៧. សកុលាថេរីគាថា

៩៧. ‘‘អគារស្មិំ វសន្តីហំ, ធម្មំ សុត្វាន ភិក្ខុនោ;

អទ្ទសំ វិរជំ ធម្មំ, និព្ពានំ បទមច្ចុតំ.

៩៨. ‘‘សាហំ បុត្តំ ធីតរញ្ច, ធនធញ្ញញ្ច ឆឌ្ឌិយ;

កេសេ ឆេទាបយិត្វាន, បព្ពជិំ អនគារិយំ.

៩៩. ‘‘សិក្ខមានា អហំ សន្តី, ភាវេន្តី មគ្គមញ្ជសំ;

បហាសិំ រាគទោសញ្ច, តទេកដ្ឋេ ច អាសវេ.

១០០. ‘‘ភិក្ខុនី ឧបសម្បជ្ជ, បុព្ពជាតិមនុស្សរិំ;

ទិព្ពចក្ខុ វិសោធិតំ [វិសោធិតំ ទិព្ពចក្ខុ (សី.)], វិមលំ សាធុភាវិតំ.

១០១. ‘‘សង្ខារេ បរតោ ទិស្វា, ហេតុជាតេ បលោកិតេ [បលោកិនេ (ក.)];

បហាសិំ អាសវេ សព្ពេ, សីតិភូតាម្ហិ និព្ពុតា’’តិ.

… សកុលា ថេរី….