៧. ភទ្ទកាបិលានីថេរីអបទានំ

២៤៤. ‘‘បទុមុត្តរោ នាម ជិនោ, សព្ពធម្មាន បារគូ [សព្ពធម្មេសុ ចក្ខុមា (សី. បី.)];

ឥតោ សតសហស្សម្ហិ, កប្បេ ឧប្បជ្ជិ នាយកោ.

២៤៥. ‘‘តទាហុ ហំសវតិយំ, វិទេហោ នាម នាមតោ [នាមកោ (ស្យា. បី.)];

សេដ្ឋី បហូតរតនោ, តស្ស ជាយា អហោសហំ.

២៤៦. ‘‘កទាចិ សោ នរាទិច្ចំ, ឧបេច្ច សបរិជ្ជនោ;

ធម្មមស្សោសិ ពុទ្ធស្ស, សព្ពទុក្ខភយប្បហំ [ទុក្ខក្ខយាវហំ (ស្យា.)].

២៤៧. ‘‘សាវកំ ធុតវាទានំ, អគ្គំ កិត្តេសិ នាយកោ;

សុត្វា សត្តាហិកំ ទានំ, ទត្វា ពុទ្ធស្ស តាទិនោ.

២៤៨. ‘‘និបច្ច សិរសា បាទេ, តំ ឋានមភិបត្ថយិំ;

ស ហាសយន្តោ បរិសំ, តទា ហិ នរបុង្គវោ.

២៤៩. ‘‘សេដ្ឋិនោ អនុកម្បាយ, ឥមា គាថា អភាសថ;

‘លច្ឆសេ បត្ថិតំ ឋានំ, និព្ពុតោ ហោហិ បុត្តក.

២៥០. ‘‘‘សតសហស្សិតោ កប្បេ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

២៥១. ‘‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

កស្សបោ នាម គោត្តេន, ហេស្សតិ សត្ថុ សាវកោ’.

២៥២. ‘‘តំ សុត្វា មុទិតោ ហុត្វា, យាវជីវំ តទា ជិនំ;

មេត្តចិត្តោ បរិចរិ, បច្ចយេហិ វិនាយកំ.

២៥៣. ‘‘សាសនំ ជោតយិត្វាន, សោ មទ្ទិត្វា កុតិត្ថិយេ;

វេនេយ្យំ វិនយិត្វា ច, និព្ពុតោ សោ សសាវកោ.

២៥៤. ‘‘និព្ពុតេ តម្ហិ លោកគ្គេ, បូជនត្ថាយ សត្ថុនោ;

ញាតិមិត្តេ សមានេត្វា, សហ តេហិ អការយិ.

២៥៥. ‘‘សត្តយោជនិកំ ថូបំ, ឧព្ពិទ្ធំ រតនាមយំ;

ជលន្តំ សតរំសិំវ, សាលរាជំវ ផុល្លិតំ.

២៥៦. ‘‘សត្តសតសហស្សានិ, បាតិយោ [ចាតិយោ (ស្យា.)] តត្ថ ការយិ;

នឡគ្គី វិយ ជោតន្តី [ជោតន្តេ (ស្យា. បី.)], រតនេហេវ សត្តហិ.

២៥៧. ‘‘គន្ធតេលេន បូរេត្វា, ទីបានុជ្ជលយី តហិំ;

បូជនត្ថាយ [បូជត្ថាយ (សី. ក.)] មហេសិស្ស, សព្ពភូតានុកម្បិនោ.

២៥៨. ‘‘សត្តសតសហស្សានិ, បុណ្ណកុម្ភានិ ការយិ;

រតនេហេវ បុណ្ណានិ, បូជនត្ថាយ មហេសិនោ.

២៥៩. ‘‘មជ្ឈេ អដ្ឋដ្ឋកុម្ភីនំ, ឧស្សិតា កញ្ចនគ្ឃិយោ;

អតិរោចន្តិ វណ្ណេន, សរទេវ ទិវាករោ.

២៦០. ‘‘ចតុទ្វារេសុ សោភន្តិ, តោរណា រតនាមយា;

ឧស្សិតា ផលកា រម្មា, សោភន្តិ រតនាមយា.

២៦១. ‘‘វិរោចន្តិ បរិក្ខិត្តា [បរិក្ខាយោ (ស្យា.)], អវដំសា សុនិម្មិតា;

ឧស្សិតានិ បដាកានិ, រតនានិ វិរោចរេ.

