៥. នន្ទាថេរីអបទានំ

១៦៦. ‘‘បទុមុត្តរោ នាម ជិនោ, សព្ពធម្មាន បារគូ;

ឥតោ សតសហស្សម្ហិ, កប្បេ ឧប្បជ្ជិ នាយកោ.

១៦៧. ‘‘ឱវាទកោ វិញ្ញាបកោ, តារកោ សព្ពបាណិនំ;

ទេសនាកុសលោ ពុទ្ធោ, តារេសិ ជនតំ ពហុំ.

១៦៨. ‘‘អនុកម្បកោ ការុណិកោ, ហិតេសី សព្ពបាណិនំ;

សម្បត្តេ តិត្ថិយេ សព្ពេ, បញ្ចសីលេ បតិដ្ឋបិ.

១៦៩. ‘‘ឯវំ និរាកុលំ អាសិ, សុញ្ញតំ តិត្ថិយេហិ ច;

វិចិត្តំ អរហន្តេហិ, វសីភូតេហិ តាទិភិ.

១៧០. ‘‘រតនានដ្ឋបញ្ញាសំ, ឧគ្គតោវ មហាមុនិ;

កញ្ចនគ្ឃិយសង្កាសោ, ពាត្តិំសវរលក្ខណោ.

១៧១. ‘‘វស្សសតសហស្សានិ, អាយុ វិជ្ជតិ តាវទេ;

តាវតា តិដ្ឋមានោ សោ, តារេសិ ជនតំ ពហុំ.

១៧២. ‘‘តទាហំ ហំសវតិយំ, ជាតា សេដ្ឋិកុលេ អហុំ;

នានារតនបជ្ជោតេ, មហាសុខសមប្បិតា.

១៧៣. ‘‘ឧបេត្វា តំ មហាវីរំ, អស្សោសិំ ធម្មទេសនំ;

អមតំ បរមស្សាទំ, បរមត្ថនិវេទកំ.

១៧៤. ‘‘តទា និមន្តយិត្វាន, សសង្ឃំ លោកនាយកំ;

ទត្វា តស្ស មហាទានំ, បសន្នា សេហិ បាណិភិ.

១៧៥. ‘‘ឈាយិនីនំ ភិក្ខុនីនំ, អគ្គដ្ឋានមបត្ថយិំ;

និបច្ច សិរសា ធីរំ, សសង្ឃំ លោកនាយកំ.

១៧៦. ‘‘តទា អទន្តទមកោ, តិលោកសរណោ បភូ;

ព្យាកាសិ នរសារថិ, ‘លច្ឆសេ តំ សុបត្ថិតំ.

១៧៧. ‘‘‘សតសហស្សិតោ កប្បេ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

១៧៨. ‘‘‘តស្ស ធម្មេសុ ទាយាទា, ឱរសា ធម្មនិម្មិតា;

នន្ទាតិ នាម នាមេន, ហេស្សតិ សត្ថុ សាវិកា’.

១៧៩. ‘‘តំ សុត្វា មុទិតា ហុត្វា, យាវជីវំ តទា ជិនំ;

មេត្តចិត្តា បរិចរិំ, បច្ចយេហិ វិនាយកំ.

១៨០. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

១៨១. ‘‘តតោ ចុតា យាមមគំ, តតោហំ តុសិតំ គតា [អគំ (សី. បី. ក.)];

តតោ ច និម្មានរតិំ, វសវត្តិបុរំ តតោ [គតា (ស្យា.)].

១៨២. ‘‘យត្ថ យត្ថូបបជ្ជាមិ, តស្ស កម្មស្ស វាហសា;

តត្ថ តត្ថេវ រាជូនំ, មហេសិត្តមការយិំ.

១៨៣. ‘‘តតោ ចុតា មនុស្សត្តេ, រាជានំ ចក្កវត្តិនំ;

មណ្ឌលីនញ្ច រាជូនំ, មហេសិត្តមការយិំ.

១៨៤. ‘‘សម្បត្តិំ អនុភោត្វាន, ទេវេសុ មនុជេសុ ច;

សព្ពត្ថ សុខិតា ហុត្វា, នេកកប្បេសុ សំសរិំ.

១៨៥. ‘‘បច្ឆិមេ ភវេ សម្បត្តេ, សុរម្មេ [បុរស្មិំ (ស្យា.)] កបិលវ្ហយេ;

រញ្ញោ សុទ្ធោទនស្សាហំ, ធីតា អាសិំ អនិន្ទិតា.

