១. ឧប្បលវណ្ណាថេរីគាថា

២២៤. ‘‘ឧភោ មាតា ច ធីតា ច, មយំ អាសុំ [អាភុំ (សី.)] សបត្តិយោ;

តស្សា មេ អហុ សំវេគោ, អព្ភុតោ លោមហំសនោ.

២២៥. ‘‘ធិរត្ថុ កាមា អសុចី, ទុគ្គន្ធា ពហុកណ្ដកា;

យត្ថ មាតា ច ធីតា ច, សភរិយា មយំ អហុំ.

២២៦. ‘‘កាមេស្វាទីនវំ ទិស្វា, នេក្ខម្មំ ទដ្ឋុ ខេមតោ;

សា បព្ពជ្ជិំ រាជគហេ, អគារស្មានគារិយំ.

២២៧. ‘‘បុព្ពេនិវាសំ ជានាមិ, ទិព្ពចក្ខុំ វិសោធិតំ;

ចេតោបរិច្ចញាណញ្ច, សោតធាតុ វិសោធិតា.

២២៨. ‘‘ឥទ្ធីបិ មេ សច្ឆិកតា, បត្តោ មេ អាសវក្ខយោ;

ឆឡភិញ្ញា សច្ឆិកតា, កតំ ពុទ្ធស្ស សាសនំ.

២២៩. ‘‘ឥទ្ធិយា អភិនិម្មិត្វា, ចតុរស្សំ រថំ អហំ;

ពុទ្ធស្ស បាទេ វន្ទិត្វា, លោកនាថស្ស តាទិនោ’’ [សិរីមតោ (ស្យា. ក.)].

២៣០. ‘‘សុបុប្ផិតគ្គំ ឧបគម្ម បាទបំ, ឯកា តុវំ តិដ្ឋសិ សាលមូលេ [រុក្ខមូលេ (ស្យា. ក.)];

ន ចាបិ តេ ទុតិយោ អត្ថិ កោចិ, ន ត្វំ ពាលេ ភាយសិ ធុត្តកានំ’’.

២៣១. ‘‘សតំ សហស្សានិបិ ធុត្តកានំ, សមាគតា ឯទិសកា ភវេយ្យុំ;

លោមំ ន ឥញ្ជេ នបិ សម្បវេធេ, កិំ មេ តុវំ មារ ករិស្សសេកោ.

២៣២. ‘‘ឯសា អន្តរធាយាមិ, កុច្ឆិំ វា បវិសាមិ តេ;

ភមុកន្តរេ តិដ្ឋាមិ, តិដ្ឋន្តិំ មំ ន ទក្ខសិ.

២៣៣. ‘‘ចិត្តម្ហិ វសីភូតាហំ, ឥទ្ធិបាទា សុភាវិតា;

ឆឡភិញ្ញា សច្ឆិកតា, កតំ ពុទ្ធស្ស សាសនំ.

២៣៤. ‘‘សត្តិសូលូបមា កាមា, ខន្ធាសំ អធិកុដ្ដនា;

យំ ត្វំ ‘កាមរតិំ’ ព្រូសិ, ‘អរតី’ ទានិ សា មម.

២៣៥. ‘‘សព្ពត្ថ វិហតា នន្ទី, តមោខន្ធោ បទាលិតោ;

ឯវំ ជានាហិ បាបិម, និហតោ ត្វមសិ អន្តកា’’តិ.

… ឧប្បលវណ្ណា ថេរី….

ទ្វាទសនិបាតោ និដ្ឋិតោ.