្តិយា.

២១២. ‘‘សោហំ បធានបហិតត្តោ, រត្តិន្ទិវមតន្ទិតោ;

មាតរា ចោទិតោ សន្តោ, អផុសិំ សន្តិមុត្តមំ’’.

… វឌ្ឍមាតា ថេរី….

នវកនិបាតោ និដ្ឋិតោ.