១៨៦. ‘‘សិរិយា [សិរិំវ (សី.), រំសិរិវ (ស្យា.)] រូបិនិំ ទិស្វា, នន្ទិតំ អាសិ តំ កុលំ;

តេន នន្ទាតិ មេ នាមំ, សុន្ទរំ បវរំ អហុ.

១៨៧. ‘‘យុវតីនញ្ច សព្ពាសំ, កល្យាណីតិ ច វិស្សុតា;

តស្មិម្បិ នគរេ រម្មេ, ឋបេត្វា តំ យសោធរំ.

១៨៨. ‘‘ជេដ្ឋោ ភាតា តិលោកគ្គោ, បច្ឆិមោ [មជ្ឈិមោ (បី.)] អរហា តថា;

ឯកាកិនី គហដ្ឋាហំ, មាតរា បរិចោទិតា.

១៨៩. ‘‘‘សាកិយម្ហិ កុលេ ជាតា, បុត្តេ ពុទ្ធានុជា តុវំ;

នន្ទេនបិ វិនា ភូតា, អគារេ កិំ នុ អច្ឆសិ.

១៩០. ‘‘‘ជរាវសានំ យោព្ពញ្ញំ, រូបំ អសុចិសម្មតំ;

រោគន្តមបិចារោគ្យំ, ជីវិតំ មរណន្តិកំ.

១៩១. ‘‘‘ឥទម្បិ តេ សុភំ រូបំ, សសីកន្តំ មនោហរំ;

ភូសនានំ អលង្ការំ, សិរិសង្ឃាដសន្និភំ.

១៩២. ‘‘‘បុញ្ជិតំ លោកសារំវ, នយនានំ រសាយនំ;

បុញ្ញានំ កិត្តិជននំ, ឧក្កាកកុលនន្ទនំ.

១៩៣. ‘‘‘ន ចិរេនេវ កាលេន, ជរា សមធិសេស្សតិ [សមភិភោស្សតិ (សី. ស្យា.), សមធិហេស្សតិ (បី.)];

វិហាយ គេហំ ការុញ្ញេ [ការុញ្ញេ (សី. បី.), បារយ្ហិំ (ស្យា.)], ចរ ធម្មមនិន្ទិតេ’.

១៩៤. ‘‘សុត្វាហំ មាតុ វចនំ, បព្ពជិំ អនគារិយំ;

ទេហេន ន តុ ចិត្តេន, រូបយោព្ពនលាឡិតា.

១៩៥. ‘‘មហតា ច បយត្តេន, ឈានជ្ឈេន បរំ មម;

កាតុញ្ច វទតេ មាតា, ន ចាហំ តត្ថ ឧស្សុកា.

១៩៦. ‘‘តតោ មហាការុណិកោ, ទិស្វា មំ កាមលាលសំ [កមលាននំ (ស្យា.)];

និព្ពិន្ទនត្ថំ រូបស្មិំ, មម ចក្ខុបថេ ជិនោ.

១៩៧. ‘‘សកេន អានុភាវេន, ឥត្ថិំ មាបេសិ សោភិនិំ;

ទស្សនីយំ សុរុចិរំ, មមតោបិ សុរូបិនិំ.

១៩៨. ‘‘តមហំ វិម្ហិតា ទិស្វា, អតិវិម្ហិតទេហិនិំ;

ចិន្តយិំ សផលំ មេតិ, នេត្តលាភញ្ច មានុសំ.

១៩៩. ‘‘តមហំ ឯហិ សុភគេ, យេនត្ថោ តំ វទេហិ មេ;

កុលំ តេ នាមគោត្តញ្ច, វទ មេ យទិ តេ បិយំ.

២០០. ‘ន វញ្ចកាលោ សុភគេ [បញ្ហកាលោ សុភណេ (សី. ស្យា. បី.)], ឧច្ឆង្គេ មំ និវាសយ;

សីទន្តីវ មមង្គានិ, បសុប្បយ មុហុត្តកំ’.

២០១. ‘‘តតោ សីសំ មមង្កេ សា, កត្វា សយិ សុលោចនា;

តស្សា នលាដេ បតិតា, លុទ្ធា [លូតា (ស្យា.)] បរមទារុណា.

