៦. មហាបជាបតិគោតមីថេរីគាថា

១៥៧. ‘‘ពុទ្ធ វីរ នមោ ត្យត្ថុ, សព្ពសត្តានមុត្តម;

យោ មំ ទុក្ខា បមោចេសិ, អញ្ញញ្ច ពហុកំ ជនំ.

១៥៨. ‘‘សព្ពទុក្ខំ បរិញ្ញាតំ, ហេតុតណ្ហា វិសោសិតា;

ភាវិតោ អដ្ឋង្គិកោ [អរិយដ្ឋង្គិកោ (សី. ក.), ភាវិតដ្ឋង្គិកោ (ស្យា.)] មគ្គោ, និរោធោ ផុសិតោ មយា.

១៥៩. ‘‘មាតា បុត្តោ បិតា ភាតា, អយ្យកា ច បុរេ អហុំ;

យថាភុច្ចមជានន្តី, សំសរិំហំ អនិព្ពិសំ.

១៦០. ‘‘ទិដ្ឋោ ហិ មេ សោ ភគវា, អន្តិមោយំ សមុស្សយោ;

វិក្ខីណោ ជាតិសំសារោ, នត្ថិ ទានិ បុនព្ភវោ.

១៦១. ‘‘អារទ្ធវីរិយេ បហិតត្តេ, និច្ចំ ទឡ្ហបរក្កមេ;

សមគ្គេ សាវកេ បស្សេ, ឯសា ពុទ្ធាន វន្ទនា.

១៦២. ‘‘ពហូនំ [ពហុន្នំ (សី. ស្យា.)] វត អត្ថាយ, មាយា ជនយិ គោតមំ;

ព្យាធិមរណតុន្នានំ, ទុក្ខក្ខន្ធំ ព្យបានុទី’’តិ.

… មហាបជាបតិគោតមី ថេរី….