២. កិសាគោតមីថេរីអបទានំ

៥៥. ‘‘បទុមុត្តរោ នាម ជិនោ, សព្ពធម្មាន បារគូ;

ឥតោ សតសហស្សម្ហិ, កប្បេ ឧប្បជ្ជិ នាយកោ.

៥៦. ‘‘តទាហំ ហំសវតិយំ, ជាតា អញ្ញតរេ កុលេ;

ឧបេត្វា តំ នរវរំ, សរណំ សមុបាគមិំ.

៥៧. ‘‘ធម្មញ្ច តស្ស អស្សោសិំ, ចតុសច្ចូបសញ្ហិតំ;

មធុរំ បរមស្សាទំ, វដ្ដសន្តិសុខាវហំ [ចិត្តសន្តិ … (ស្យា.)].

៥៨. ‘‘តទា ច ភិក្ខុនិំ វីរោ, លូខចីវរធារិនិំ;

ឋបេន្តោ ឯតទគ្គម្ហិ, វណ្ណយី បុរិសុត្តមោ.

៥៩. ‘‘ជនេត្វានប្បកំ បីតិំ, សុត្វា ភិក្ខុនិយា គុណេ;

ការំ កត្វាន ពុទ្ធស្ស, យថាសត្តិ យថាពលំ.

៦០. ‘‘និបច្ច មុនិវរំ តំ, តំ ឋានមភិបត្ថយិំ;

តទានុមោទិ សម្ពុទ្ធោ, ឋានលាភាយ នាយកោ.

៦១. ‘‘‘សតសហស្សិតោ កប្បេ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

៦២. ‘‘‘តស្ស ធម្មេសុ ទាយាទា, ឱរសា ធម្មនិម្មិតា;

កិសាគោតមី [គោតមី នាម (សី. ក.)] នាមេន, ហេស្សតិ សត្ថុ សាវិកា’.

៦៣. ‘‘តំ សុត្វា មុទិតា ហុត្វា, យាវជីវំ តទា ជិនំ;

មេត្តចិត្តា បរិចរិំ, បច្ចយេហិ វិនាយកំ.

៦៤. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

៦៥. ‘‘ឥមម្ហិ ភទ្ទកេ កប្បេ, ព្រហ្មពន្ធុ មហាយសោ;

កស្សបោ នាម គោត្តេន, ឧប្បជ្ជិ វទតំ វរោ.

៦៦. ‘‘ឧបដ្ឋាកោ មហេសិស្ស, តទា អាសិ នរិស្សរោ;

កាសិរាជា កិកី នាម, ពារាណសិបុរុត្តមេ.

៦៧. ‘‘បញ្ចមី តស្ស ធីតាសិំ, ធម្មា នាមេន វិស្សុតា;

ធម្មំ សុត្វា ជិនគ្គស្ស, បព្ពជ្ជំ សមរោចយិំ.

៦៨. ‘‘អនុជានិ ន នោ តាតោ, អគារេវ តទា មយំ;

វីសវស្សសហស្សានិ, វិចរិម្ហ អតន្ទិតា.

៦៩. ‘‘កោមារិព្រហ្មចរិយំ, រាជកញ្ញា សុខេធិតា;

ពុទ្ធោបដ្ឋាននិរតា, មុទិតា សត្ត ធីតរោ.

៧០. ‘‘សមណី សមណគុត្តា ច, ភិក្ខុនី ភិក្ខុទាយិកា;

ធម្មា ចេវ សុធម្មា ច, សត្តមី សង្ឃទាយិកា.

៧១. ‘‘ខេមា ឧប្បលវណ្ណា ច, បដាចារា ច កុណ្ឌលា;

អហញ្ច ធម្មទិន្នា ច, វិសាខា ហោតិ សត្តមី.

៧២. ‘‘តេហិ កម្មេហិ សុកតេហិ, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

៧៣. ‘‘បច្ឆិមេ ច ភវេ ទានិ, ជាតា សេដ្ឋិកុលេ អហំ;

ទុគ្គតេ អធនេ នដ្ឋេ [នីចេ (ស្យា.), និទ្ធេ (បី.)], គតា ច សធនំ កុលំ.

៧៤. ‘‘បតិំ ឋបេត្វា សេសា មេ, ទេស្សន្តិ អធនា ឥតិ;

យទា ច បសូតា [សសុតា (សី. បី.)] អាសិំ, សព្ពេសំ ទយិតា តទា.