២៦២. ‘‘សុរត្តំ សុកតំ ចិត្តំ, ចេតិយំ រតនាមយំ;

អតិរោចតិ វណ្ណេន, សសញ្ឈោវ [សសជ្ឈាវ (ស្យា. ក.), សសញ្ជាវ (បី.)] ទិវាករោ.

២៦៣. ‘‘ថូបស្ស វេទិយោ តិស្សោ, ហរិតាលេន បូរយិ;

ឯកំ មនោសិលាយេកំ, អញ្ជនេន ច ឯកិកំ.

២៦៤. ‘‘បូជំ ឯតាទិសំ រម្មំ, ការេត្វា វរវាទិនោ;

អទាសិ ទានំ សង្ឃស្ស, យាវជីវំ យថាពលំ.

២៦៥. ‘‘សហាវ សេដ្ឋិនា តេន, តានិ បុញ្ញានិ សព្ពសោ;

យាវជីវំ ករិត្វាន, សហាវ សុគតិំ គតា.

២៦៦. ‘‘សម្បត្តិយោនុភោត្វាន, ទេវត្តេ អថ មានុសេ;

ឆាយា វិយ សរីរេន, សហ តេនេវ សំសរិំ.

២៦៧. ‘‘ឯកនវុតិតោ កប្បេ, វិបស្សី នាម នាយកោ;

ឧប្បជ្ជិ ចារុទស្សនោ, សព្ពធម្មវិបស្សកោ.

២៦៨. ‘‘តទាយំ ពន្ធុមតិយំ, ព្រាហ្មណោ សាធុសម្មតោ;

អឌ្ឍោ សន្តោ គុណេនាបិ [សត្ថាគមេនាសិ (សី.)], ធនេន ច សុទុគ្គតោ.

២៦៩. ‘‘តទាបិ តស្សាហំ អាសិំ, ព្រាហ្មណី សមចេតសា;

កទាចិ សោ ទិជវរោ, សង្គមេសិ មហាមុនិំ.

២៧០. ‘‘និសិន្នំ ជនកាយម្ហិ, ទេសេន្តំ អមតំ បទំ;

សុត្វា ធម្មំ បមុទិតោ, អទាសិ ឯកសាដកំ.

២៧១. ‘‘ឃរមេកេន វត្ថេន, គន្ត្វានេតំ ស មព្រវិ [មមព្រវិ (សី. ស្យា. បី.)];

‘អនុមោទ មហាបុញ្ញំ [មហាបញ្ញេ (សី.), មហាបុញ្ញេ (ស្យា. ក.)], ទិន្នំ ពុទ្ធស្ស សាដកំ’.

២៧២. ‘‘តទាហំ អញ្ជលិំ កត្វា, អនុមោទិំ សុបីណិតា [សុវិទិតា (ស្យា.), សុបីតិយា (ក.)];

‘សុទិន្នោ សាដកោ សាមិ, ពុទ្ធសេដ្ឋស្ស តាទិនោ’.

២៧៣. ‘‘សុខិតោ សជ្ជិតោ ហុត្វា, សំសរន្តោ ភវាភវេ;

ពារាណសិបុរេ រម្មេ, រាជា អាសិ មហីបតិ.

២៧៤. ‘‘តទា តស្ស មហេសីហំ, ឥត្ថិគុម្ពស្ស ឧត្តមា;

តស្សាតិ ទយិតា [តស្សាវិ ទុតិយិកា (ស្យា.)] អាសិំ, បុព្ពស្នេហេន ភត្តុនោ [ចុត្តរិ (ស្យា. បី. ក.)].

២៧៥. ‘‘បិណ្ឌាយ វិចរន្តេ តេ [សោ (សី. ស្យា. បី.)], អដ្ឋ បច្ចេកនាយកេ;

ទិស្វា បមុទិតោ ហុត្វា, ទត្វា បិណ្ឌំ មហារហំ.

២៧៦. ‘‘បុនោ និមន្តយិត្វាន, កត្វា រតនមណ្ឌបំ;

កម្មារេហិ កតំ បត្តំ [កតំ ឆត្តំ (សី.), កតមដ្ឋំ (ស្យា.)], សោវណ្ណំ វត តត្តកំ.

