៣. ធម្មទិន្នាថេរីអបទានំ

៩៥. ‘‘បទុមុត្តរោ នាម ជិនោ, សព្ពធម្មាន បារគូ;

ឥតោ សតសហស្សម្ហិ, កប្បេ ឧប្បជ្ជិ នាយកោ.

៩៦. ‘‘តទាហំ ហំសវតិយំ, កុលេ អញ្ញតរេ អហុំ;

បរកម្មការី អាសិំ, និបកា សីលសំវុតា.

៩៧. ‘‘បទុមុត្តរពុទ្ធស្ស, សុជាតោ អគ្គសាវកោ;

វិហារា អភិនិក្ខម្ម, បិណ្ឌបាតាយ [បត្តមាទាយ (ក.)] គច្ឆតិ.

៩៨. ‘‘ឃដំ គហេត្វា គច្ឆន្តី, តទា ឧទកហារិកា;

តំ ទិស្វា អទទំ បូបំ, បសន្នា សេហិ បាណិភិ.

៩៩. ‘‘បដិគ្គហេត្វា តត្ថេវ, និសិន្នោ បរិភុញ្ជិ សោ;

តតោ នេត្វាន តំ គេហំ, អទាសិំ តស្ស ភោជនំ.

១០០. ‘‘តតោ មេ អយ្យកោ តុដ្ឋោ, អករី សុណិសំ សកំ;

សស្សុយា សហ គន្ត្វាន, សម្ពុទ្ធំ អភិវាទយិំ.

១០១. ‘‘តទា សោ ធម្មកថិកំ, ភិក្ខុនិំ បរិកិត្តយំ;

ឋបេសិ ឯតទគ្គម្ហិ, តំ សុត្វា មុទិតា អហំ.

១០២. ‘‘និមន្តយិត្វា សុគតំ, សសង្ឃំ លោកនាយកំ;

មហាទានំ ទទិត្វាន, តំ ឋានមភិបត្ថយិំ.

១០៣. ‘‘តតោ មំ សុគតោ អាហ, ឃននិន្នាទសុស្សរោ [ឃននិន្នាទសុស្សរេ (ក.)];

‘មមុបដ្ឋាននិរតេ, សសង្ឃបរិវេសិកេ.

១០៤. ‘‘‘សទ្ធម្មស្សវនេ យុត្តេ, គុណវទ្ធិតមានសេ;

ភទ្ទេ ភវស្សុ មុទិតា, លច្ឆសេ បណិធីផលំ.

១០៥. ‘‘‘សតសហស្សិតោ កប្បេ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

១០៦. ‘‘‘តស្ស ធម្មេសុ ទាយាទា, ឱរសា ធម្មនិម្មិតា;

ធម្មទិន្នាតិ នាមេន, ហេស្សតិ សត្ថុ សាវិកា’.

១០៧. ‘‘តំ សុត្វា មុទិតា ហុត្វា, យាវជីវំ មហាមុនិំ;

មេត្តចិត្តា បរិចរិំ, បច្ចយេហិ វិនាយកំ.

១០៨. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

១០៩. ‘‘ឥមម្ហិ ភទ្ទកេ កប្បេ, ព្រហ្មពន្ធុ មហាយសោ;

កស្សបោ នាម គោត្តេន, ឧប្បជ្ជិ វទតំ វរោ.

១១០. ‘‘ឧបដ្ឋាកោ មហេសិស្ស, តទា អាសិ នរិស្សរោ;

កាសិរាជា កិកី នាម, ពារាណសិបុរុត្តមេ.

១១១. ‘‘ឆដ្ឋា តស្សាសហំ ធីតា, សុធម្មា ឥតិ វិស្សុតា;

ធម្មំ សុត្វា ជិនគ្គស្ស, បព្ពជ្ជំ សមរោចយិំ.

១១២. ‘‘អនុជានិ ន នោ តាតោ, អគារេវ តទា មយំ;

វីសវស្សសហស្សានិ, វិចរិម្ហ អតន្ទិតា.