៧៥. ‘‘យទា សោ តរុណោ ភទ្ទោ [បុត្តោ (សី. ស្យា.)], កោមលកោ [កោមារកោ (ស្យា.), កោមលង្គោ (សី. បី.)] សុខេធិតោ;

សបាណមិវ កន្តោ មេ, តទា យមវសំ គតោ.

៧៦. ‘‘សោកដ្ដា ទីនវទនា, អស្សុនេត្តា រុទម្មុខា;

មតំ កុណបមាទាយ, វិលបន្តី គមាមហំ.

៧៧. ‘‘តទា ឯកេន សន្ទិដ្ឋា, ឧបេត្វាភិសក្កុត្តមំ;

អវោចំ ទេហិ ភេសជ្ជំ, បុត្តសញ្ជីវនន្តិ ភោ.

៧៨. ‘‘ន វិជ្ជន្តេ មតា យស្មិំ, គេហេ សិទ្ធត្ថកំ តតោ;

អាហរាតិ ជិនោ អាហ, វិនយោបាយកោវិទោ.

៧៩. ‘‘តទា គមិត្វា សាវត្ថិំ, ន លភិំ តាទិសំ ឃរំ;

កុតោ សិទ្ធត្ថកំ តស្មា, តតោ លទ្ធា សតិំ អហំ.

៨០. ‘‘កុណបំ ឆឌ្ឌយិត្វាន, ឧបេសិំ លោកនាយកំ;

ទូរតោវ មមំ ទិស្វា, អវោច មធុរស្សរោ.

៨១. ‘‘‘យោ ច វស្សសតំ ជីវេ, អបស្សំ ឧទយព្ពយំ;

ឯកាហំ ជីវិតំ សេយ្យោ, បស្សតោ ឧទយព្ពយំ.

៨២. ‘‘‘ន គាមធម្មោ និគមស្ស ធម្មោ, ន ចាបិយំ ឯកកុលស្ស ធម្មោ;

សព្ពស្ស លោកស្ស សទេវកស្ស, ឯសេវ ធម្មោ យទិទំ អនិច្ចតា’.

៨៣. ‘‘សាហំ សុត្វានិមា [សហសុត្វានិមា (ក.)] គាថា, ធម្មចក្ខុំ វិសោធយិំ;

តតោ វិញ្ញាតសទ្ធម្មា, បព្ពជិំ អនគារិយំ.

៨៤. ‘‘តថា បព្ពជិតា សន្តី, យុញ្ជន្តី ជិនសាសនេ;

ន ចិរេនេវ កាលេន, អរហត្តមបាបុណិំ.

៨៥. ‘‘ឥទ្ធីសុ ច វសី ហោមិ, ទិព្ពាយ សោតធាតុយា;

បរចិត្តានិ ជានាមិ, សត្ថុសាសនការិកា.

៨៦. ‘‘បុព្ពេនិវាសំ ជានាមិ, ទិព្ពចក្ខុ វិសោធិតំ;

ខេបេត្វា អាសវេ សព្ពេ, វិសុទ្ធាសិំ សុនិម្មលា.

៨៧. ‘‘បរិចិណ្ណោ មយា សត្ថា, កតំ ពុទ្ធស្ស សាសនំ;

ឱហិតោ គរុកោ ភារោ, ភវនេត្តិ សមូហតា.

៨៨. ‘‘យស្សត្ថាយ បព្ពជិតា, អគារស្មានគារិយំ;

សោ មេ អត្ថោ អនុប្បត្តោ, សព្ពសំយោជនក្ខយោ.

៨៩. ‘‘អត្ថធម្មនិរុត្តីសុ, បដិភានេ តថេវ ច;

ញាណំ មេ វិមលំ សុទ្ធំ, ពុទ្ធសេដ្ឋស្ស វាហសា.

៩០. ‘‘សង្ការកូដា អាហិត្វា, សុសានា រថិយាបិ ច;

តតោ សង្ឃាដិកំ កត្វា, លូខំ ធារេមិ ចីវរំ.

៩១. ‘‘ជិនោ តស្មិំ គុណេ តុដ្ឋោ, លូខចីវរធារណេ;

ឋបេសិ ឯតទគ្គម្ហិ, បរិសាសុ វិនាយកោ.

៩២. ‘‘កិលេសា ឈាបិតា មយ្ហំ…បេ… វិហរាមិ អនាសវា.

៩៣. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

៩៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ កិសាគោតមី ភិក្ខុនី ឥមា គាថាយោ អភាសិត្ថាតិ.

កិសាគោតមីថេរិយាបទានំ ទុតិយំ.