២៧៧. ‘‘សមានេត្វាន តេ សព្ពេ, តេសំ ទានមទាសិ សោ;

សោណ្ណាសនេ បវិដ្ឋានំ, បសន្នោ សេហិ បាណិភិ.

២៧៨. ‘‘តម្បិ ទានំ សហាទាសិំ, កាសិរាជេនហំ តទា;

បុនាហំ ពារាណសិយំ, ជាតា កាសិកគាមកេ.

២៧៩. ‘‘កុដុម្ពិកកុលេ ផីតេ, សុខិតោ សោ សភាតុកោ;

ជេដ្ឋស្ស ភាតុនោ ជាយា, អហោសិំ សុបតិព្ពតា.

២៨០. ‘‘បច្ចេកពុទ្ធំ ទិស្វាន, កនិយស្ស មម ភត្តុនោ [ភត្តុកនិយសោ (ស្យា.)];

ភាគន្នំ តស្ស ទត្វាន, អាគតេ តម្ហិ បាវទិំ.

២៨១. ‘‘នាភិនន្ទិត្ថ សោ ទានំ, តតោ តស្ស អទាសហំ;

ឧខា [ពុទ្ធា (ស្យា.)] អានិយ តំ អន្នំ, បុនោ តស្សេវ សោ អទា.

២៨២. ‘‘តទន្នំ ឆឌ្ឌយិត្វាន, ទុដ្ឋា ពុទ្ធស្សហំ តទា;

បត្តំ កលលបុណ្ណំ តំ, អទាសិំ តស្ស តាទិនោ.

២៨៣. ‘‘ទានេ ច គហណេ ចេវ, អបចេ បទុសេបិ ច;

សមចិត្តមុខំ ទិស្វា, តទាហំ សំវិជិំ ភុសំ.

២៨៤. ‘‘បុនោ បត្តំ គហេត្វាន, សោធយិត្វា សុគន្ធិនា;

បសន្នចិត្តា បូរេត្វា, សឃតំ សក្ករំ អទំ.

២៨៥. ‘‘យត្ថ យត្ថូបបជ្ជាមិ, សុរូបា ហោមិ ទានតោ;

ពុទ្ធស្ស អបការេន, ទុគ្គន្ធា វទនេន ច.

២៨៦. ‘‘បុន កស្សបវីរស្ស, និធាយន្តម្ហិ ចេតិយេ;

សោវណ្ណំ ឥដ្ឋកំ វរំ, អទាសិំ មុទិតា អហំ.

២៨៧. ‘‘ចតុជ្ជាតេន គន្ធេន, និចយិត្វា តមិដ្ឋកំ;

មុត្តា ទុគ្គន្ធទោសម្ហា, សព្ពង្គសុសមាគតា.

២៨៨. ‘‘សត្តបាតិសហស្សានិ, រតនេហេវ សត្តហិ;

ការេត្វា ឃតបូរានិ, វដ្ដីនិ [វដ្ដីយោ (សី.)] ច សហស្សសោ.

២៨៩. ‘‘បក្ខិបិត្វា បទីបេត្វា, ឋបយិំ សត្តបន្តិយោ;

បូជនត្ថំ លោកនាថស្ស, វិប្បសន្នេន ចេតសា.

២៩០. ‘‘តទាបិ តម្ហិ បុញ្ញម្ហិ, ភាគិនីយិ វិសេសតោ;

បុន កាសីសុ សញ្ជាតោ, សុមិត្តា ឥតិ វិស្សុតោ.

២៩១. ‘‘តស្សាហំ ភរិយា អាសិំ, សុខិតា សជ្ជិតា បិយា;

តទា បច្ចេកមុនិនោ, អទាសិំ ឃនវេឋនំ.

២៩២. ‘‘តស្សាបិ ភាគិនី អាសិំ, មោទិត្វា ទានមុត្តមំ;

បុនាបិ កាសិរដ្ឋម្ហិ, ជាតោ កោលិយជាតិយា.

២៩៣. ‘‘តទា កោលិយបុត្តានំ, សតេហិ សហ បញ្ចហិ;

បញ្ចបច្ចេកពុទ្ធានំ, សតានិ សមុបដ្ឋហិ.

២៩៤. ‘‘តេមាសំ តប្បយិត្វាន [វាសយិត្វាន (ស្យា. បី.)], អទាសិ ច តិចីវរេ [តិចីវរំ (ស្យា.)];

ជាយា តស្ស តទា អាសិំ, បុញ្ញកម្មបថានុគា.