តតិយំ ភាណវារំ.

១១៣. ‘‘កោមារិព្រហ្មចរិយំ, រាជកញ្ញា សុខេធិតា;

ពុទ្ធោបដ្ឋាននិរតា, មុទិតា សត្ត ធីតរោ.

១១៤. ‘‘សមណី សមណគុត្តា ច, ភិក្ខុនី ភិក្ខុទាយិកា;

ធម្មា ចេវ សុធម្មា ច, សត្តមី សង្ឃទាយិកា.

១១៥. ‘‘ខេមា ឧប្បលវណ្ណា ច, បដាចារា ច កុណ្ឌលា;

គោតមី ច អហញ្ចេវ, វិសាខា ហោតិ សត្តមី.

១១៦. ‘‘តេហិ កម្មេហិ សុកតេហិ, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

១១៧. ‘‘បច្ឆិមេ ច ភវេ ទានិ, គិរិព្ពជបុរុត្តមេ;

ជាតា សេដ្ឋិកុលេ ផីតេ, សព្ពកាមសមិទ្ធិនេ.

១១៨. ‘‘យទា រូបគុណូបេតា, បឋមេ យោព្ពនេ ឋិតា;

តទា បរកុលំ គន្ត្វា, វសិំ សុខសមប្បិតា.

១១៩. ‘‘ឧបេត្វា លោកសរណំ, សុណិត្វា ធម្មទេសនំ;

អនាគាមិផលំ បត្តោ, សាមិកោ មេ សុពុទ្ធិមា.

១២០. ‘‘តទាហំ អនុជានេត្វា, បព្ពជិំ អនគារិយំ;

ន ចិរេនេវ កាលេន, អរហត្តមបាបុណិំ.

១២១. ‘‘តទា ឧបាសកោ សោ មំ, ឧបគន្ត្វា អបុច្ឆថ;

គម្ភីរេ និបុណេ បញ្ហេ, តេ សព្ពេ ព្យាករិំ អហំ.

១២២. ‘‘ជិនោ តស្មិំ គុណេ តុដ្ឋោ, ឯតទគ្គេ ឋបេសិ មំ;

‘ភិក្ខុនិំ ធម្មកថិកំ, នាញ្ញំ បស្សាមិ ឯទិសិំ.

១២៣. ‘ធម្មទិន្នា យថា ធីរា, ឯវំ ធារេថ ភិក្ខវោ’;

‘‘ឯវាហំ បណ្ឌិតា ហោមិ [ជាតា (សី.), នាម (ស្យា.)], នាយកេនានុកម្បិតា.

១២៤. ‘‘បរិចិណ្ណោ មយា សត្ថា, កតំ ពុទ្ធស្ស សាសនំ;

ឱហិតោ គរុកោ ភារោ, ភវនេត្តិ សមូហតា.

១២៥. ‘‘យស្សត្ថាយ បព្ពជិតា, អគារស្មានគារិយំ;

សោ មេ អត្ថោ អនុប្បត្តោ, សព្ពសំយោជនក្ខយោ.

១២៦. ‘‘ឥទ្ធីសុ ច វសី ហោមិ, ទិព្ពាយ សោតធាតុយា;

បរចិត្តានិ ជានាមិ, សត្ថុសាសនការិកា.

១២៧. ‘‘បុព្ពេនិវាសំ ជានាមិ, ទិព្ពចក្ខុ វិសោធិតំ;

ខេបេត្វា អាសវេ សព្ពេ, វិសុទ្ធាសិំ សុនិម្មលា.

១២៨. ‘‘កិលេសា ឈាបិតា មយ្ហំ…បេ… វិហរាមិ អនាសវា.

១២៩. ‘‘ស្វាគតំ វត មេ អាសិ…បេ… កតំ ពុទ្ធស្ស សាសនំ.

១៣០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ ធម្មទិន្នា ភិក្ខុនី ឥមា គាថាយោ អភាសិត្ថាតិ.

ធម្មទិន្នាថេរិយាបទានំ តតិយំ.