៦. សោណាថេរីអបទានំ

២២០. ‘‘បទុមុត្តរោ នាម ជិនោ, សព្ពធម្មាន បារគូ;

ឥតោ សតសហស្សម្ហិ, កប្បេ ឧប្បជ្ជិ នាយកោ.

២២១. ‘‘តទា សេដ្ឋិកុលេ ជាតា, សុខិតា បូជិតា បិយា;

ឧបេត្វា តំ មុនិវរំ, អស្សោសិំ មធុរំ វចំ.

២២២. ‘‘អារទ្ធវីរិយានគ្គំ, វណ្ណេសិ [វណ្ណេតិ (ស្យា.)] ភិក្ខុនិំ ជិនោ;

តំ សុត្វា មុទិតា ហុត្វា, ការំ កត្វាន សត្ថុនោ.

២២៣. ‘‘អភិវាទិយ សម្ពុទ្ធំ, ឋានំ តំ បត្ថយិំ តទា;

អនុមោទិ មហាវីរោ, ‘សិជ្ឈតំ បណិធី តវ.

២២៤. ‘‘‘សតសហស្សិតោ កប្បេ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

២២៥. ‘‘‘តស្ស ធម្មេសុ ទាយាទា, ឱរសា ធម្មនិម្មិតា;

សោណាតិ នាម នាមេន, ហេស្សតិ សត្ថុ សាវិកា’.

២២៦. ‘‘តំ សុត្វា មុទិតា ហុត្វា, យាវជីវំ តទា ជិនំ;

មេត្តចិត្តា បរិចរិំ, បច្ចយេហិ វិនាយកំ.

២២៧. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

២២៨. ‘‘បច្ឆិមេ ច ភវេ ទានិ, ជាតា សេដ្ឋិកុលេ អហំ;

សាវត្ថិយំ បុរវរេ, ឥទ្ធេ ផីតេ មហទ្ធនេ.

២២៩. ‘‘យទា ច យោព្ពនប្បត្តា, គន្ត្វា បតិកុលំ អហំ;

ទស បុត្តានិ អជនិំ, សុរូបានិ វិសេសតោ.

២៣០. ‘‘សុខេធិតា ច តេ សព្ពេ, ជននេត្តមនោហរា;

អមិត្តានម្បិ រុចិតា, មម បគេវ តេ បិយា.

២៣១. ‘‘តតោ មយ្ហំ អកាមាយ, ទសបុត្តបុរក្ខតោ;

បព្ពជិត្ថ ស មេ ភត្តា, ទេវទេវស្ស សាសនេ.

២៣២. ‘‘តទេកិកា វិចិន្តេសិំ, ជីវិតេនាលមត្ថុ មេ;

ចត្តាយ បតិបុត្តេហិ, វុឌ្ឍាយ ច វរាកិយា.

២៣៣. ‘‘អហម្បិ តត្ថ គច្ឆិស្សំ, សម្បត្តោ យត្ថ មេ បតិ;

ឯវាហំ ចិន្តយិត្វាន, បព្ពជិំ អនគារិយំ.

២៣៤. ‘‘តតោ ច មំ ភិក្ខុនិយោ, ឯកំ ភិក្ខុនុបស្សយេ;

វិហាយ គច្ឆុមោវាទំ, តាបេហិ ឧទកំ ឥតិ.

២៣៥. ‘‘តទា ឧទកមាហិត្វា, ឱកិរិត្វាន កុម្ភិយា;

ចុល្លេ ឋបេត្វា អាសីនា, តតោ ចិត្តំ សមាទហិំ.

២៣៦. ‘‘ខន្ធេ អនិច្ចតោ ទិស្វា, ទុក្ខតោ ច អនត្តតោ;

ខេបេត្វា អាសវេ សព្ពេ, អរហត្តមបាបុណិំ.

២៣៧. ‘‘តទាគន្ត្វា ភិក្ខុនិយោ, ឧណ្ហោទកមបុច្ឆិសុំ;

តេជោធាតុមធិដ្ឋាយ, ខិប្បំ សន្តាបយិំ ជលំ.

២៣៨. ‘‘វិម្ហិតា តា ជិនវរំ, ឯតមត្ថមសាវយុំ;

តំ សុត្វា មុទិតោ នាថោ, ឥមំ គាថំ អភាសថ.

២៣៩. ‘‘‘យោ ច វស្សសតំ ជីវេ, កុសីតោ ហីនវីរិយោ;

ឯកាហំ ជីវិតំ សេយ្យោ, វីរិយមារភតោ ទឡ្ហំ’.

២៤០. ‘‘អារាធិតោ មហាវីរោ, មយា សុប្បដិបត្តិយា;

អារទ្ធវីរិយានគ្គំ, មមាហ ស មហាមុនិ.

២៤១. ‘‘កិលេសា ឈាបិតា មយ្ហំ…បេ… វិហរាមិ អនាសវា.

២៤២. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

២៤៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ សោណា ភិក្ខុនី ឥមា គាថាយោ អភាសិត្ថាតិ.

សោណាថេរិយាបទានំ ឆដ្ឋំ.