២៩៥. ‘‘តតោ ចុតោ អហុ រាជា, នន្ទោ នាម មហាយសោ;

តស្សាបិ មហេសី អាសិំ, សព្ពកាមសមិទ្ធិនី.

២៩៦. ‘‘តទា រាជា ភវិត្វាន, ព្រហ្មទត្តោ មហីបតិ;

បទុមវតីបុត្តានំ, បច្ចេកមុនិនំ តទា.

២៩៧. ‘‘សតានិ បញ្ចនូនានិ, យាវជីវំ ឧបដ្ឋហិំ;

រាជុយ្យានេ និវាសេត្វា, និព្ពុតានិ ច បូជយិំ.

២៩៨. ‘‘ចេតិយានិ ច ការេត្វា, បព្ពជិត្វា ឧភោ មយំ;

ភាវេត្វា អប្បមញ្ញាយោ, ព្រហ្មលោកំ អគម្ហសេ.

២៩៩. ‘‘តតោ ចុតោ មហាតិត្ថេ, សុជាតោ បិប្ផលាយនោ;

មាតា សុមនទេវីតិ, កោសិគោត្តោ ទិជោ បិតា.

៣០០. ‘‘អហំ មទ្ទេ ជនបទេ, សាកលាយ បុរុត្តមេ;

កប្បិលស្ស ទិជស្សាសិំ, ធីតា មាតា សុចីមតិ.

៣០១. ‘‘ឃនកញ្ចនពិម្ពេន, និម្មិនិត្វាន មំ បិតា;

អទា កស្សបធីរស្ស, កាមេហិ វជ្ជិតស្សមំ.

៣០២. ‘‘កទាចិ សោ ការុណិកោ, គន្ត្វា កម្មន្តបេក្ខកោ;

កាកាទិកេហិ ខជ្ជន្តេ, បាណេ ទិស្វាន សំវិជិ.

៣០៣. ‘‘ឃរេវាហំ តិលេ ជាតេ, ទិស្វានាតបតាបនេ;

កិមិ កាកេហិ ខជ្ជន្តេ, សំវេគមលភិំ តទា.

៣០៤. ‘‘តទា សោ បព្ពជី ធីរោ, អហំ តមនុបព្ពជិំ;

បញ្ចវស្សានិ និវសិំ, បរិព្ពាជវតេ [បរិព្ពាជបថេ (ស្យា. បី.)] អហំ.

៣០៥. ‘‘យទា បព្ពជិតា អាសិ, គោតមី ជិនបោសិកា;

តទាហំ តមុបគន្ត្វា, ពុទ្ធេន អនុសាសិតា.

៣០៦. ‘‘ន ចិរេនេវ កាលេន, អរហត្តមបាបុណិំ;

អហោ កល្យាណមិត្តត្តំ, កស្សបស្ស សិរីមតោ.

៣០៧. ‘‘សុតោ ពុទ្ធស្ស ទាយាទោ, កស្សបោ សុសមាហិតោ;

បុព្ពេនិវាសំ យោ វេទិ, សគ្គាបាយញ្ច បស្សតិ.

៣០៨. ‘‘អថោ ជាតិក្ខយំ បត្តោ, អភិញ្ញាវោសិតោ មុនិ;

ឯតាហិ តីហិ វិជ្ជាហិ, តេវិជ្ជោ ហោតិ ព្រាហ្មណោ.

៣០៩. ‘‘តថេវ ភទ្ទកាបិលានី [ភទ្ទាកាបិលានី (សី. បី.)], តេវិជ្ជា មច្ចុហាយិនី;

ធារេតិ អន្តិមំ ទេហំ, ជិត្វា មារំ សវាហនំ.

៣១០. ‘‘ទិស្វា អាទីនវំ លោកេ, ឧភោ បព្ពជិតា មយំ;

ត្យម្ហ ខីណាសវា ទន្តា, សីតិភូតាម្ហ និព្ពុតា.

៣១១. ‘‘កិលេសា ឈាបិតា មយ្ហំ…បេ… វិហរាមិ អនាសវា.

៣១២. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៣១៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ ភទ្ទកាបិលានី ភិក្ខុនី ឥមា គាថាយោ អភាសិត្ថាតិ.

ភទ្ទកាបិលានីថេរិយាបទានំ សត្តមំ.