៨. វិជយាថេរីគាថា

១៦៩. ‘‘ចតុក្ខត្តុំ បញ្ចក្ខត្តុំ, វិហារា ឧបនិក្ខមិំ;

អលទ្ធា ចេតសោ សន្តិំ, ចិត្តេ អវសវត្តិនី.

១៧០. ‘‘ភិក្ខុនិំ ឧបសង្កម្ម, សក្កច្ចំ បរិបុច្ឆហំ;

សា មេ ធម្មមទេសេសិ, ធាតុអាយតនានិ ច.

១៧១. ‘‘ចត្តារិ អរិយសច្ចានិ, ឥន្ទ្រិយានិ ពលានិ ច;

ពោជ្ឈង្គដ្ឋង្គិកំ មគ្គំ, ឧត្តមត្ថស្ស បត្តិយា.

១៧២. ‘‘តស្សាហំ វចនំ សុត្វា, ករោន្តី អនុសាសនិំ;

រត្តិយា បុរិមេ យាមេ, បុព្ពជាតិមនុស្សរិំ.

១៧៣. ‘‘រត្តិយា មជ្ឈិមេ យាមេ, ទិព្ពចក្ខុំ វិសោធយិំ;

រត្តិយា បច្ឆិមេ យាមេ, តមោខន្ធំ បទាលយិំ.

១៧៤. ‘‘បីតិសុខេន ច កាយំ, ផរិត្វា វិហរិំ តទា;

សត្តមិយា បាទេ បសារេសិំ, តមោខន្ធំ បទាលិយា’’តិ.

… វិជយា ថេរី….

ឆក្កនិបាតោ និដ្ឋិតោ.