៥. សុភាកម្មារធីតុថេរីគាថា

៣៣៩. ‘‘ទហរាហំ សុទ្ធវសនា, យំ បុរេ ធម្មមស្សុណិំ;

តស្សា មេ អប្បមត្តាយ, សច្ចាភិសមយោ អហុ.

៣៤០. ‘‘តតោហំ សព្ពកាមេសុ, ភុសំ អរតិមជ្ឈគំ;

សក្កាយស្មិំ ភយំ ទិស្វា, នេក្ខម្មមេវ [នេក្ខម្មញ្ញេវ (សី.), នេក្ខម្មស្សេវ (ស្យា.)] បីហយេ.

៣៤១. ‘‘ហិត្វានហំ ញាតិគណំ, ទាសកម្មករានិ ច;

គាមខេត្តានិ ផីតានិ, រមណីយេ បមោទិតេ.

៣៤២. ‘‘បហាយហំ បព្ពជិតា, សាបតេយ្យមនប្បកំ;

ឯវំ សទ្ធាយ និក្ខម្ម, សទ្ធម្មេ សុប្បវេទិតេ.

៣៤៣. ‘‘នេតំ [ន មេតំ (សី. ស្យា.)] អស្ស បតិរូបំ, អាកិញ្ចញ្ញញ្ហិ បត្ថយេ;

យោ [យា (ស្យា.)] ជាតរូបំ រជតំ, ឆឌ្ឌេត្វា [ថបេត្វា (ក.)] បុនរាគមេ [បុនរាគហេ (ក.)].

៣៤៤. ‘‘រជតំ ជាតរូបំ វា, ន ពោធាយ ន សន្តិយា;

នេតំ សមណសារុប្បំ, ន ឯតំ អរិយទ្ធនំ.

៣៤៥. ‘‘លោភនំ មទនញ្ចេតំ, មោហនំ រជវឌ្ឍនំ;

សាសង្កំ ពហុអាយាសំ, នត្ថិ ចេត្ថ ធុវំ ឋិតិ.

៣៤៦. ‘‘ឯត្ថ រត្តា បមត្តា ច, សង្កិលិដ្ឋមនា នរា;

អញ្ញមញ្ញេន ព្យារុទ្ធា, បុថុ កុព្ពន្តិ មេធគំ.

៣៤៧. ‘‘វធោ ពន្ធោ បរិក្លេសោ, ជានិ សោកបរិទ្ទវោ;

កាមេសុ អធិបន្នានំ, ទិស្សតេ ព្យសនំ ពហុំ.

៣៤៨. ‘‘តំ មំ ញាតី អមិត្តាវ, កិំ វោ កាមេសុ យុញ្ជថ;

ជានាថ មំ បព្ពជិតំ, កាមេសុ ភយទស្សិនិំ.

៣៤៩. ‘‘ន ហិរញ្ញសុវណ្ណេន, បរិក្ខីយន្តិ អាសវា;

អមិត្តា វធកា កាមា, សបត្តា សល្លពន្ធនា.

៣៥០. ‘‘តំ មំ ញាតី អមិត្តាវ, កិំ វោ កាមេសុ យុញ្ជថ;

ជានាថ មំ បព្ពជិតំ, មុណ្ឌំ សង្ឃាដិបារុតំ.

៣៥១. ‘‘ឧត្តិដ្ឋបិណ្ឌោ ឧញ្ឆោ ច, បំសុកូលញ្ច ចីវរំ;

ឯតំ ខោ មម សារុប្បំ, អនគារូបនិស្សយោ.

៣៥២. ‘‘វន្តា មហេសីហិ កាមា, យេ ទិព្ពា យេ ច មានុសា;

ខេមដ្ឋានេ វិមុត្តា តេ, បត្តា តេ អចលំ សុខំ.

៣៥៣. ‘‘មាហំ កាមេហិ សង្គច្ឆិំ, យេសុ តាណំ ន វិជ្ជតិ;

អមិត្តា វធកា កាមា, អគ្គិក្ខន្ធូបមា ទុខា.

៣៥៤. ‘‘បរិបន្ថោ ឯស ភយោ, សវិឃាតោ សកណ្ដកោ;

គេធោ សុវិសមោ ចេសោ [លេបោ (សី.)], មហន្តោ មោហនាមុខោ.

៣៥៥. ‘‘ឧបសគ្គោ ភីមរូបោ, កាមា សប្បសិរូបមា;

យេ ពាលា អភិនន្ទន្តិ, អន្ធភូតា បុថុជ្ជនា.

៣៥៦. ‘‘កាមបង្កេន សត្តា ហិ, ពហូ លោកេ អវិទ្ទសូ;

បរិយន្តំ ន ជានន្តិ, ជាតិយា មរណស្ស ច.

៣៥៧. ‘‘ទុគ្គតិគមនំ មគ្គំ, មនុស្សា កាមហេតុកំ;

ពហុំ វេ បដិបជ្ជន្តិ, អត្តនោ រោគមាវហំ.

៣៥៨. ‘‘ឯវំ អមិត្តជននា, តាបនា សំកិលេសិកា;

លោកាមិសា ពន្ធនីយា, កាមា មរណពន្ធនា [ចរណពន្ធនា (សី.)].

៣៥៩. ‘‘ឧម្មាទនា ឧល្លបនា, កាមា ចិត្តប្បមទ្ទិនោ;

សត្តានំ សង្កិលេសាយ, ខិប្បំ [ខិបំ (សី.)] មារេន ឱឌ្ឌិតំ.

៣៦០. ‘‘អនន្តាទីនវា កាមា, ពហុទុក្ខា មហាវិសា;

អប្បស្សាទា រណករា, សុក្កបក្ខវិសោសនា [វិសោសកា (សី.)].

៣៦១. ‘‘សាហំ ឯតាទិសំ កត្វា, ព្យសនំ កាមហេតុកំ;

ន តំ បច្ចាគមិស្សាមិ, និព្ពានាភិរតា សទា.

៣៦២. ‘‘រណំ ករិត្វា [តរិត្វា (សី.)] កាមានំ, សីតិភាវាភិកង្ខិនី;

អប្បមត្តា វិហស្សាមិ, សព្ពសំយោជនក្ខយេ.

៣៦៣. ‘‘អសោកំ វិរជំ ខេមំ, អរិយដ្ឋង្គិកំ ឧជុំ;

តំ មគ្គំ អនុគច្ឆាមិ, យេន តិណ្ណា មហេសិនោ’’.

៣៦៤. ឥមំ បស្សថ ធម្មដ្ឋំ, សុភំ កម្មារធីតរំ;

អនេជំ ឧបសម្បជ្ជ, រុក្ខមូលម្ហិ ឈាយតិ.

៣៦៥. អជ្ជដ្ឋមី បព្ពជិតា, សទ្ធា សទ្ធម្មសោភនា;

វិនីតុប្បលវណ្ណាយ, តេវិជ្ជា មច្ចុហាយិនី.

៣៦៦. សាយំ ភុជិស្សា អនណា, ភិក្ខុនី ភាវិតិន្ទ្រិយា;

សព្ពយោគវិសំយុត្តា, កតកិច្ចា អនាសវា.

៣៦៧. តំ សក្កោ ទេវសង្ឃេន, ឧបសង្កម្ម ឥទ្ធិយា;

នមស្សតិ ភូតបតិ, សុភំ កម្មារធីតរន្តិ.

… សុភា កម្មារធីតា ថេរី….

វីសតិនិបាតោ និដ្ឋិតោ.