២០២. ‘‘សហ តស្សា និបាតេន, បិឡកា ឧបបជ្ជថ;

បគ្ឃរិំសុ បភិន្នា ច, កុណបា បុព្ពលោហិតា.

២០៣. ‘‘បភិន្នំ វទនញ្ចាបិ, កុណបំ បូតិគន្ធនំ;

ឧទ្ធុមាតំ វិនិលញ្ច, បុព្ពញ្ចាបិ សរីរកំ.

២០៤. ‘‘សា បវេទិតសព្ពង្គី, និស្សសន្តី មុហុំ មុហុំ;

វេទយន្តី សកំ ទុក្ខំ, ករុណំ បរិទេវយិ.

២០៥. ‘‘‘ទុក្ខេន ទុក្ខិតា ហោមិ, ផុសយន្តិ ច វេទនា;

មហាទុក្ខេ និមុគ្គម្ហិ, សរណំ ហោហិ មេ សខី’.

២០៦. ‘‘‘កុហិំ វទនសោភំ តេ, កុហិំ តេ តុង្គនាសិកា;

តម្ពពិម្ពវរោដ្ឋំ តេ, វទនំ តេ កុហិំ គតំ.

២០៧. ‘‘‘កុហិំ សសីនិភំ វណ្ណំ, កម្ពុគីវា កុហិំ គតា;

ទោឡាលោលាវ [ទាមាមាលញ្ច (ស្យា.), ទោលោលុល្លាវ (ក.)] តេ កណ្ណា, វេវណ្ណំ សមុបាគតា.

២០៨. ‘‘‘មកុឡខារកាការា [មកុលម្ពុរូហាការា (សី.), មកុឡបទុមាការា (ស្យា.)], កលិកាវ [កលសាវ (សី. ស្យា. បី.)] បយោធរា;

បភិន្នា បូតិកុណបា, ទុដ្ឋគន្ធិត្តមាគតា.

២០៩. ‘‘‘វេទិមជ្ឈាវ សុស្សោណី [តនុមជ្ឈា បុថុស្សោណី (សី. ស្យា.), វេទិមជ្ឈា បុថុស្សោណី (បី.)], សូនាវ នីតកិព្ពិសា;

ជាតា អមេជ្ឈភរិតា, អហោ រូបមសស្សតំ.

២១០. ‘‘‘សព្ពំ សរីរសញ្ជាតំ, បូតិគន្ធំ ភយានកំ;

សុសានមិវ ពីភច្ឆំ, រមន្តេ យត្ថ ពាលិសា’.

២១១. ‘‘តទា មហាការុណិកោ, ភាតា មេ លោកនាយកោ;

ទិស្វា សំវិគ្គចិត្តំ មំ, ឥមា គាថា អភាសថ.

២១២. ‘‘‘អាតុរំ កុណបំ បូតិំ, បស្ស នន្ទេ សមុស្សយំ;

អសុភាយ ចិត្តំ ភាវេហិ, ឯកគ្គំ សុសមាហិតំ.

២១៣. ‘‘‘យថា ឥទំ តថា ឯតំ, យថា ឯតំ តថា ឥទំ;

ទុគ្គន្ធំ បូតិកំ វាតិ, ពាលានំ អភិនន្ទិតំ.

២១៤. ‘‘‘ឯវមេតំ អវេក្ខន្តី, រត្តិន្ទិវមតន្ទិតា;

តតោ សកាយ បញ្ញាយ, អភិនិព្ពិជ្ឈ ទក្ខសិ’.

២១៥. ‘‘តតោហំ អតិសំវិគ្គា, សុត្វា គាថា សុភាសិតា;

តត្រដ្ឋិតាវហំ សន្តី, អរហត្តមបាបុណិំ.

២១៦. ‘‘យត្ថ យត្ថ និសិន្នាហំ, សទា ឈានបរាយនា;

ជិនោ តស្មិំ គុណេ តុដ្ឋោ, ឯតទគ្គេ ឋបេសិ មំ.

២១៧. ‘‘កិលេសា ឈាបិតា មយ្ហំ…បេ… វិហរាមិ អនាសវា.

២១៨. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

២១៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ នន្ទា ភិក្ខុនី ជនបទកល្យាណី ឥមា គាថាយោ អភាសិត្ថាតិ.

នន្ទាថេរិយាបទានំ បញ្ចមំ.