១០. បដាចារាថេរីគាថា

១១២. ‘‘នង្គលេហិ កសំ ខេត្តំ, ពីជានិ បវបំ ឆមា;

បុត្តទារានិ បោសេន្តា, ធនំ វិន្ទន្តិ មាណវា.

១១៣. ‘‘កិមហំ សីលសម្បន្នា, សត្ថុសាសនការិកា;

និព្ពានំ នាធិគច្ឆាមិ, អកុសីតា អនុទ្ធតា.

១១៤. ‘‘បាទេ បក្ខាលយិត្វាន, ឧទកេសុ ករោមហំ;

បាទោទកញ្ច ទិស្វាន, ថលតោ និន្នមាគតំ.

១១៥. ‘‘តតោ ចិត្តំ សមាធេសិំ, អស្សំ ភទ្រំវជានិយំ;

តតោ ទីបំ គហេត្វាន, វិហារំ បាវិសិំ អហំ;

សេយ្យំ ឱលោកយិត្វាន, មញ្ចកម្ហិ ឧបាវិសិំ.

១១៦. ‘‘តតោ សូចិំ គហេត្វាន, វដ្ដិំ ឱកស្សយាមហំ;

បទីបស្សេវ និព្ពានំ, វិមោក្ខោ អហុ ចេតសោ’’តិ.

… បដាចារា ថេរី….