១២. សោឡសនិបាតោ

២៣៦. ‘‘ឧទហារី អហំ សីតេ [ឧទកមាហរិំ សីតេ (សី.)], សទា ឧទកមោតរិំ;

អយ្យានំ ទណ្ឌភយភីតា, វាចាទោសភយដ្ដិតា.

២៣៧. ‘‘កស្ស ព្រាហ្មណ ត្វំ ភីតោ, សទា ឧទកមោតរិ;

វេធមានេហិ គត្តេហិ, សីតំ វេទយសេ ភុសំ’’.

២៣៨. ជានន្តី វត មំ [ជានន្តី ច តុវំ (ក.)] ភោតិ, បុណ្ណិកេ បរិបុច្ឆសិ;

ករោន្តំ កុសលំ កម្មំ, រុន្ធន្តំ កតបាបកំ.

២៣៩. ‘‘យោ ច វុឌ្ឍោ ទហរោ វា, បាបកម្មំ បកុព្ពតិ;

ទកាភិសេចនា សោបិ, បាបកម្មា បមុច្ចតិ’’.

២៤០. ‘‘កោ នុ តេ ឥទមក្ខាសិ, អជានន្តស្ស អជានកោ;

ទកាភិសេចនា នាម, បាបកម្មា បមុច្ចតិ.

២៤១. ‘‘សគ្គំ នូន គមិស្សន្តិ, សព្ពេ មណ្ឌូកកច្ឆបា;

នាគា [នក្កា (សី.)] ច សុសុមារា ច, យេ ចញ្ញេ ឧទកេ ចរា.

២៤២. ‘‘ឱរព្ភិកា សូករិកា, មច្ឆិកា មិគពន្ធកា;

ចោរា ច វជ្ឈឃាតា ច, យេ ចញ្ញេ បាបកម្មិនោ;

ទកាភិសេចនា តេបិ, បាបកម្មា បមុច្ចរេ.

២៤៣. ‘‘សចេ ឥមា នទិយោ តេ, បាបំ បុព្ពេ កតំ វហុំ;

បុញ្ញម្បិមា វហេយ្យុំ តេ, តេន ត្វំ បរិពាហិរោ.

២៤៤. ‘‘យស្ស ព្រាហ្មណ ត្វំ ភីតោ, សទា ឧទកមោតរិ;

តមេវ ព្រហ្មេ មា កាសិ, មា តេ សីតំ ឆវិំ ហនេ’’.

២៤៥. ‘‘កុម្មគ្គបដិបន្នំ មំ, អរិយមគ្គំ សមានយិ;

ទកាភិសេចនា ភោតិ, ឥមំ សាដំ ទទាមិ តេ’’.

២៤៦. ‘‘តុយ្ហេវ សាដកោ ហោតុ, នាហមិច្ឆាមិ សាដកំ;

សចេ ភាយសិ ទុក្ខស្ស, សចេ តេ ទុក្ខមប្បិយំ.

២៤៧. ‘‘មាកាសិ បាបកំ កម្មំ, អាវិ វា យទិ វា រហោ;

សចេ ច បាបកំ កម្មំ, ករិស្សសិ ករោសិ វា.

២៤៨. ‘‘ន តេ ទុក្ខា បមុត្យត្ថិ, ឧបេច្ចាបិ [ឧប្បច្ចាបិ (អដ្ឋ. បាឋន្តរំ)] បលាយតោ;

សចេ ភាយសិ ទុក្ខស្ស, សចេ តេ ទុក្ខមប្បិយំ.

២៤៩. ‘‘ឧបេហិ សរណំ ពុទ្ធំ, ធម្មំ សង្ឃញ្ច តាទិនំ;

សមាទិយាហិ សីលានិ, តំ តេ អត្ថាយ ហេហិតិ’’.

២៥០. ‘‘ឧបេមិ សរណំ ពុទ្ធំ, ធម្មំ សង្ឃញ្ច តាទិនំ;

សមាទិយាមិ សីលានិ, តំ មេ អត្ថាយ ហេហិតិ.

២៥១. ‘‘ព្រហ្មពន្ធុ បុរេ អាសិំ, អជ្ជម្ហិ សច្ចព្រាហ្មណោ;

តេវិជ្ជោ វេទសម្បន្នោ, សោត្តិយោ ចម្ហិ ន្ហាតកោ’’តិ.

… បុណ្ណា ថេរី….

សោឡសនិបាតោ និដ្ឋិតោ.