៥. នន្ទុត្តរាថេរីគាថា

៨៧. ‘‘អគ្គិំ ចន្ទញ្ច សូរិយញ្ច, ទេវតា ច នមស្សិហំ;

នទីតិត្ថានិ គន្ត្វាន, ឧទកំ ឱរុហាមិហំ.

៨៨. ‘‘ពហូវតសមាទានា, អឌ្ឍំ សីសស្ស ឱលិខិំ;

ឆមាយ សេយ្យំ កប្បេមិ, រត្តិំ ភត្តំ ន ភុញ្ជហំ.

៨៩. ‘‘វិភូសាមណ្ឌនរតា, ន្ហាបនុច្ឆាទនេហិ ច;

ឧបកាសិំ ឥមំ កាយំ, កាមរាគេន អដ្ដិតា.

៩០. ‘‘តតោ សទ្ធំ លភិត្វាន, បព្ពជិំ អនគារិយំ;

ទិស្វា កាយំ យថាភូតំ, កាមរាគោ សមូហតោ.

៩១. ‘‘សព្ពេ ភវា សមុច្ឆិន្នា, ឥច្ឆា ច បត្ថនាបិ ច;

សព្ពយោគវិសំយុត្តា, សន្តិំ បាបុណិ ចេតសោ’’តិ.

… នន្ទុត្តរា ថេរី….